Samarqand sammiti faqatgina O`zbekistonning tarixiy obidalari reklamasi bilan yodda qolayotgani yo`q. ShHT Samarqand sammitiga Ortiqxo`jaevga tegishliligi aytilgan kompaniya suv etkazib bergan.
Shanxay hamkorlik tashkilotining Samarqandda o`tgan sammiti va sammit doirasidagi uchrashuvlarda Ortiqxo`jaevga tegishliligi aytiladigan kompaniya brendi suvlari yashirincha reklama bo`ldi. Bugungi ShHTning to`g`ridan-to`g`ri namoyishida har bir prezident stolida Murod Nazarov so`zlariga ko`ra Ortiqxo`jaevning qiziga tegishli bo`lgan “Ocard” mas`uliyati cheklangan jamiyati ishlab chiqargan Blanc blue suvlarini ko`rish mumkin edi.
ShHT sammiti uchrashuvlarida prezidentlar stoliga suv brendi teskari qaratib qo`yilgan edi. Shunga qaramay onlayn videolarda brend nomlari ko`ringan. Sammitdan keyingi Tashqi ishlar vaziri V. Norov bilan o`tkazilgan tadbirda esa, suv brendi nomi ochiqchasiga namoyish etib qo`yilgan.
Bir vaqtlar Kristiano Ronaldo ana shunday yashirincha reklamadan qochish uchun suvni o`z stolidan olib qo`ygan edi. Siyosiy arbob esa amaldor hamkasbiga tegishli brendni yashirishni eslamadi.
Tabiiyki ShHT sammitidan surat va video tarqatgan davlat ommaviy axborot vositalari ham suv brendini namoyish etdi. Rost24.uz saytida davlat telekanali va “Ocard” MChJ o`rtasida shartnoma bor yoki yo`qligi bo`yicha ma`lumot mavjud emas.
“Ocard” MChJ ning internet sahifasida brend bir nechta xalqaro sertifikatlarga ega ekanligi ochiq namoyish etilgan. Sertifikatlarning birida elektron manzil sifatida Ortiqxo`jaev asos solgan @artelelectronics.com ko`rsatilgan.
Shu bilan birga yirik tadbirkor Murod Nazarov o`z intervyularining birida “Ocard” suvining reklamasiga uning egasi ya`ni Ortiqxo`jaev qizining iltimosi bilan tushganligini bildirgan edi.
Davlat ahamiyatidagi xalqaro katta tadbirda ko`p miqdorda byudjet mablag`iga sotib olish ko`zlangan suv aynan davlat amaldoriga tegishli bo`lishi manfaatlar to`qnashuviga ko`z yumilganini ko`rsatmaydimi?
ShHT Samarqand sammiti tashkilotchilari jumladan Prezident administrasiyasi jamoasi bu kamchilikni bilmagan holda ko`zdan qochirganiga ishonish qiyin.
УЗ
