Toshkent shahar Mirzo Ulug`bek tumanidagi “Tanzilandiya” nomli xususiy bog`cha tarbiyachilari bolalarga muntazam ravishda zo`ravonlik qo`llagan. Buni bolalarning ota-onalaridan biri farzandining xulqidagi o`zgarishdan payqab, uning o`yinchog`iga eshituv moslamasi o`rnatgani aytilmoqda. Natijada bolalarga o`ta qo`pol munosabatda bo`lishgani yuzaga chiqqan. Buni yozib olingan video tasvirlardan ham ko`rish mumkin.
Toshkent shahar IIBB xabariga ko`ra, holat yuzasidan dastlabki tergov harakatlari olib borilmoqda. Bolalarga tan jarohati etkazilganlik holati bo`yicha aniqlik kiritish uchun sud-ekspertiza tayinlangan. Zo`ravonlikda gumon qilingan 3 tarbiyachi esa ishdan bo`shatilgan.
Orginfo'dan olingan ma`lumotlarga ko`ra, Tanzilandiya xususiy maktabgacha ta`lim tashkiloti "Yuksalish construction" nodavlat ta`lim muassasasiga qarashli ekan. "Yuksalish construction"ning 7 foiz ulushi Tursunova Dilarabo Davlatboy qiziga, 27 foizi Karshieva Muxiba Isroilovnaga va asosiy 66 foiz ulush Kudbieva Maksuda Mutalipovnaga tegishli ekan. Ma`lumot uchun, Sherzod Qutbiev hozirda Soliq qo`mitasi raisi, 2019 yilda Prezident maslahatchisi, undan oldin esa Bandlik vaziri lavozimida ishlagan.
Yuqoridagi vaziyat Senatorni ham harakatga keltirib, Maktabgacha va maktab ta`limi vaziridan ushbu holat hamda shunga o`xshash bolalarga nisbatan so`nggi paytlarda ko`p sodir etilayotgan zo`ravonliklar sababini tushuntirishi va ularni oldini olish bo`yicha chora tadbirlar haqida ma`lumot berishini talab qildi. 2023 yil noyabrda senat raisi Bola huquqlari haqida gapirar ekan, yurtimizda bolalarni tazyiq va zo`ravonlikdan himoyalash borasida ishlar tobora jadal olib borilayotganini ta`kidlagan. 2024 yilga kelib esa tazyiq holatlari ortib borayotganini guvohi bo`lib turibmiz.
“Tanzilandiya” voqeasi bo`yicha ham 3 nafar xodimni ishdan olib, vaziyatga go`yo echim berildi. Bundan oldingi shu kabi holatlarda ham tekshiruvlar natijasiga ko`ra jarima yoki ishdan olish chorasi qo`llangan. Yoki tergovga qadar tekshiruv olib borilmoqda jumlasi bilan kifoyalangan. Ma`lumot uchun, Jinoyat kodeksining 110-moddasiga ko`ra, muttasil do`pposlash yoki boshqa harakatlar bilan qiynash jarimadan tashqari, axloq tuzatish ishlari, shuningdek, bir yildan uch yilgacha ozodlikdan mahrum qilish bilan jazolanadi.
Savol paydo bo`ladi, yuqoridagi holatda faqat tarbiyachilar aybdormi, kameralar bo`la turib ushbu tazyiqqa yo`l qo`ygan, bee`tibor bo`lgan rahbarlar suvdan quruq chiqaveradimi? Masalan, Jinoyat kodeksining 207-moddasiga ko`ra mansabga loqaydlik bilan qarash va uning oqibatida davlat yoki jamoat manfaatlariga ziyon etkazganlik uchun ham javobgarlikka tortilish kerakligi keltirib o`tilgan.
Albatta, javobgarlikni belgilash va qonuniy chora ko`rish ishlari bilan shug`ullanadigan tashkilotlar mavjud. Shunday ekan yuqoridagi holat bo`yicha tegishli qonuniy chora ko`rililib, katta mansabdor shaxsga tegishli, deya yopiq qozon holatida jim bo`lib ketmaydi degan umiddamiz. Rahbarlarning loqaydligi sabab boshqa qancha murg`ak bolalar ham kaltak ostida, qo`rquvdan holatini bildira olmay tazyiq ostida qolib ketayotgan bo`lishi mumkin, axir ular orasida aqalli hali fikrini to`liq bayon eta olmaydigan, qarshilik ko`rsata olmaydiganlari qanchadan qancha. Yoki endi barcha ota-onalar farzandlarining sog`lig`iga qayg`uradigan bo`lsa, o`yinchog`iga ovoz yozib olish moslamasi o`rnatib, keyin bog`chaga yuborishlari kerakmi?
УЗ
-middle.jpg)
-middle.jpg)
