O`zbekistonda korrupsiyaga keskin zarba berish niyatida tuzilgan Korrupsiyaga qarshi kurashish agentligi vazirlik va idoralar bilan ketma-ket hamkorlik qilishni boshlabdi. Qudratli tashkilotlar bilan «Korrupsiyaga qarshi kurashishda o`zaro hamkorlik to`g`risida» Memorandum imzolab kelmoqda.
Shu o`rinda tushunarsiz bir savol tug`iladi. Korrupsiyaga qarshi kurashish agentligi korrupsiya nisbatan ko`proq ildiz otgan tashkilotlar bilan qanday memorandum imzolashi mumkin. Misol uchun Bojxona qo`mitasi bilan shartnoma imzolashning o`zi ne-ne maqsadda tuzilgan agentlikning obro`yini tushirib qo`ymasmikin?
Aslida har qanday tashkilotdan xohlagan hujjatini talab qilib olish huquqiga ega bo`lgan agentlik korrupsiya botqog`iga botgan tashkilotlar bilan hamkorlik qilishining o`zi kulgili xol emasmi?
Fikrlarimni noto`g`ri talqin qilishga yo`yishingiz ham mumkin. Ammo agentlik tashkilotlar bilan qancha hujjat imzolamasin, bari bir hech qaysi amaldor men korrupsiyaga qo`l urdim deb mardonavor chiqib kelmaydi. Aniqrog`i, hech bir amaldorni hech qanday hujjat NAFS changalidan chiqarib ololmaydi.
Korrupsiyaga qaqshatqich zarbalar berishi kerak bo`lgan agentlik iltimosnoma ko`tarib korrupsiyaning oldiga borib turishini qanday izohlash mumkin?
Aslida qamchisidan qon tomib turishi shart bo`lgan qudratli tashkilot kimlarningdir eshigining oldida sarg`ayib turishi davlatimizning kelajagiga ham ta`siri o`tkazmasdan qolmaydi.
Tarix va dunyo tajribasidan ma`lumki, korrupsiyaga qarshi kurashiladi. Korrupsiya bilan kelishilmaydi, hamkorlik borasida bitim tuzilmaydi.
Biz esa o`zimizga xos uslubdan hali ham ajrala olmayapmiz. Korrupsiyaga qarshi kurashish haftaligi, yoki oyligini o`tkazib baland parvoz va jozibador gaplarni gapiramiz.
Korrupsiyaga qarshi kurashish haftaligi yoki oyligini belgilash ham muammoga echim bo`la olmaydi. Tasavvur qiling, korrupsiyaga kurashish oyligi tugadi. Bu – “korrupsiyani yana davom ettiraversa bo`ladi” degani emasmi, mabodo. Qancha harakat qilmayin, bari bir boshqacha tushunib bo`lmayapti
Korrupsiyaga qarshi kurashish mavzusida o`tkaziladigan davra suhbatlari ham ko`zbo`yamachilik yoki hisobdorlikdan boshqa narsa emas. Biz chorak asr mobaynida shunday davra suhbatlari bilan o`zimizni o`zimiz aldab keldik. Endi esa stol atrofida gurung qilib o`tirmasdan poraxo`rlarga qarshi kurashadigan vaqt bo`ldi.
1996 yil tuzilgan Inson huquqlari bo`yicha O`zbekiston Milliy markazini yodga oling. Unga topshirilgan vakolat va mas`uliyatlar Korrupsiyaga qarshi kurashish agentligidan ham qudratli edi. Ammo bu markaz huquqi poymol bo`lgan oddiy xalqqa emas, aksincha, poymol qiluvchi amaldorlarga moslashib, ular manfaati yo`lida jiiimgina o`tirdi.
Aytmoqchi bo`lganim, Korrupsiyaga qarshi kurashish agentligi ikkinchi Inson huquqlari bo`yicha Milliy markaz, Akmal Burxonov esa ikkinchi Akmal Saidov bo`lib qolmasligi lozim. (Ularning ismi bir xil bo`lishi tasodifdir, ammo mas`uliyatli ishiga qarashlari o`xshash bo`lib qolmaydi degan umiddamiz.)
To`g`ri, tizimda ishlar ketyapti, korrupsionerlar qo`lga olinyapti. Ammo ularning jazolanishi ham sa-al o`xshamay turibdi, nazarimda. Ya`ni amaldorlar korrupsiyaga qo`l urgani uchun emas, aksincha korrupsiyani uddalay olmay qo`lga tushib qolgani uchun jazolanmoqda.
Chunki qonunlarimiz ham korrupsiyaning oldini olishga emas, “o`xshata olmaganlar”ni jazolashga moslashgan.
Sh.OTABOEV, jurnalist
УЗ
-middle.jpg)
