Ikki hukumat davrida ham hokimlik kursisini saqlab qolayotgan, O`zbekistonning qonun – qoidalari kamdan kam etib boradigan Andijon viloyati hokimining internetdagi trendlari haqida qisqacha.
Internet foydalanuvchilari tomonidan Andijon viloyati hokimi Shuhrat Abdurahmonovning Qonunni chetlab o`tishlari haqida ko`p muhokama qilishadi. Bugun bunga doir bir nechta misollar keltiramiz. Shuningdek, uni ijtimoiy tarmoqlarda “Andijon amiri” Shuhrat “arqadag`” deb ham atashadi.
8 fevral kuni ijtimoiy tarmoqlarda Andijon viloyati Marhamat tumanidagi maktablardan birida o`qituvchilar o`quv muassasada ta`lim sifati, o`quvchilarning oliygohlarga kirish ko`rsatkichi pastligi uchun ota-onalar oldida tik turib kechirim so`rashga majbur qilingani haqida xabarlar va o`qituvchilarning maktab faollar zali sahnasida bosh egib turgani aks etgan surat tarqaldi. Dastavval bunga viloyat hokimi majbur qilgani aytilgandi.
Keyinchalik Abdurahmonov ustozlarni bunday holga tushirilishiga yo`l qo`yilmasligini aytib, uzrli munosabat bildirib chiqdi. O`qituvchilar bilan bog`liq bunday holatlar birinchisi emas va oxirgisi ham bo`lmasa kerak.
Bundan bir necha kun oldin esa ijtimoiy tarmoqlarda Andijon viloyati tumanlarining ta`lim muassasalarida uyushmagan yoshlar uchun o`tkazilgan “Gulhan atrofida“ tadbirlariga o`qituvchilar majburan jalb etilayotgani haqida xabarlar tarqalgandi. Suratda o`qituvchilarni ko`rishingiz mumkin.
Manbaa: Jalaquduq tumani hokimligi
Shuhrat Abdurahmonov bitta kursida juda uzoq o`tirib qolmadimi?
Sh.Abdurahmonovning hokimiyatdagi faoliyati 2001 yilga borib taqaladi. Avvaliga Paxtaobod tumani hokimining birinchi o`rinbosari bo`lib ishlagan Abdurahmonov keyinchalik Paxtaobod tumani hokimi lavozimiga o`tadi. 2011 yildan viloyat hokimining birinchi o`rinbosari, 2013 yildan shu kunga qadar Andijon viloyati hokimidir.
Ikki hukumat davrida ham bitta kursidan tushmay kelayotgan Abdurahmonovning faoliyati davomida O`zbekistonda qabul qilinayotgan qaror va qonunlar Andijonga etib bormayotgandek tuyuladi.
Jumladan, ma`lumotlarga ko`ra joriy yilning 15 yanvar kuni viloyat perinatal markazida bo`lgan viloyat hokimi Shuhrat Abdurahmonov qurilayotgan yangi markazning oldini ochish uchun daraxtlarni kesish bo`yicha topshiriq bergan.
Shu kunning o`zida tunda markaz hovlisidagi 12 tup ninabargli daraxtlar kesib tashlanadi. Ijtimoiy tarmoqlarda tarqalgan bu haqidagi xabarlarga javoban viloyat hokimligi matbuot xizmati hech qanday daraxt kesilmagani, joyida turgani haqida rasmiy munosabat bildirgan. Keyinchalik xabar tahrirlangan va yuqoridagi jumla olib tashlangan. Ekologiya qo`mitasi daraxtlarni kesishga ruxsatnoma bermagani va qonun buzilishi aniqlanganini ma`lum qilgan.
Viloyat hokimligi esa “daraxtlar qirg`ini“ ga Abdurahmonov buyruq berganini rad etadi.
Hokimi mutlaqqa atalgan she`rlar
Qadimdan shoir va yozuvchilar yurtboshilar –u mulozimlardan “nimadir“li bo`lish niyatida ularning sha`niga g`azal – u she`rlar yozishgan, iltifot ko`rsatishgan. Ular “saroy shoirlari” deb ataladi. Lekin oddiy fuqarolar, millat yoshlari viloyat hokimini jimjimador so`zlar bilan “siylash”i, uni madh etib ulug`lashi demokratik emas, avtoritar davlat rahbarlariga xos belgi emasmi? Buni tushinish uchun uzoqqa borish shart emas.
Joriy yilning boshida yangi yil bayrami munosabati bilan viloyatdagi shifoxonalardan biriga tashrif buyurgan Abdurahmonovni hamshiralar unga atalgan she`r bilan kutib olgan.
Bundan bir necha yil oldin esa paxta dalasiga chiqqan andijonlik shoir Sharofiddin Boltaboev hokim bilan uchrashuvda uni madh etgandi.
Shahdi o`tkir qilichdan,
Shuhrat Qo`shaqboevichdan,
“ Ravon “ olgim kelyabdi,
Paxta tergim kelyabdi!
Ushbu she`rdan keyin shoirga “ Ravon “ kaliti beriladi.
Ijtimoiy tarmoqlarda tarqalishiga ko`ra, viloyat hokimi ulug`langan she`rlar maktab o`quvchilariga yodlatilmoqda. Unda shunday sartlar bor:
Biling, siz Andijonsiz!
Andijon esa – Sizsiz!
Faxr bilan aytamiz
Siz bizmiz, biz esa siz!
Viloyat hokimi ham mulozamat ko`rsatishni kanda qilmaydi. Ayrim internet faollarining hisob – kitoblariga ko`ra, Abdurahmonov tadbirlarninig birida prezidentga nisbatan muhtaram so`zini 81 marta boshqasida 108 marta ishlatgan.
Shuningdek, viloyat hokimining qonunlardan xohlaganicha foydalanishiga ko`nikib ham bo`ldik. O`tgan yili Rost24.uz saytida viloyat hokimining qarindoshi ekanligi aytilgan “ALSAEADA” o`quv markazi rahbari Gavharoy Hasanova “Yil ayoli“ tanlovida 1 o`ringa munosib ko`rilgani haqida maqola e`lon qilingandi. Bu Abdurahmonovning birinchi qo`llovi emas. 2020 yilda Andijon viloyat hokimligi shu ayolga tegishli bo`lgan “ALSAEADA" MChJdan bir donasi 760 ming so`mdan "Andijon mehr maskani" nomli kitob sotib olgan. Hokimiyat “ALSAEADA" MChJga 290 ta kitob uchun 220 million 400 ming so`m o`tkazib bergan.
Bir necha yil oldingi viloyat sog`liqni saqlash boshqarmasi bilan bog`liq pul yuvish voqealarini ham alohida tadqiq etgulik. Qolaversa, Andijonlik kam ta`minlangan ayollarga prezident oldida kalitlari topshirilgan, keyin esa bu uylarni ololmagan ayollar voqeasi ham “Andijon spektakli” nomi ostida ijtimoiy tarmoqlarni bosh mavzusiga aylangandi. Hokim qizining shohona tug`ilgan kuni videosi esa ko`pchilikni “xavasi”ni keltirgan. Bu misollar shunchaki katta tragediyaning reklamasi, xamir uchidan patir, xolos.
Qariyb o`n yildan buyon Andijon viloyati hokimining ildizlari etarlicha ildiz otib, yo`g`onlashib bo`lgan. Bunday uzoq muddatli faoliyatda korrupsiya, nepotizm etarlicha shakllana oladi va biz buni ko`rmoqdamiz. Ochiqlik, inson qadri, xolislik haqidagi jimjimador, yaltiroq so`zlarga qorin to`ymaydi.
“Argument i Fakt” gazetasining eski sonlarining birida shunday mashhur jumla bor:
“Hukumatdagi janoblar! Mafiyani jilovlang, yo`q qiling! Agar yo`qota olmasangiz, bizga ham ruxsat bering, biroz ishtirok etaylik...”
УЗ
-middle.jpg)
