Toshkent shahrida tibbiyot xodimlariga nisbatan yana bir zo`rovonlik ro`y berdi. Yakkasaroy tumani Tez tibbiy yordam shifokori M.B va yordamchisi - felsher ayol I.J ayovsiz kaltaklandi.
Kecha tungi soat 22:00 lar atrofida Yakkasaroy tumani, Bobur ko`chasi, 87 uy, 19 xonadondan keksa kishining tobi qochgani ma`lum qilingan chaqiruv tushadi. Chaqiruv joyiga etib borgan “tez yordam” shifokorlari o`z vazifasini bajarib turgan vaqtida mazkur xonadon farzandi tomonidan tibbiyot xodimlariga nisbatan turli haqoratlar yog`iladi. Haqoratlar davomli bo`lib, zo`rovonlik yo`liga o`tadi va shifokorni ayovsiz kaltaklaydi. Hatto shifokor yonidagi felsher ayolni ham qattiq zarb bilan urib ketadi.
Ana shunday holatda ham chaqiruv manzilidagi bemorning ahvolini bilgan shifokorlar uni Respublika tez yordam shoshilinch markaziga etkazib olib kelishadi.
“Tez yordam” shifokorlarining o`zi ham og`ir tan jarohati bilan ayni damda shifoxonada yotibdi.
Afsuski, jamiyatimizda shifokorlarni kaltaklash tobora odat tusiga kirib bormoqda. Ijtimoiy tarmoqlar orqali shifokorlar kaltaklanishi haqidagi xabarlar tez-tez ko`zga tashlanmoqda. Ammo qachondir bunga echim topiladimi?..
Prezidentimiz 2020-yilgi murojaatnomasida bunday vaziyatlarga “Jamiyatimizda shifokorlarga nisbatan xunuk holatlar yuz bermoqda. Bu juda yomon holat. Shuning uchun shifokorlarning sharoitlarini yaxshilash, ularning o`rni va ahamiyatini kuchaytirish, shifokorlarga ko`proq imkoniyatlar yaratib berishimiz kerak", deya munosabat bildirgan edi. Biroq oradan ikki yil o`tsa ham ushbu soha vakillari to`qmoq ostida qolib kelmoqda.
Sog`liqni saqlash va Ichki ishlar vazirligi mutasaddilari bu holatni ham xolis o`rganib, xulosani beradilar degan umiddamiz.
УЗ
-middle.jpg)
