O`zbekiston yoshlari va aynan maktab o`quvchilari orasida tamaki vositalari qatoriga kiruvchi snyus, nosvoy va tinchlantiruvchi dori vositalarini qabul qilish holatlari ortmoqda. O`rganilgan ma`lumotlarga ko`ra, bugun 5-6-sinf o`quvchilari orasida ham snyus preparatlarini tatib ko`rgan bolalar topiladi. Millat genofondi salomatligi uchun «kurashyapmiz», deyotgan deputat va senatorlar esa hamon «Alkogol va tamaki mahsulotlarining tarqatilishi hamda iste`mol qilinishini cheklash to`g`risida» qonun loyihasini kuchga kiritayotganlari yo`q. Mazkur qonun Oliy Majlis qonunchilik palatasi deputatlari tomonidan senatga oshirildi, biroq yangi reklama to`g`risidagi qonunga zid modda tufayli loyiha ayni damda yana deputatlarga qaytarilgan. Ammo, tashqarida esa tamaki mahsulotlarining yoshlar orasidagi ommalashuv ko`rsatkichlari xavfli darajada ortmoqda.
Alkogol va tamaki bozorini tartibga solish hamda vinochilikni rivojlantirish agentligi matbuot kotibi Dilbarxon Siddiqova taqdim etgan ma`lumotda qayd etilishicha:
2021 yilda aynan yoshlarimiz orasida o`tkazilgan so`rovnoma natijalari shuni ko`rsatdiki, 13-15 yoshdagi maktab o`quvchilarining 1,7 foizi (qizlarning 0,9 foizi) nosvoy chekadi.
O`g`il bolalarning 10 nafaridan bir nafari, qiz bolalarning 20 nafaridan bir nafari nosvoy chekib ko`rgan.
Ichki ishlar Bosh boshqarmasining Huquqbuzarliklar profilaktikasi boshqarmasi ma`lumotiga ko`ra, ta`lim muassasalarida olib borilgan reydlarda maktab o`quvchilari orasida snyuslar topilishi holatlari yildan-yilga ortmoqda. Ya`ni 2019 yilda 110 ta holat, 2020 yilda 270 ta, 2021 yilning yanvar va fevral oylarida 59 ta holat (o`sish 3 martadan ko`p) aniqlangan. tadqiqotlarga ko`ra aynan snyus va tromodol kabi dori vositalari iste`moli ta`sirida bo`lgan yoshlar orasida jinoyatchilik soni ham ortib bormoqda.
2019 yilda mamlakatimizda o`tkazilgan so`rovda 18-69 yoshdagi erkaklarning 20 foizi, jumladan, har besh nafar erkakning biri, taassufki, ayollarning 0,4 foizi tutunsiz tamaki chekishi aniqlandi.
Qo`shni Respublikalarda elektron sigareta, snyus vositalarini taqiqlash, iste`molini cheklash bo`yicha allaqachon choralar ko`rilgan. Oliy Majlis qonunchilik palatasi deputatlari esa hamon qonun loyihasini qabul qilishda shoshilayotganlari yo`q. Mazkur mavzuda deputat va senatorlarni muhokamaga chorlash ham qiyin kechmoqda.
Ushbu ma`lumotlar «Ibn Sino jamoat fondi hamda Aholining sog`lom turmush tarzini qo`llab-quvvatlash va jismoniy faolligini oshirish markazi mutaxassislari ishtirokida Toshkent shahrida o`tkazilgan «Tamaki va qonun» mavzusiga bag`ishlangan matbuot anjumanida ma`lum qilindi.
УЗ
-middle.jpg)
