Markaziy Osiyodagi eng yirik zargarlik korxonasi sifatida qaralayotgan “Gold Moon Tashkent” mas`uliyati cheklangan jamiyatiga Toshkent shahar hokimligi egalik qilmoqda.
Davlat rahbarining 2019 yil 18 maydagi «O`zbekiston Respublikasida zargarlik tarmog`ini jadal rivojlantirish chora-tadbirlari to`g`risida»gi farmoni e`lon qilingach, hokimiyat zargarlik bilan shug`ullanishni o`z zimmasiga olgan ko`rinadi. Yurtimizda zargarlikning o`ziga xos yo`nalishlari, zargarlar oilalari, avlodlari shakllanib kelgan bir vaqtda zargarlik korxonasini xususiylashtirishga ishonilmagani tabiiydek, go`yo.
Ortiqcha shubhalarga o`rin yo`q. Biroq, ba`zi kamchiliklar Toshkent shahar hokimiyatining bu egaligiga soya solishi xunuk. Byudjet tashkiloti bo`lgan Toshkent shahar hokimiyatining zargarlik mahsulotlarini ishlab chiqarish bilan qo`shimcha daromad qilishi O`zbekiston qonunchiligiga zid.
Agar, qonunchilikka o`zgarish kiritish yoki qo`shimcha farmon bilan Toshkent shahar hokimligining ushbu faoliyatiga izn berilsa bu boshqa bir qator muammolarni keltirib chiqaradi.
Xususan:
Davlat tomonidan yirik mablag` (21 million AQSh dollari) bilan moliyalashtirilgan “Gold Moon Tashkent” MChJ korxonasi osongina mayda va yirik zargarlarga zarba berishi mumkin. Davlatning birgina tadbirkorlik sub`ektini alohida moliyalashtirishi qonunchilikka to`g`ri kelmaydi. Davlatning vazifasi barcha tadbirkorlar uchun teng imkoniyat yaratish. Davlat tomonidan birgina “Gold Moon Tashkent” MChJni moliyalashtirilishi sog`lom raqobatni sindiradi. Ushbu korxonaning viloyatlarda ham filiallari ochilsa, nafaqat Toshkent, balki viloyatlardagi zargarlar ham raqobatda yo`q bo`lib ketishi mumkin.
Mazkur korxona 2017 yili Prezident imzolagan hujjat bilan O`zbekiston Respublikasi Prezidenti va O`zbekiston Respublikasi hukumatining qarorlariga asosan davlat tasarrufidan chiqariladigan va xususiylashtiriladigan davlat mulki ob`ektlaridan biri sifatida ko`rsatilgan edi. Demak, korxona maxfiy strategik ob`ekt emas. Agar, shunday bo`lsa uni xususiylashtirish haqida qarorlar chiqarilmas edi.
Zargarlik bilan to`qilgan ssenariy "Fonon" zavodi va uning zamirida ochilgan “Gold Moon Tashkent” MChJning tashkil topish ildizlari detektiv kino ssenariylarini eslatib yuboradi.
Toshkent shahar hokimiyatga tegishli bo`lgan “Gold Moon Tashkent” MChJ korxonasi "Fonon" brendi ostida zargarlik buyumlarini ishlab chiqarishi aytilmoqda. Intellektual mulk qo`mitasi ma`lumotiga ko`ra, "Fonon" brendi Technology Development kompaniyasiga tegishli va uning 100 foiz ta`sischisi Dilmurod Rasulov. Ochiq ma`lumotlar bazasiga ko`ra, "Fonon" zavodi 100 foiz davlatga tegishli bo`lgan ommaviy mulk shakliga kiradi. Ammo ushbu brend nomi yuqorida aytilganidek, Technology Development kompaniyasining mulki. Shunda 100 foiz davlat tomonidan moliyalashtirilayotgan korxona foydasi "Fonon" brendi egasi Dilmurod Rasulov cho`ntagiga ham boradimi? Dilmurod Rasulov kompaniyasining elektron manzili esa negadir artelgroup domenida joylashgani yana nimalargadir ishora qilmayaptimi?..
Evropada barcha soliqlar, daromadlar Rimga eltgani uchun barcha yo`llar Rimga eltadi, degan ibora paydo bo`lgandi.
Toshkentda barcha daromadlar kechirasiz, yo`llar Artelgroupga eltayotgandek...
УЗ
