Islom Karimov vafotidan bir hafta o`tib, 2016 yilning 8 sentyabr kuni O`zbekiston parlamenti palatalarining qo`shma majlisi bo`lib o`tgan edi. Unda mamlakatning o`sha vaqtdagi bosh vaziri hisoblangan Shavkat Mirziyoevga O`zbekiston prezidenti vazifa va vakolatlarini vaqtincha yuklatish to`g`risidagi qaror qabul qilingan.
Ushbu tarixiy majlis haqida «O`zbekiston» telekanali salkam ikki soatlik reportaj tayyorlagan. Unda majlisda so`z olgan arboblarning chiqishlaridan lavhalar ko`rish, bo`lajak prezidentning nutqi bilan tanishish mumkin.
«Daryo» mazkur sana munosabati bilan «O`zbekiston» telekanalining ushbu reportajini to`liq matnlashtirdi.
«O`zbekiston» telekanalining boshlovchisi:
Toshkentda Oliy Majlis Qonunchilik palatasi deputatlari va Senat a`zolari, taklif etilgan Vazirlar Mahkamasi a`zolari, vazirliklar va idoralar rahbarlari, boshqa tashkilotlarning, ommaviy axborot vositalarining vakillari ishtirokida Oliy Majlis Qonunchilik palatasi va Senatining qo`shma majlisi bo`lib o`tdi. Majlisni Oliy Majlis Qonunchilik palatasi spikeri Nurdinjon Ismoilov olib bordi.
Nurdinjon Ismoilov: Assalomu alaykum, qadrli deputatlar, senatorlar va qo`shma majlis ishtirokchilari. Bugun butun O`zbekiston xalqi chuqur qayg`uda. Kuni kecha biz hammamiz uchun qadrli va e`zozli bo`lgan, xalqimizning cheksiz mehr-muhabbatini qozongan buyuk inson, mustaqil mamlakatimizning birinchi prezidenti Islom Abdug`anievich Karimov bilan vidolashdik. Mana shu qayg`uli kunlar davomida yurtboshimiz butun O`zbekiston ahlining eng sevimli insoniga, rahnamosiga aylanganini yurakdan his etmoqdamiz. Xalqimizning birdamligiga, bizni tanlagan yo`limizdan hech kim hech qachon qaytara olmasligiga yana bir bor amin bo`ldik.
Shu bilan birga Islom Abdug`anievich nafaqat bizning mamlakatimizda, balki butun dunyo hamjamiyatida tinchlik, barqarorlik, farovonlik va taraqqiyot timsoli sifatida o`chmas iz qoldirganligiga guvoh bo`ldik. Muhtaram prezidentimiz o`tgan 25 yil mobaynida milliy parlamentimiz rivoji, uning faoliyatini takomillashtirish, samaradorligini oshirish borasidagi masalalarni ham o`z nazarlaridan chetda qoldirmadilar. Islom Abdug`anievich o`zining matonati, jasorati, sadoqati bilan O`zbekistonni istiqlol yo`liga olib chiqdi va xalqining, Vatanining barqarorligi, osoyishtaligi va farovonligi uchun butun hayotini, o`z jonini ayamadi.
Aziz do`stlar! Qadrdon prezidentimizning o`chmas xotirasini yod etib, bir daqiqa sukut saqlashinglarni so`raymiz. Rahmat.
Qadrli deputatlar, senatorlar va qo`shma majlis ishtirokchilari. Kecha O`zbekiston Respublikasi Oliy Majlisi Qonunchilik palatasi Kengashi va Senati Kengashining qo`shma majlisi bo`lib o`tdi. Majlisda O`zbekiston Respublikasi prezidentining vazifa va vakolatlarini vaqtincha yuklatish to`g`risidagi masala ko`rib chiqilib, Oliy Majlis palatalari Kengashlarining qarori qabul qilindi. Shu asosda bugungi qo`shma majlisning kun tartibi loyihasi belgilab olindi. Kun tartibiga O`zbekiston Respublikasi prezidentining vazifa va vakolatlarini vaqtincha yuklatish to`g`risidagi masala kiritilgan.
Kun tartibi loyihasi bo`yicha Oliy Majlis Senatining raisi Nig`matilla To`lqinovich Yo`ldoshev so`z so`rayaptilar. Marhamat, so`z Nig`matilla To`lqinovichga.
Nig`matilla Yo`ldoshev: Qadrli deputatlar, Senat a`zolari va majlis qatnashchilari. O`zbekiston Respublikasining birinchi prezidenti Islom Abdug`anievich Karimovning bevaqt vafoti butun xalqimiz, qolaversa, jahon jamoatchiligi uchun katta yo`qotish bo`ldi. Shak-shubhasiz, mamlakatimizning mustaqillikka erishgani, tarixan qisqa muddatda shiddat bilan rivojlanayotgan davlatga aylangani buyuk tarixiy shaxs, qat`iyat va shijoat sohibi Islom Karimov nomi bilan chambarchas bog`liqdir. Zotan butun dunyoda o`zbek modeli sifatida tan olingan taraqqiyot strategiyasiga ega yangi davlat va jamiyat shaxsan prezidentimiz rahnamoligida barpo etildi. Bosqichma-bosqich, tadrijiy yo`l bilan amalga oshirilgan islohotlar natijasida barcha sohalarda mamlakatimiz ulkan yutuqlarni qo`lga kiritdi. O`zbekiston tanlagan rivojlanish yo`lining muqobili yo`qligini, uning to`g`ri va hayotiy ekanligini davrning o`zi tasdiqlab berdi. Bu haqiqatni dunyo ham tan oldi. Butun xalqimiz tomonidan prezidentimiz vafoti munosabati bilan bildirilgan ta`ziya izhorlari va qilingan samimiy duolar ushbu yo`lning naqadar oqilona ekanligini takror va takror isbotladi.
Motam kunlarida fuqarolarimiz ko`zlaridan oqqan yoshlar 32 millionli xalqning o`z rahnamosiga bo`lgan cheksiz mehr-muhabbati ifodasidir. Bunday ehtirom buyuk davlat arbobi rahbarligida olib borilgan xalqparvar, odil va oqil siyosatning e`tirofi, timsoli ham desak aslo xato qilmaymiz. O`z navbatida, aynan shunday siyosat eng buyuk maqsadlar sari xalq va davlatni jipslashtirgani yana bir karra ayon bo`ldi. Xalq va davlatning bunday birdamligi birinchi prezidentimiz butun umrini, jonini baxshida qilgan g`oyalar albatta ro`yobga chiqishining va ezgu ishlar davom etishining muhim garovidir. Bugun bizning oldimizda turgan ustuvor vazifamiz, ta`bir joiz bo`lsa, muqaddas burchimiz, avvalo, mamlakatda hukm surayotgan tinchlik-osoyishtalik hamda taraqqiyotning bardavomligini ta`minlashdan iborat. Ishonchimiz komilki, xalqimizning mehnati, aqlu zakovati va qat`iy irodasi bilan oliy maqsadlarimizni albatta ro`yobga chiqarishga erishamiz.
Hurmatli parlament a`zolari. Konstitusiyamizning 96-moddasiga muvofiq, O`zbekiston Respublikasining amaldagi prezidenti o`z vazifalarini bajara olmaydigan holatlarda uning vazifa va vakolatlari vaqtincha Oliy Majlis Senati raisining zimmasiga yuklatiladi. Bunda uch oy muddat ichida «O`zbekiston Respublikasi prezidenti saylovi to`g`risida»gi qonunga muvofiq prezident saylovi o`tkaziladi. Biroq, shunga e`tiboringizni qaratmoqchimanki, prezident vazifalarini yuklatish to`g`risida qaror qabul qilish jiddiy mas`uliyatni talab etadi. U rasmiyatchilik emas, balki har tomonlama puxta o`ylangan to`laqonli siyosiy yondashuvni talab etadi. Ayniqsa, bugungi o`ta murakkab xalqaro sharoitda davlatimiz, jamiyatimiz oldidagi vazifalar ko`lamini inobatga olishimiz lozim. Eng asosiysi, O`zbekiston Respublikasi Konstitusiyasining 93-moddasiga muvofiq, prezident vazifalarini bajaruvchi shaxs respublika suvereniteti, xavfsizligi va hududiy yaxlitligini muhofaza etish, oliy hokimiyat va boshqaruv organlarining bahamjihat ishlashini ta`minlash, mamlakat ichkarisida va xalqaro munosabatlarda O`zbekiston Respublikasi nomidan ish ko`rish, O`zbekiston Respublikasi Qurolli Kuchlarining Oliy bosh qo`mondoni sifatida qator jiddiy masalalarni hal etish hamda Konstitusiyamiz va qonunlarimizda nazarda tutilgan boshqa o`ta mas`uliyatli vazifalarni bajarish uchun etarli bilim va amaliy tajribaga ega bo`lishi zarur.
Men mehnat faoliyatim davomida asosan prokuratura va adliya organlarida ishlaganman, biroq davlat hokimiyati va boshqaruvining boshqa idoralaridagi rahbarlik lavozimlarida etarli tajribaga ega emasman. Bir yarim yil mobaynida Senat raisi lavozimida orttirgan tajribam mamlakatning siyosiy, ijtimoiy va iqtisodiy rivojlanishiga, jamoat xavfsizligini ta`minlashga doir muhim masalalarni hal etish uchun etarli emas deb o`ylayman. Yuqoridagilarga asosan va O`zbekiston Respublikasi prezidentining vazifalarini vaqtincha bajarib turish qanchalik katta mas`uliyat ekanligini to`liq va chuqur anglagan holda, sizlardan bu vazifa va vakolatlarni bajarishni menga yuklamasliklaringizni iltimos qilaman.
Sizlarga yaxshi ma`lumki, O`zbekiston Respublikasining bosh vaziri Shavkat Miromonovich Mirziyoev mustaqillik yillarida barcha sohalarda amalga oshirilgan islohotlar jarayonida birinchi prezidentimizga elkadosh bo`ldi. Shavkat Miromonovich 1992—2003 yillarda Toshkent shahri Mirzo Ulug`bek tumani, Jizzax va Samarqand viloyatlari hokimi lavozimlarida, 2003 yildan buyon esa O`zbekiston Respublikasi bosh vaziri lavozimida faoliyat yuritib, katta mahorat maktabini o`tadi. O`tgan yillarda mamlakatimizda amalga oshirilgan yirik tadbirlar, dasturlar va boshqa loyihalarning ro`yobga chiqarilishida bevosita rahbarlik qilgan va hamda o`zini mohir tashkilotchi sifatida namoyon etgan Shavkat Miromonovich butun xalqimiz o`rtasida samimiy hurmat qozondi. Shuningdek, u xorijiy davlatlar hukumat rahbarlari orasida ham katta obro`ga ega. Binobarin, prezidentning vazifa va vakolatlarini vaqtincha bajarishga Shavkat Miromonovich har tomonlama munosib, deb hisoblayman.
Hurmatli deputatlar va senatorlar! Yuqoridagilarni inobatga olib, O`zbekiston Respublikasi prezidentining vazifa va vakolatlarini O`zbekiston Respublikasining bosh vaziri Shavkat Miromonovich Mirziyoev zimmasiga vaqtincha yuklash to`g`risidagi taklifimni qo`llab-quvvatlashingizni so`rayman. Mening mazkur taklifim Senat Kengashining bugun bo`lib o`tgan majlisida ko`rib chiqildi va uni qo`llab-quvvatlash to`g`risida alohida qaror ham qabul qilindi. Ushbu qarorning sizlar tomoningizdan ham e`tiborga olinishi yurtimiz ravnaqi, Vatanimiz taraqqiyoti hamda xalqimiz farovonligiga xizmat qilishiga ishonaman.
Kun tartibidagi masala bo`yicha, shuningdek,
so`zga chiqib, hozirgi sharoitda barqarorlikni saqlash, jamoat xavfsizligi va huquq-tartibotni ta`minlash, mamlakatni rivojlantirishning eng muhim siyosiy va ijtimoiy-iqtisodiy masalalarini samarali hal etish zarurligini e`tiborga olib, Oliy Majlis Senati raisi Nig`matilla Yo`ldoshevning taklifini qo`llab-quvvatladilar.
Rustam Azimov: Hurmatli rais, hurmatli Senat a`zolari, hurmatli deputatlar. Bugun og`ir kunlarda turibmiz. Kuni kecha muhtaram yurtboshimizdan judo bo`ldik va butun xalqimizga juda katta, og`ir musibat keltirdi. Albatta, Islom Abdug`anievich to`g`risida ko`p gapirildi va hali ko`p gapiramiz. Bu inson O`zbekistonni eng og`ir davrida boshqarib, O`zbekistonni eng xonavayron bo`lgan respublikadan rivojlangan, tinch-totuv, barqaror, xalqi baxtli hayot kechiradigan davlatga aylantirdilar.
Lekin afsuski bugun Islom Abdug`anievich bizni tark etdilar va hozir butun xalqimiz, 32 million qayg`urgan xalqimiz katta savol beryapti — nima bo`ladi ertaga? Davlatimiz qaerga boradi? Muhtaram prezidentimiz yaratgan zaminni davomi qanday bo`ladi, degan savolga shu kunlarda, avvalambor, senatorlar, deputatlar, hukumat a`zolari — javob topishimiz kerak.
Shu nuqtai nazardan qaraganda bugun Senatimiz raisi Nig`matilla To`lqinovich Yo`ldoshevning hamda Senat Kengashining taklifini, o`ylaymanki, davlatchiligimizning rivojlanishi, eng yuqori pog`onaga chiqishining dalolati bo`ladi. Chunki ular nafaqat rasmiy nuqtai nazardan, balki chuqur anglagan tarzda, hozirgi og`ir, tahlikali davrda 32 millionli xalqning taqdirini o`ylagan tarzda shu taklif bilan chiqishdi. Va, o`ylaymizki, hammamiz shu taklif bilan chiqishgani uchun, avvalambor, Senat a`zolariga, Yo`ldoshev Nig`matilla akaga minnatdorchiligimizni bildirishimiz kerak.
Hozir taklif bo`ldiki, Shavkat Miromonovich Mirziyoevning zimmalariga O`zbekiston davlatining prezidentlik vakolatini hamda vazifalarini yuklatish. O`ylaymanki, hozirgi davrda bu eng muhim va yakka-yu yagona to`g`ri taklif bo`ladi va buni mendan oldin so`zga chiqqanlar to`liq tasdiqlab berdi. Shavkat Miromonovichning ko`p fazilatlari bor, ko`p hislatlari bor. Lekin ko`p fazilatlarining ichida birinchisi nima deb so`rasangiz, men o`ylaymanki, birinchi fazilatlari – Vatanni sevish fazilati.
Davlatning rahbari har bir masalani – bizga buni yurtboshimiz Islom Abdug`anievich o`rgatganlar – tagiga etib, keyin aniq qaror berish juda muhim va shu nuqtai nazardan Shavkat Miromonovichni, mana, ko`p odamlar so`zga chiqdi, qishloq xo`jaligi bo`ladimi, fan bo`ladimi, sanoat bo`ladimi, ta`lim tizimi, tibbiyot tizimi, har bir sohaning ichiga, tagiga etib, uni chuqur bilib, anglab o`zlarining yondashuvlarini belgilab, keyin qaror beradilar.
Uchinchisi, bu ishchanlik. Hukumat a`zosi sifatida aytishim mumkin, kechasi soat 2:00 da ham telefon qiladilar, topshiriqlar berib. Ertalab biz ishga kelganda, savollar bo`ladi, «ulab beringlar» deb so`raganimizda, «yo`q» deyishadi — ertalab soat 6:00 dan selektor o`tkazyaptilar. Kechasi 2:00 da topshiriq, ertalab soat 6:00 dan qishloq xo`jaligi yoki boshqa masalalar bo`yicha selektor o`tkazadilar. Bunaqangi ishchanlikni nafaqat bizning davlatimizda, balki dunyoda ham kamdan-kam ko`rish mumkin.
Va eng muhimi, men o`ylaymanki, har bitta qarorlarida Shavkat Miromonovich birinchi galda oddiy odamlarning manfaatlarini o`ylaydilar. Oddiy odamlarning manfaati qay darajada bajarilyapti? Qog`ozda emas, chiroyli shiorlarda emas, amalda. Aytmoqchimanki, Shavkat Miromonovich yurtboshimizning haqiqiy, sodiq shogirdi bo`lganlar va bo`lib qolyaptilar. Shavkat Miromonovich yurtboshimizning siyosiy farzandi deb aytsak, menimcha, to`g`ri bo`ladi. Shavkat Miromonovich yurtboshimizning siyosiy merosxo`ri deb aytsak ham, to`g`ri bo`ladi.
Shuning uchun men hukumat vakili sifatida, ijro hokimiyati vakili sifatida hurmatli senatorlarni va deputatlarni Shavkat Miromonovich Mirziyoev zimmalariga O`zbekiston Respublikasi prezidenti vazifasi va vakolatlarini yuklatishga da`vat qilaman va shu uchun sizlarni ovoz berishga iltimos qilaman. Rahmat.
Majlisda O`zbekiston Respublikasi bosh vaziri Shavkat Mirziyoev so`zga chiqdi.
Shavkat Mirziyoev: Hurmatli spiker, hurmatli Senat raisi, muhtaram deputatlar va senatorlar, qadrli qo`shma majlis ishtirokchilari. Shu kunlarda barchamiz birgalikda yuragimizda chuqur dard bilan, o`rnini to`ldirib bo`lmaydigan og`ir judolikni boshimizdan kechirmoqdamiz. Nuroniy oqsoqollarimiz, mo``tabar onalarimiz va opa-singillarimiz, yosh yigit va qizlarimiz, 32 millionli butun O`zbekiston xalqi, xorijiy mamlakatlardagi ko`psonli do`stlarimiz buyuk davlat va siyosat arbobi, mamlakatimizning birinchi prezidenti Islom Abdug`anievich Karimovni cheksiz qayg`u bilan so`nggi yo`lga kuzatdilar.
Shu fursatdan foydalanib, aziz Islom Abdug`anievichning rafiqalari — hurmatli Tatyana Akbarovnaga, aziz singlimiz Lola Islomovna va yaqinlariga barchamizning nomimizdan yana bir bor chuqur ta`ziya bildirishga ruxsat bergaysiz.
Vaqt va hayotning o`zi Islom Abdug`anievich Karimovning zamonamizning ulug` siyosatchisi, uzoqni ko`radigan va strategik fikr yuritadigan shaxs, dunyoda va turli mintaqalarda yuz berayotgan o`ta murakkab voqea-hodisalarning mohiyatini davlatchilik nuqtai nazaridan ko`ra bilish qobiliyatiga ega bo`lgan, o`z yurti va xalqi uchun, har bir Vatandoshimizning taqdiri uchun ulkan mas`uliyat tuyg`usini chuqur his qiladigan atoqli rahbar ekanligini har tomonlama tasdiqladi.
Milliy tariximizning eng keskin va tahlikali davrida, millatlararo to`qnashuvlar va boshqa ziddiyatlar avj olgan, mamlakatimizda fuqarolar urushi xavfi yuzaga kelgan, iqtisodiyot chuqur inqirozga uchragan, bir so`z bilan aytganda, eski zamonning umri tugab, yangi zamon boshlanayotgan bir paytda Islom Abdug`anievichning respublika rahbari etib saylanishi Yaratganning xalqimizga bebaho marhamati bo`lgan edi.
Islom Abdug`anievichga xos bo`lgan bukilmas iroda — hech qachon bukilmaganlar, fidoyilik, mardlik va vatanparvarlik, insoniylik va adolatparvarlik, samimiylik va mehribonlik kabi olijanob fazilatlar barchamiz uchun yorqin ibrat namunasi bo`lib qoldi.
Zamonaviy O`zbekistonning tarixi — bu mamlakatimizning haqiqiy mustaqillikka erishish yo`lida Islom Abdug`anievich Karimov rahnamoligida olib borilgan o`ta murakkab va og`ir kurashlar tarixidir. 25 yillik tariximiz. Agar ko`z oldimizga keltirsak — mingdan ming rahmat, shaxsan men haqimda gapirganlaringiz uchun o`z minnatdorchiligimni bildiraman — mana shu zalda, oldingi Oliy Majlis zallarida, qanday-qanday kurashlar bo`lardi, qanday-qanday fikrlar bo`lardi. Lekin o`sha paytlarda ham, o`zim guvohman, mana shu kurashlar zamini bir narsa ediki — jonajon Vatanimizning, xalqimizning ertangi kuni va birinchi kundan O`zbekiston kelajagi buyuk davlat deganlarini, o`sha buyuklikka har kuni 24 soat ishontirish, inontirish, xalqimizni ham, dunyoni ham shunga ishontirdilar. Mana shu ishonch, haqiqatan ham, hammamizga g`urur, iftixor bo`lib, mana shungacha kelib, yashab, mana shuni tushuntirdilar va hamma buni tan oldi.
Buyuk yo`lboshchimiz haqli ravishda demokratik talablar va xalqaro mezonlarga to`liq javob beradigan O`zbekiston Respublikasi Konstitusiyasining ham asosiy muallifi edilar. Men ham mana shu Konstitusiyani tayyorlash guruhi a`zosi edim. Juda katta kurashlar, ko`p-ko`p o`yinlar bo`lgan. Agar qattiq turib qilmaganlarida, bugungi 25 yillik, bunday tarix, bunday tizim, bunday intizom, bunday e`tirof, dunyo e`tirof qilmas edi. Hozirgidek esimda, SK (O`zbekiston Kommunistik partiyasi Markaziy qo`mitasi) binosida o`z qo`llari bilan yozib, 24 varaqni olib kelib bersangiz, 26 varaq qilib, o`z qo`llari bilan yozib kelardilar. Bir marta emas, ikki marta emas, o`n martalab Konstitusiyaviy komissiya a`zolari bilan uchrashib, shularga ishontirgan. U paytda o`tirganlarning 80 foizi shu Konstitusiyaga ishonmas edi, kechirasizlaru, ertangi kunimizga ham ishonmas edi.
Mamlakatimiz totalitar tizimdan voz kechib, mustaqil taraqqiyot yo`lini tanladi, ko`plab qiyinchilik va sinovlardan o`tib, tarixan qisqa davrda jahon hamjamiyatida o`ziga munosib o`rin egalladi.
Konstitusiya va uning negizida yaratilgan puxta qonunlar, shuningdek, Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi hokimiyat institutlarini shakllantirishni va ularning to`laqonli faoliyat ko`rsatishini, fuqarolarning huquq va erkinliklarini himoya qilish, mulkchilikning barcha turlarini, fuqarolarning davlat boshqaruvidagi faol ishtirokini ta`minladi.
Islom Abdug`anievich «Iqtisodiy mustaqillikka erishmasdan siyosiy mustaqillikni ta`minlab bo`lmaydi» degan tamoyil va eng muhim ustuvor vazifani amalga oshirishni strategik masala deb hisoblar edilar.
Davlatimiz rahbari tomonidan ishlab chiqilgan iqtisodiy dasturlarning amalga oshirilishi mamlakatimizning izchil va barqaror rivojlanishini ta`minladi.
Mustaqillik yillarida O`zbekiston iqtisodiyoti qariyb 6 marta o`sdi. Unda sanoatning ulushi 14 foizdan 34 foizga oshdi. Oxirgi 11 yil davomida yalpi ichki mahsulotning o`rtacha yillik o`sish sur`ati 8 foizdan kam bo`lmagan darajada saqlanmoqda. Faol investisiya siyosati amalga oshirilmoqda.
Mutlaqo yangi, yuqori texnologiyalarga asoslangan sanoat tarmoqlari, xususan, neft-kimyo, kimyo, avtomobilsozlik sanoati, qishloq xo`jaligi va temir yo`l mashinasozligi, farmasevtika, elektrotexnika, to`qimachilik sanoati, zamonaviy qurilish materiallari ishlab chiqarish va boshqa sohalar izchil rivojlanmoqda.
Bugun O`zbekiston iqtisodiyoti jadal rivojlanayotgan dunyodagi beshta davlat qatoriga kiradi. Buning yaqqol isboti sifatida mamlakatimizda qurilgan va o`z ko`lami bo`yicha jahon miqyosida ham yirik va noyob hisoblangan sanoat ob`ektlari, xususan, Ustyurt va Sho`rtan gaz-kimyo komplekslari, Buxoro neftni qayta ishlash zavodi, Qo`ng`irot soda zavodi, Dehqonobod kaliy o`g`itlari zavodi, Andijon, Samarqand, Toshkent va Xorazm viloyatlaridagi avtomobilsozlik zavodlarini misol qilib keltirish mumkin.
Respublikamizda jadal sur`atlar bilan zamonaviy yo`l-transport va muhandislik-kommunikasiya infratuzilmasi tashkil qilinmoqda. Jumladan, Qamchiq dovonidan o`tadigan, noyob tog` tunnelini o`z ichiga olgan Angren—Pop temir yo`l tarmog`i, Toshguzar—Boysun—Qumqo`rg`on temir yo`li qurildi. Toshkentdan Samarqand, Qarshi va Buxoroga yo`lovchi tashiydigan yuqori tezlikdagi temir yo`l qatnovi ochildi. Xalqaro aeroportlar modernizasiya qilindi, Navoiy aeroporti negizida xalqaro logistika markazi tashkil qilindi va O`zbekiston milliy avtomagistrali barpo etildi.
Qishloq xo`jaligida tub tarkibiy islohotlar amalga oshirildi. Barchamiz yaxshi eslaymiz, yaqin o`tmishda O`zbekistonni paxta monopoliyasi hukmronlik qiladigan agrar bir mamlakat deb bilishar edi. Misol uchun, 1990 yilda aholining oziq-ovqat mahsulotlariga bo`lgan ehtiyoji, asosan, chetdan olib kelinadigan import hisobidan qondirilar edi.
Islom Abdug`anievich Karimovning tashabbusi bilan er va suv resurslaridan samarali va oqilona foydalanish, ekin maydonlarini optimallashtirish va yangi, ilg`or agrotexnologiyalarni joriy etish, qayta ishlaydigan zamonaviy korxonalarni tashkil etish bo`yicha keng chora-tadbirlar kompleksi ishlab chiqildi va amalga oshirildi. Haqiqiy mulkdorlarning yangi sinfi bo`lgan fermerlik harakati shakllantirildi.
Aholi jon boshiga asosiy oziq-ovqat mahsulotlarini o`rtacha iste`mol qilish darajasi ko`paydi: go`sht, sut va ulardan tayyorlangan mahsulotlar — 1,5 barobar, sabzavot — 2,6 barobar, meva — 6,3 barobar oshdi.
Mamlakatimizda xususiy mulkchilik va tadbirkorlik, kichik biznesni rivojlantirish uchun keng imkoniyatlar va qulay shart-sharoitlar yaratildi. Kichik biznes va xususiy tadbirkorlikning yalpi ichki mahsulotdagi ulushi 56,5 foizga etdi. Bu sohada ish bilan band aholining 78 foizi mehnat qilmoqda va ular mamlakatimizning gullab-yashnashi uchun munosib hissa qo`shmoqda.
Davlatimiz rahbari tomonidan ilgari surilgan «Islohot — islohot uchun emas, avvalo inson uchun» degan ezgu g`oyani amalga oshirish, ijtimoiy yo`naltirilgan bozor iqtisodiyotini shakllantirish bo`yicha ko`rilgan chora-tadbirlar aholining hayot darajasi va sifatini sezilarli darajada yaxshilashni ta`minladi.
Bugungi kunda Davlat byudjetining qariyb 60 foizi ijtimoiy sohani rivojlantirishga yo`naltirilmoqda. 1991 yilga taqqoslaganda, aholining real daromadlari 12 barobardan ziyod ko`paydi, ish haqi, pensiya va ijtimoiy nafaqalar salmoqli darajada oshdi. Iste`mol tovarlari ishlab chiqarishni jadal sur`atlar bilan oshirish va aholining ularga bo`lgan talabini qondirish ta`minlanmoqda.
Mamlakatimiz rahbari siyosiy, iqtisodiy va ijtimoiy jihatdan strategik ahamiyatga ega bo`lgan masalalarni echish bilan bir qatorda, jamiyatimiz hayotini, fuqarolarimizning ongu tafakkuri va dunyoqarashini tubdan o`zgartirishga qaratilgan ko`pqirrali vazifalarga doimo katta e`tibor qaratar edilar.
«Farzandlarimiz bizdan ko`ra kuchli, bilimli, dono va albatta baxtli bo`lishlari shart» degan chuqur ma`noli fikrlari hammamizning qalbimizda muhrlanib qolgan.
Yurtboshimiz mamlakatimizning bugungi va ertangi kunini hal qiluvchi kuch bo`lib maydonga chiqayotgan yoshlarimizning tafakkuri va dunyoqarashini keskin o`zgartirgan, mutlaqo yangi ta`lim va tarbiya tizimini yaratish va hayotga tatbiq qilish ishlariga bevosita mualliflik va rahbarlik qildilar.
Yurtimizda ilm-fan, sog`liqni saqlash, madaniyat va san`at, sport kabi muhim sohalar faol tarzda rivojlanmoqda.
Davlatimiz rahbari xalqimizning ma`naviy qadriyatlariga ehtirom bilan munosabatda bo`lish, muqaddas dinimiz, an`ana va urf-odatlarimiz, bebaho tarixiy merosimizni saqlab qolish va rivojlantirishni davlat siyosati darajasiga ko`tardi.
Fuqarolik jamiyati institutlarini shakllantirish, ayniqsa, davlat va jamiyat boshqaruvida mahallaning nufuzini oshirish, uning huquq va vakolatlarini kengaytirish borasida ulkan ishlarni amalga oshirdi.
Yurtboshimiz keksa avlod vakillariga, muhtaram faxriylarimizga hurmat-ehtirom va amaliy g`amxo`rlik ko`rsatishni o`ta muhim vazifa deb hisoblar edilar.
Oliy Bosh Qo`mondon sifatida Islom Abdug`anievich Karimov Qurolli Kuchlarimizni tubdan isloh qilish, jangovar qobiliyatini kuchaytirish va shu asosda O`zbekiston Respublikasining hududiy yaxlitligini va mustaqilligini himoyalash, sarhadlarining daxlsizligini, xalqimizning tinch va osuda hayotini ta`minlash uchun beqiyos xizmat ko`rsatdilar.
U kishining tashabbuslari bilan tinchlikparvarlik, boshqa davlatlarning ichki ishlariga aralashmaslik va yuzaga kelayotgan qarama-qarshilik va ziddiyatlarni faqat va faqat tinch, siyosiy yo`l bilan hal etishga asoslangan O`zbekiston Respublikasining tashqi siyosiy faoliyati konsepsiyasi ishlab chiqildi va amalga oshirilmoqda.
Hurmatli deputat va senatorlar!
Biz oxirgi 25 yil davomida juda ko`plab muhim anjuman va yig`ilishlarni o`tkazdik. Ularning barchasiga muhtaram Prezidentimiz Islom Abdug`anievich Karimov boshchilik qilganlaridan yaxshi xabardorsiz. Bugun esa tariximizda birinchi marta bunday muhim yig`ilishni aziz rahbarimizning ishtirokisiz o`tkazmoqdamiz. Go`yoki xayolimizda u kishi hozir zalga kirib keladigandek bo`lib turibdi. Hammamizning xayolimizda, men ham o`tirganimda xuddi muhtaram prezidentimiz bir narsadan kechikib, kirib kelayotgandek bo`lib turibdi. Hammamizning xayolimizda mana shu fikr desam, o`ylaymanki, to`g`ri qabul qilasizlar.
O`ylaymanki, bugungi majlisda qatnashayotgan har bir inson shu zalda buyuk yo`lboshchimizning ruhi va nafasini sezib turibdi. O`zbekiston Respublikasi birinchi prezidentining o`lmas g`oyalari, fikr, ko`rsatmalari bizning qalbimiz va ongimizga shunday chuqur singib ketganki, ular bizning kelajak sari qat`iyat bilan borishimizda barchamizga doimo tayanch va suyanch bo`lishi muqarrar.
Shu munosabat bilan, biz dunyodagi hozirgi murakkab va keskin sharoitni har tomonlama hisobga olgan holda, o`zimizning birinchi darajali vazifalarimizni birgalikda belgilab olishimiz darkor.
Bugun biz xalqimizni ishontirib, baland ovoz bilan aytishimiz zarurki, buyuk ustozimizning siyosiy merosi, ya`ni, u kishi belgilab bergan taraqqiyotimizning asosiy tamoyillari, ustuvor yo`nalishlar, maqsad va vazifalarni so`zsiz va to`liq amalga oshirish biz uchun ham qarz, ham farzdir.
Birinchidan, biz har doim Islom Abdug`anievich Karimovning chuqur ma`noli o`gitlarini, ayniqsa, «Bizga tinchlik va omonlik kerak!» degan so`zlarini hech qachon esdan chiqarmasligimiz lozim.
Turli xavf-xatarlar kuchayib borayotgan bugungi tahlikali vaziyatda bebaho boyligimiz bo`lgan tinchlik va osoyishtalikni ko`z qorachig`idek saqlashimiz, yurtimizdagi millatlar va dinlararo hamjihatlik, o`zaro hurmat va mehr-oqibat muhitini yanada mustahkamlashimiz kerak.
Shu bilan birga, jamiyatimizda qonun ustuvorligi, tartib-intizom, fuqarolarning huquq va erkinliklarini ta`minlashimiz zarur. Barchamizga ma`lumki, Islom Abdug`anievich Karimov «Odamlar hamma narsaga chidashi mumkin, lekin adolatsizlikka chiday olmaydi», deb ko`p-ko`p ta`kidlar edilar. Biz barpo etayotgan huquqiy davlatda adolatsizlikning hech qanday shaklda ustun bo`lishiga yo`l qo`ymasligimiz zarur. Bu hokimiyatning barcha tarmoqlari, eng avvalo, davlat boshqaruvi organlarining va ayniqsa huquqni muhofaza qilish organlarining birinchi darajali vazifasidir. Biz xalqimizning, bugungi zamonning ana shu muhim talabi so`zsiz bajarilishini ta`minlashimiz shart.
Ikkinchidan, davlatimiz xavfsizligini har tomonlama mustahkamlashimiz, har bir fuqaroning tinchligi va osoyishtaligini ta`minlashimiz lozim. Vaziyatni izdan chiqarish, nifoq solish, dushmanlik urug`ini sepish, turli mojarolarni keltirib chiqarish va hatto qon to`kilishini istayotgan kuchlar ham mavjudligi hech kimga sir emas. Hammamiz buni bilishimiz shart.
Ochiq tan olish kerak, biz notinch zamonda, notinch bir mintaqada yashamoqdamiz. Shu sababli Vatanimiz himoyasini ishonchli kafolatlayotgan, mudofaa qobiliyatimizni mustahkamlayotgan va davlat chegaralarimiz daxlsizligini ta`minlayotgan tizimli chora-tadbirlar kompleksini joriy etishni qat`iyat bilan davom ettirishimiz zarur. Zamon shuni hozir talab qilyapti.
Biz Qurolli Kuchlarimiz va huquq-tartibot organlarimizni bundan keyin ham har tomonlama mustahkamlab boramiz. Hech kimda zarracha ham shubha bo`lmasligi kerak — mamlakatimiz suvereniteti va mustaqilligiga xavf tug`diradigan ichki va tashqi kuchlarning har qanday harakatlariga, har qanday urinishlariga qat`iy va munosib zarba beriladi.
Bizning yana bir eng muhim ustuvor vazifamiz — Islom Abdug`anievich Karimov tomonidan ishlab chiqilgan «o`zbek modeli»ning asosi bo`lmish besh tamoyilni amalga oshirish asosida iqtisodiyotda tarkibiy o`zgarishlarni davom ettirish va uning raqobatdoshligini ta`minlashdan iborat.
Mamlakatimizning kelgusi rivoji, xalqimiz farovonligi, uning turmush darajasi va sifatini yuksaltirish aynan shu masalaga bog`liq.
Jahon iqtisodiyotida o`sish sur`atlari sekinlashib, eng muhim eksport tovarlarimizga tashqi talab kamayib, dunyo bozorida ularning narxi pasayib borayotgan sharoitda Islom Abdug`anievich Karimov tomonidan iqtisodiyotimizni isloh qilishni chuqurlashtirish bo`yicha belgilab berilgan ustuvor vazifalarni bajarishga qaratilgan ishlarimizni yanada kuchaytirishimiz kerak.
Shu bilan birga, Oliy Majlis palatalarining 2015 yil yanvar oyidagi qo`shma majlisida taklif etilgan Vazirlar Mahkamasining Harakat dasturini amalda bajarishni davom ettirish zarur. Bu borada iqtisodiy islohotlarni chuqurlashtirishni davom ettirish, xususiy mulkni rivojlantirishni jadallashtirish, davlatning iqtisodiyotdagi ulushini kamaytirish va tarkibiy o`zgartirishlarni jadallashtirishga qaratilgan ishlarni izchil amalga oshirish muhim ahamiyatga egadir.
Yuqorida aytilgan fikrlardan kelib chiqqan holda, asosiy diqqat-e`tiborni quyidagi ustuvor vazifalarga qaratish zarur, deb hisoblaymiz.
Birinchidan, makroiqtisodiy barqarorlikni yanada mustahkamlash va keyingi yillardagi iqtisodiy o`sish sur`atlarini saqlab qolish zarur. Milliy valyutamiz barqarorligini ta`minlash, bank tizimini mustahkamlash, mamlakatimizda va mahalliy darajada byudjet barqarorligini ta`minlash bo`yicha qo`shimcha kompleks chora-tadbirlarni amalga oshirish kerak.
Bunda chetdan qarz olish bo`yicha konservativ yondashuv siyosatini davom ettirish, davlatning tashqi qarzi haddan ziyod oshib ketishiga yo`l qo`ymaslik muhim ahamiyat kasb etadi. Bularning barchasi Islom Abdug`anievich Karimovning avvalo o`zimizning kuch va imkoniyatlarimizga tayanish zarurligi haqidagi uzoqni ko`zlagan strategiyasini davom ettirish bilan bog`liq.
Ikkinchidan, nodir va qimmatbaho metallarni chuqur qayta ishlash, oziq-ovqat va kimyo sanoatini rivojlantirish bo`yicha qabul qilingan dasturlarni amalga oshirishimiz zarur.
Uchinchidan, tashqi bozorlarda raqobat va beqarorlik kuchayib borayotgan sharoitda iqtisodiyotning real tarmoqlari bilan bir qatorda mamlakatimiz hududlarida ham raqobatdosh mahsulotlar ishlab chiqarishni ko`paytirish va eksport salohiyatini oshirish alohida ahamiyatga ega.
Ana shu maqsadda kichik biznes va xususiy tadbirkorlik sub`ektlari, shuningdek, fermer xo`jaliklarining eksportda ishtirok etishini yanada rag`batlantirish bo`yicha qo`shimcha kompleks chora-tadbirlarni amalga oshirish zarur. Bu iqtisodiy o`sish, tarmoqlar va hududlarni rivojlantirish, aholining mehnat bilan bandligini ta`minlash va moddiy farovonligini oshirishning asosiy lokomotivi bo`lishi kerak.
To`rtinchidan, Islom Abdug`anievich Karimovning xususiy tadbirkorlik va kichik biznes sub`ektlari manfaatlarini mustahkam himoya qilish to`g`risidagi talab va topshiriqlari ijrosini izchil davom ettirish darkor. Turli byurokratik to`siqlar va asossiz tekshiruvlarni bundan keyin ham qat`iyat bilan cheklash zarur.
Beshinchidan, eng muhim ijtimoiy-iqtisodiy vazifa — Oliy Majlis palatalari tomonidan tasdiqlangan Aholining mehnat bilan bandligini oshirish dasturini bajarishdan iborat. Yil oxiriga qadar bir milliondan ziyod yangi ish o`rinlarini tashkil etishimiz zarur. Kasb-hunar kollejlarining 480 ming nafar bitiruvchisini ishga joylashtirish masalasi alohida nazoratni talab qiladi.
Biz jamiyatning ijtimoiy tabaqalanish darajasini pasaytirish, mamlakatimizda o`ta boylar ham, o`ta kambag`allar ham bo`lmasligi bo`yicha Islom Abdug`anievich tomonidan belgilab berilgan siyosatni qat`iy davom ettiramiz.
Oltinchidan, xalqaro kommunikasiya tarmoqlariga ulangan zamonaviy yo`l-transport va muhandislik infratuzilmasini shakllantirish, shuningdek, milliy axborot-kommunikasiya tizimlarini rivojlantirish bo`yicha O`zbekiston Respublikasi prezidenti tomonidan puxta o`ylangan va ishlab chiqilgan strategiyani amalga oshirishni davom ettiramiz.
Bugungi sharoitda eng ilg`or axborot-kommunikasiya texnologiyalarini keng joriy etish ustuvor ahamiyat kasb etmoqda. Bu sohada qabul qilingan Milliy dasturga muvofiq, telekommunikasiya texnologiyalarini, aloqa tizimlari va infratuzilmasini yanada rivojlantirish, informasion tizimlar komplekslari va «Elektron hukumat» axborot bazasini shakllantirishimiz kerak.
Mamlakatimiz hududlarini kompleks rivojlantirish sohasidagi ishlarni davom ettirib, Qarshi, Shahrisabz, Toshkent, Termiz, Namangan va Urganch shaharlarini obodonlashtirish bo`yicha mamlakatimiz prezidenti tomonidan qabul qilingan qarorlarning amalda bajarilishini ta`minlash kerak.
Qishloq xo`jaligini yanada isloh qilish va rivojlantirish bo`yicha birinchi navbatdagi vazifa — ko`p tarmoqli fermerlikni rivojlantirish, har bir fermer xo`jaligining iqtisodiy samaradorligi va moliyaviy barqarorligini ta`minlashdir. Bu masalani biz mamlakatimiz oziq-ovqat xavfsizligini ta`minlashning garovi deb hisoblaymiz.
Islom Abdug`anievich Karimov tashabbuskori bo`lgan qishloqlarimiz qiyofasini tubdan o`zgartirish, qishloq aholisi uchun shahar darajasidagi turmush sharoitini ta`minlaydigan namunaviy uy-joylarni va tegishli infratuzilmani qurish bo`yicha dasturni faol davom ettiramiz.
Ta`lim va tarbiya, ilm-fan, sog`liqni saqlash, madaniyat va san`at, sportni rivojlantirish masalalari, yoshlarimizning chuqur bilimga ega bo`lishi, chet tillarini va zamonaviy axborot-kommunikasiya texnologiyalarini puxta egallashini ta`minlash doimiy ustuvor vazifamiz bo`lib qoladi.
Eng muhim yo`nalishlardan yana biri — jamiyatimizda demokratik jarayonlarni chuqurlashtirish, fuqarolik institutlari rivojlanishini qo`llab-quvatlash, siyosiy partiyalarning obro`-e`tibori va ta`sirini oshirish, saylovchilarning ovozi uchun raqobatni kuchaytirishdan iborat.
Hurmatli do`stlar! Biz bundan buyon ham barcha xorijiy mamlakatlar, jahon hamjamiyati bilan samarali hamkorligimizni davom ettiramiz. Bu borada O`zbekistonning xalqaro miqyosdagi obro`-e`tibori va pozisiyasini yanada kuchaytirish maqsadida O`zbekiston Respublikasining Tashqi siyosiy faoliyati konsepsiyasi faol amalga oshiriladi.
Hech qanday harbiy-siyosiy bloklarga qo`shilmaslik, boshqa davlatlarning harbiy bazalari va ob`ektlari O`zbekiston hududida joylashishiga, shuningdek, harbiy xizmatchilarimizning mamlakatimiz hududidan tashqarida bo`lishiga yo`l qo`ymaslik, ilgarigidek, davlatimizning qat`iy siyosiy pozisiyasi bo`lib qoladi.
Mamlakatimizning milliy manfaatlarini ta`minlashda muhim ahamiyatga ega bo`lgan Markaziy Osiyo mintaqasi O`zbekiston tashqi siyosiy faoliyatining asosiy ustuvor yo`nalishi hisoblanadi. Biz o`zimizning yaqin qo`shnilarimiz Turkmaniston, Qozog`iston, Tojikiston va Qirg`iziston bilan ochiq, do`stona va pragmatik siyosat olib borishga sodiq qolamiz.
Tashqi siyosatimizning ustuvor yo`nalishi bu — Mustaqil Davlatlar Hamdo`stligi mamlakatlari bilan aloqalarimizni mustahkamlashdan iborat. Birinchi navbatda, Rossiya Federasiyasi bilan Strategik sheriklik, Ittifoqchilik munosabatlari to`g`risidagi shartnomalar va boshqa muhim kelishuvlar asosida do`stona aloqalarni izchil rivojlantirish va kuchaytirish ikki mamlakat manfaatlariga javob beradi va mintaqada barqarorlik va xavfsizlikni mustahkamlashga xizmat qiladi.
Amerika Qo`shma Shtatlari bilan o`zaro manfaatli va konstruktiv hamkorlikni har tomonlama rivojlantirish bizning tashqi siyosatimizda ustuvor ahamiyatga ega bo`lib qoladi. O`zbekiston mintaqadagi yaqin qo`shnimiz hamda global va mintaqaviy muammolarni echishda muhim rol o`ynaydigan Xitoy Xalq Respublikasi bilan har tomonlama strategik hamkorlikni yanada mustahkamlashdan manfaatdordir.
Osiyo va Tinch okeani mintaqasida biz Yaponiya, Koreya Respublikasi va boshqa davlatlar bilan iqtisodiyot, investisiyalar, fan va texnologiyalar, ta`lim, sog`liqni saqlash va turizm sohalarida hamkorlik munosabatlarini yanada rivojlantirishga ustuvor darajada ahamiyat beramiz. O`zbekiston uchun Evropaning etakchi davlatlari, avvalambor Germaniya, Fransiya va Buyuk Britaniya, Markaziy va Sharqiy Evropa davlatlari bilan o`zaro manfaatli hamkorlikni rivojlantirish muhim ahamiyat kasb etadi.
Biz Hindiston, Pokiston va Janubiy Osiyoning boshqa davlatlari bilan siyosiy, savdo-iqtisodiy, transport-kommunikasiya va madaniy-gumanitar sohalarda hamkorlikni yanada rivojlantirish tarafdorimiz. O`zbekiston Afg`onistonga nisbatan an`anaviy ravishda yaqin qo`shnichilik va do`stona siyosat olib boradi. Biz Yaqin va O`rta Sharq davlatlari bilan o`zaro manfaatli va keng qirrali munosabatlarni rivojlantirish va mustahkamlashni davom ettiramiz.
Lotin Amerikasi va Karib mintaqasi, Afrika qit`asining etakchi davlatlari bilan aloqalarni kengaytirish va mustahkamlash O`zbekistonning milliy manfaatlariga javob beradi.
Birlashgan Millatlar Tashkiloti, Shanxay hamkorlik tashkiloti, Mustaqil Davlatlar Hamdo`stligi, Islom hamkorlik tashkiloti va boshqa xalqaro tashkilotlar bilan faol munosabatlar va hamkorlik olib borish O`zbekistonning milliy manfaatlariga xizmat qiladi.
Biz Jahon banki, Osiyo taraqqiyot banki, Islom taraqqiyot banki, Xalqaro valyuta jamg`armasi, boshqa xalqaro moliya va iqtisodiy tashkilotlar bilan davlatimiz iqtisodiyotida amalga oshirilayotgan tarkibiy islohotlarni qo`llab-quvvatlashga qaratilgan hamkorlikni yanada rivojlantiramiz.
Hurmatli qo`shma majlis ishtirokchilari!
Iqtisodiy va ijtimoiy islohotlarning ustuvor vazifalarini muvaffaqiyatli ado etish, birinchi navbatda, Oliy Majlis palatalari, Vazirlar Mahkamasi, barcha darajadagi hokimliklar, davlat va xo`jalik boshqaruv idoralari, butun xalqimizning O`zbekiston Respublikasining birinchi prezidenti g`oyalari atrofida jipslashib, bir yoqadan bosh chiqarib, hamjihatlik bilan bor kuch va imkoniyatlarini safarbar etishiga bog`liq ekanini hammamiz yaxshi tushunamiz.
Mana shu ezgu maqsad yo`lida — Vatanimiz mustaqilligini har tomonlama mustahkamlash, mamlakatimizning barqaror iqtisodiy va ijtimoiy rivojlanishini, xalqimiz farovonligini ta`minlashga qaratilgan ishlarimizda buyuk yurtboshimiz Islom Abdug`anievich Karimovning «Ona Vatanimiz va xalqimizga sadoqat bilan xizmat qilish — oliy saodatdir» degan so`zlari doimo bizga kuch-quvvat va g`ayrat bag`ishlaydi, deb ishonaman. E`tiboringiz uchun rahmat.
Majlisda Oliy Majlis Qonunchilik palatasi va Senati tomonidan O`zbekiston Respublikasi prezidentining vazifa va vakolatlarini bajarishni O`zbekiston Respublikasi bosh vaziri Shavkat Mirziyoev zimmasiga vaqtincha yuklash to`g`risidagi qo`shma qaror qabul qilindi. Shundan so`ng Shavkat Mirziyoev yana so`zga chiqdi.
Shavkat Mirziyoev: Muhtaram prezidentimiz aytgan hamma gaplarni amalga oshirish va eng katta narsa — hozir xalqimizni tinchlantirish. Xalqimiz bilishi kerakki, hamma narsa muhtaram prezidentimizning aytilgan, qilingan ishlari albatta davom ettiriladi.
Hurmatli Spiker, hurmatli Senat raisi, muhtaram deputat va senatorlar! Avvalo, menga bildirilgan yuksak ishonch uchun sizlarga o`zimning samimiy minnatdorchiligimni bildirishga ruxsat bergaysiz. O`zbekiston Respublikasi prezidenti sayloviga qadar bo`lgan muddatda mening zimmamga bugun nihoyatda murakkab va o`ta mas`uliyatli vazifa yuklanganini har tomonlama chuqur his qilib turibman.
O`zbekiston Respublikasining birinchi prezidenti, buyuk yo`lboshchimiz, qadrli Islom Abdug`anievich Karimov tomonidan ishlab chiqilgan va chorak asr mobaynida samarali amalga oshirib kelingan davlatimizning siyosiy, ijtimoiy va iqtisodiy sohalardagi hamda demokratik islohotlarni joriy etish borasidagi izchil mustaqil taraqqiyot yo`lini davom ettirishni shu davrda o`zimning eng asosiy vazifam deb bilaman.
Zamonamizning buyuk davlat va siyosat arbobi, uzoqni ko`ra biladigan rahbar, olijanob ma`naviy va axloqiy fazilatlar egasi bo`lgan bu ulug` inson men uchun yuksak ideal, o`z Vatani, o`z xalqiga fidokorona xizmat qilishning yorqin namunasidir.
Sizlarni ishontirib aytamanki, Islom Abdug`anievich Karimov bizga vasiyat qilib qoldirgan barcha hayotiy tamoyillarga og`ishmasdan, qat`iy amal qilaman. U kishining rahbar doimo odamlarning, el-yurtning dardu tashvishi bilan yashashi, ularning orzuniyatlarini ro`yobga chiqarish uchun huzur halovatdan voz kechib, o`zini ayamasdan mehnat qilishi kerak, degan dono o`gitlarini o`z faoliyatim uchun asosiy mezon va talab sifatida qabul qilaman.
Bu borada mamlakatimiz fuqarolarining huquq va erkinliklarini, O`zbekiston Respublikasining Konstitusiyasi va qonunlariga amal qilinishini ta`minlashni, O`zbekiston Respublikasining suvereniteti, xavfsizligi va hududiy yaxlitligini muhofaza etish yuzasidan zarur chora-tadbirlar ko`rishni, respublika oliy hokimiyat va boshqaruv organlarining hamkorlikda ishlashini ta`minlashni, yaqin va uzoq qo`shni davlatlar bilan o`zaro manfaatli hamkorlik aloqalarini rivojlantirishni eng asosiy vazifa deb hisoblayman.
O`zbekiston Respublikasining Qonunchilik palatasi va Senati a`zolari bilan, mamlakatimizda faoliyat olib borayotgan siyosiy partiyalar, fuqarolik institutlari bilan birgalikda, bir yoqadan bosh chiqarib ishlashni oldimizda turgan g`oyat muhim va ustuvor vazifalarni muvaffaqiyatli amalga oshirishning eng asosiy omili va garovi deb bilaman.
El-yurtimizning yuksak ishonchini oqlash, Vatanimiz mustaqilligini yanada mustahkamlash, mamlakatimizning barqaror taraqqiyotini ta`minlash yo`lidagi amaliy ishlar bilan aziz yurtboshimiz Islom Abdug`anievich Karimovning ruhi poklarini shod etish uchun bor bilim va tajribamni, salohiyat va kuch-g`ayratimni safarbar etaman.
Ishonamanki, ulug` yurtboshimizning bizga qoldirgan bebaho merosi, o`lmas g`oya va dasturlari yo`limizni nurafshon qilib, barchamizga doimo madadkor bo`ladi!
Majlisda O`zbekiston Respublikasi Markaziy saylov komissiyasiga O`zbekiston Respublikasi prezidenti to`g`risidagi qonunga muvofiq holda O`zbekiston Respublikasi prezidenti saylovi o`tkazilishini tashkil etish tavsiya qilindi. Shuning bilan O`zbekiston Respublikasi Oliy Majlisi palatalarining qo`shma majlisi o`z ishini yakunladi.
УЗ
