Toshkent shahar va Andijon viloyati hokimliklari Shavkat Mirziyoev farmoniga bo`ysunmaydimi?

Prezident farmoni talablarini bajarmagani uchun endi bu ikki hokimlikka chora ko`riladimi?

Yoki bu ham shunchaki navbatdagi odatiy ma`lumotlarmi… 

Toshkent shahar va Andijon viloyati hokimligi xalq oldida hisoblashishga majbur. Ammo ikki hokimlik jamoatchilik uchun taqdim etishi shart bo`lgan ma`lumotlarni ochiqlamay kelmoqda.

Prezidentmizning 2021 yil 16 iyundagi PF-6247-son farmonida mahalliy byudjetlarning har chorak yakunida shakllantiriladigan daromadlar va xarajatlar smetasi, rejadan orttirib bajarilgan qismi va mazkur mablag`lar yo`naltirilgan maqsadlar to`g`risidagi ma`lumotlar jamoatchilikka ochiq e`lon qilib borilishi majburiy etib belgilangan. Biroq, Toshkent shahar va Andijon viloyati hokimliklari mazkur farmonni mensimay kelmoqda.

Korrupsiyaga qarshi kurash agentligiga ko`ra, Andijon viloyat hokimligi rasmiy veb-saytida ochiqlanishi shart bo`lgan ma`lumotlar so`ngi bor 2021 yil I choragi holatiga joylashtirilgan, Toshkent shahar hokimligi tomonidan esa umuman ochiqlanmagan.

Shuningdek, farmonga ko`ra, Toshkent shahar hokimligi 2022 yilning 1 apreliga qadar o`z faoliyatiga oid hisobotni keng jamoatchilik ishtirokida muhokama qilish uchun matbuot anjumanlarini o`tkazishi lozim va mazkur matbuot anjumani haqida 1 – 10 mart sanalari oralig`ida keng jamoatchilikka ma`lum qilishi kerak edi. Ammo, farmonning ushbu talablari ham hokimlik tarafidan chetlab o`tilmoqda. Toshkent shahar hokimligi sayti va ijtimoiy tarmoqdagi sahifalarida muntazam ravishda axborotlar joylab boradi, biroq bu ochiqlik degani emas.

Shu bilan birga poytaxt hokimligi matbuot xizmatida ikki yildan buyon matbuot kotibi tayinlanmaydi. Bu junalistlarga ma`lumot olishda qiyinchilik tug`dirib, ochiqlikni ta`minlashga to`sqinlik qiladi. Axborot va ommaviy kommunikasiya agentligi tomonidan nima uchun Toshkent shahar hokimligiga matbuot kotibi tayinlanmagani bo`yicha izoh olaolmadik.

Toshkent shahar hokimligi muntazam ravishda axborotlar ulashib tursa-da, hokimlikning saytidan jamoatchilik uchun ochiqlanishi zarur bo`lgan moliyaviy axborotlarni topish mushkul. Tegishli tashkilotlarning mazkur vaziyatga ko`z yumayotganini qanday izohlash mumkin?