O`zbekiston Prezidenti maslahatchisi Qahramon Quranboev Rossiya Davlat Dumasi vise-spikeri Vladislav Davankov bilan uchrashuvda, Rossiyada o`zbek diasporasi vakillari hisobidan respublikadan kelgan mehnat muhojirlari farzandlari uchun xususiy bog`chalar va maktablar ochishga yordam berishni so`radi.
«Sizdan Rossiya qonunchiligiga mos keladigan o`quv dasturlari bo`yicha [o`zbek] vatandoshlar hisobidan maktabgacha ta`lim muassasalari va xususiy maktablar ochish masalasini ko`rib chiqishingizni so`raymiz», — dedi Prezidenti maslahatchisi.
Quranboevning so`zlariga ko`ra, bu so`rov Rossiyada mehnat qilayotgan, qaramog`ida farzandlari bor o`zbekistonlik ishchilarning bolalarini bog`cha va maktablarga qamrab olishda muayyan qiyinchiliklarga duch kelayotgani bilan bog`liq.
Shuningdek, yig`ilishda Qahramon Quranboev Rossiyaga kelayotgan O`zbekiston yosh fuqarolari uchun migrasiya tartib-taomillarini soddalashtirish masalasini ham qonunchilik darajasida ko`rib chiqishni so`ragan.
Bundan tashqari, maslahatchi: «O`rta kasb-hunar ta`limini rivojlantirish va uni O`zbekistonda joriy etish bo`yicha Rossiya tajribasini o`rganishni maqsadga muvofiq deb hisoblaymiz», — deya qo`shimcha qilgan.
Ma`lumotlarga ko`ra, hozirda xorijda doimiy asosda mehnat qilayotgan O`zbekiston fuqarolari soni 2 million kishidan oshadi, ularning 60 foizdan ortig`i Rossiyada mehnat qilmoqda.
2022 yilning o`zida o`zbekistonlik mehnat muhojirlari vatanga 20 milliard dollarga yaqin pul o`tkazgan, o`tkazmalarning 80 foizdan ortig`i Rossiyadan o`tkazilgan.
УЗ
