Oxirgi 15 yilda olingan kosmik suratlarni o`rgangan mutaxassislar Kaspiy dengizining shimoliy-sharqiy, Qozog`istonga tegishli qismining 7,1 foizi qurib bo`lganini aniqlagan.
Kaspiyning 8,1 ming kvadrat kilometr qismi qurigan. Yuqoridan olingan suratlarda dengizning o`rnida (Atirau shahri yaqini va Ural daryosi deltasida) ulkan yangi cho`l hosil bo`lganini ko`rish mumkin.
Avvalroq dengiz Turkmaniston qirg`oqlaridan ham juda tez chekinayotgani, mashhur Avaza kurortlaridan dengiz 100 metrgacha qochib ketgani aytilgan edi. Dengizning tarkibi bo`lgan Qorabo`g`ozko`l deyarli ajralib qolgan. Mutaxassislarning aytishicha, yaqin 20 yilda u to`liq qurib bitadi.
Kaspiyning qurib borayotgan qismi O`zbekistonga juda yaqin hudud bo`lib undagi qurish jarayoni O`zbekiston ekotizimiga ham ta`sir ko`rsatmasdan qolmaydi.
Nima sababdan Kaspiy dengizi qurimoqda?
Iqlimshunos, doktorant (PhD) Erkin Abdulaxatovning aytishicha, iqlimning isishi Kaspiy dengizida bug`lanishni kuchaytirib yuborgan. Dengiz suvi quyosh nurlari ta`sirida bug` ko`rinishiga kelib atmosferaga ko`tarilmoqda. Bundan tashqari, Kaspiyga quyiluvchi Ural va Volga daryolarining suv hajmi ham kamaygan. Bu yil ushbu daryolar manbai va unga yaqin hududlarda yog`ingarchilik kam bo`lgani hisobiga ham daryolarning dengizga quyiluvchi suv hajmi keskin qisqargan. Olimning qo`shimcha qilishicha, Kaspiyning qurish jarayoni iqlim isishiga mos ravishda davom etaveradi.
УЗ
