MUHOKAMA DAVOM ETMOQDA
Internet tarmoqlarida Toshkentning Sayilgoh ko`chasida joylashgan DXXning sobiq markaziy binosi tashqi ishlar vaziri Abdulaziz Komilovning o`g`li rahbarlik qilayotgan firmaga sotilgani haqida xabarlar jiddiy munozaralar markazida bo`lib turibdi.
Metropol Group kompaniyasi asoschisi Doniyor Kamilovning shaxsi va uning xaridi atrofidagi muhokamalar hamon to`xtagani yo`q.
Rost24.uz axborot sayti DXXning sobiq binosi O`zbekiston Respublikasi Vazirlar Mahkamasining 2019 yil 4 oktyabr sanasidagi 846-sonli qaroriga ko`ra, Davlat xavfsizlik xizmatiga tegishli bo`lgan “Markaziy bino” arxitektura yodgorligi sifatida ro`yxatga olingan hamda ushbu qarorda mazkur bino badiiy yoki o`zga madaniy qimmatliligi tufayli unga garov va ipoteka qo`llanilishi mumkin emasligi haqida yozgan edi. Keyinchalik mazkur jurnalistik surishtiruvga asosan O`zbekiston Respublikasi Madaniyat vazirligi huzuridagi Madaniy meros departamenti Ishchi guruh tuzib saytda ko`tarilgan mavzuni o`rganib chiqdi.
Madaniy meros departamentining ilmiy ekspertiza kengashi shunday xulosa chiqargan:
1. Buyuk Turon ko`chasida joylashgan 1950 yillarda barpo etilgan ma`muriy bino tarixiy va me`moriy jihatdan saqlanishga muvofiqdir va uni milliy moddiy-madaniy merosning ko`chmas mulk ob`ektlari milliy ro`yxatida qoldirish zarur.
2. Shu binoning qismi yon-atrofida joylashgan Knyaz Romanovning saroyi bilan bir yaxlit me`moriy turistik ob`ekt deb hisoblansin.
3. Majmuaning Sayilgoh va Matbuotchilar ko`chalarida joylashgan ma`muriy qismlari ham o`z qiymatiga egadir va ularni ham me`moriy tarixiy ob`ekt sifatida saqlanishi maqsadga muvofiqdir.
4. Inshootlar konstruktiv jihatdan ham murakkab ishlangan va uzoq muddat foydalanish mumkin.
Ob`ekt Moddiy-madaniy merosning ko`chmas mulk ob`ektlari milliy ro`yxatida qoldirish yuzasidan qaror qabul qilingan. O`zbekiston Respublikasi Vazirlar Mahkamasining 2019 yil 4 oktyabr sanasidagi 846-sonli qaroriga ko`ra, Davlat xavfsizlik xizmatiga tegishli bo`lgan “Markaziy bino” arxitektura yodgorligi sifatida ro`yxatga olingan hamda ushbu qarorda mazkur bino badiiy yoki o`zga madaniy qimmatliligi tufayli unga garov va ipoteka qo`llanilishi mumkin emas.
O`zbekiston qonunchiligiga ko`ra, davlatga tegishli bo`lgan moddiy madaniy merosni sotuvga qo`yish qonun bilan taqiqlangan.
“Madaniy meros ob`ektlarini muhofaza qilish va ulardan foydalanish to`g`risida”gi Qonunning 23-moddasiga ko`ra, davlat mulkida turgan moddiy madaniy meros ob`ektlari davlat tasarrufidan chiqarilishi va xususiylashtirilishi mumkin emas.
Departament qonunchilikka ko`ra, davlatga tegishli bo`lgan moddiy madaniy merosni sotuvga qo`yish qonun bilan taqiqlanganini eslatdi va aynan DXXning Sayilgoh ko`chasidagi sobiq markaziy binosini sotish noqonuniyligi bo`yicha rasmiy munosabat bildirdi. Ammo davlatning rasmiy idorasi tomonidan O`zbekiston qonunlariga ko`ra, sotilishi mumkin emas deb xulosa berilganiga qaramasdan, xalq mulki bo`lgan mazkur bino sotuvga qo`yildi va bugun davlat amaldorining farzandi mulkiga aylandi. Tegishli idoralar tomonidan na Rost24.uz saytida e`lon qilingan ma`lumotga va na Madaniyat vazirligi huzuridagi Madaniy meros departamenti xulosasiga nisbatan munosabat bildirildi.
Adliya vazirligi, O`zbekiston Respublikasi Bosh prokuraturasi, Davlat aktivlarini boshqarish agentligi, Korrupsiyaga qarshi kurashish agentligi yuqorida ko`rsatilgan qonun buzilishiga nisbatan hozircha jimgina turishibdi.
O`ylaymizki, mazkur masala yuzasidan jamoatchilik oldida o`zini mas`uliyatli deb bilgan mutasaddilarimiz, bu borada, albatta, o`z munosabatini bildirib, kerakli tushuntirishni beradilar.
УЗ
-middle.jpg)