Sherzod Shermatov AQShning O`zbekistondagi elchixonasining maxsus loyihasi yordami bilan O`zbekistondagi o`qituvchilarning ingliz tili bo`yicha malakasini oshirmoqchi.
Bugun, Toshkent shahridagi 295-maktabida Xalq ta`limi vaziri Sherzod Shermatov, AQShning O`zbekistondagi elchisi Deniel Rozenblyum O`zbekiston maktablari va oliy o`quv yurtlarida dars berish maqsadida O`zbekistonga tashrif buyurgan 27 nafar amerikalik ingliz tili o`qituvchi va olimlari bilan uchrashuv bo`lib o`tdi.
Vazir va AQSh davlatining O`zbekistondagi elchisi 295-maktabning ingliz tili darslarida ham qatnashdi. Deniel Rozenblyum ingliz tili darsiga kirib o`quvchilarga savollar bilan yuzlandi. U o`quvchilarga Alisher Navoiy haqida gapirib, uy kutubxonasida Navoiy Xamsasining «Farhod va Shirin» asarini ingliz tilidagi tarjimasini saqlashini va mutolaa qilib turishini aytdi.
AQSh elchisining rost24.uz sayti muxbiriga aytishicha ayni damda O`zbekistondagi ingliz tili o`qituvchilarini AQShda malaka olib qaytishiga imkon beruvchi loyiha mavjud. Ushbu loyiha doirasida yiliga 50 nafar o`qituvchilar AQShda ingliz tilini o`rgatish bo`yicha malaka oshirib qaytadi.
O`zbekistonda to`liq ingliz tilida dars o`tiluvchi maktab ochiladimi?
Sherzod Shermatovning rost24.uz axborot sayti muxbiriga aytishicha O`zbekistonga tashrif buyurgan 27 nafar ingliz tili o`qituvchilari 14 ta viloyatdagi malaka oshirish institutlariga borib o`qituvchilarga dars o`tadi.
«Ingliz tili o`qituvchilarining etishmovchiligi katta masala. Yanayam qiyini mavjud ingliz tili o`qituvchilarimizning bilim darajasi ham qoniqarli emas. To`liq ingliz tilida dars o`tuvchi maktab tashkil etishga erta ammo, STEAM darslarini ingliz tilida joriy qilishni rejalashtirganmiz. Asosan e`tiborni chekka hududlarga, viloyatlarga qaratmoqchimiz. Toshkentda malaka oshirish instituti va televidenie orqali ingliz tili o`rgatiladi», deydi Xalq ta`limi vaziri Sherzod Shermatov
O`qilmagan g`azal...
Tadbir doirasida AQSh elchisi Daniel Rozenblyum buyuk shoir va mutafakkir Alisher Navoiy tavalludining 580 yilligiga bag`ishlab tadbir ishtirokchilariga Navoiy g`azalidan parcha aytib berdi. Xalq ta`limi Sherzod Shermatovdan ham jurnalistlar Navoiy g`azalini o`qib berishni so`rashdi ammo, u bayt chellenjida qatnashganini aytib, g`azal o`qib berishdan bosh tortdi.
Rus tilimi yoki ingliz?
O`zbekiston Respublikasi Xalq ta`limi vazirligi, Rossiya Federasiyasi maorif vazirligi hamda Alisher Usmonovning «San`at, fan va sport» xayriya jamg`armasi hamkorlikda O`zbekiston Respublikasida rus tili va umumiy fanlarni rus tilida o`qitish sifatini oshirishga qaratilgan memorandumni imzolagan edi. Memorandumga ko`ra 32 nafar rus metodistlari mahalliy maktablar o`qituvchilari va o`quvchilari o`rtasida rus tilini bilish darajasini nazorat qilish uchun O`zbekistonga kelgan. Joriy yilning boshlarida O`zbekistonga yana 100 nafar rossiyalik mutaxassis keldi. Shuningdek, O`zbekistonga yo`naltirilgan mutaxassislar soni har yili 100 nafarga ko`payib boradi.
Inglizmi yoki rus tili? Qay birining geografiyasi va imkoniyatlari nisbatan keng? O`zbekiston maktablarida qaysi tilni o`rgatsak o`quvchilar oldida ko`proq eshiklar ochiladi? Vazir Sherzod Shermatovning aytishicha, ingliz tilini mukammal bilish farzandlarimiz kelajagining muvaffaqiyat garovidir.
УЗ
-middle.jpg)
