Президент Шавкат Мирзиёев Шайхонтоҳур туманига ташрифи давомида шаҳар ИИББ бошлиғи ҳамда шаҳар прокурори фаолиятини кескин танқид остига олди.
«Тошкентдаги жиноятчилик бўйича вазиятни мен айтмай, сизлар эшитманг. Жиноятчилар орасида «солиқчилар» пайдо бўлди ҳозир. Улар бозорлардан солиқ ундиришяпти, давлатдан алоҳида солиқ оладиган гуруҳлар пайдо бўлган. Мен ер тагида илон қимирласа биламан. Биз бундайларни дарҳол жиловлашимиз керак, жиловлаймиз ҳам», деди Президент.
Rost24.uz сайти ҳам 10 кун олдин айнан шу мавзуда танқидий мавзу тайёрлаган эди.
Унда пойтахтдаги замонавий бозорларимиз атрофи ёйма бозорларга тўлиб бораётгани, валюта айрибошлашдаги қора бозор йўқолгандан сўнг валюта бозоридаги катта даромад қилиб ўрганган хотинлар энди энг гавжум бозорларнинг атрофига эгалик қилишга ўтишгани, ҳаттоки, йўл атрофларини эгаллаб ижарага беришни ҳам бошлаб юбораётгани тилга олинган. Буларнинг ортида турганларга чора кўрилиши лозимлиги ҳам айтиб ўтилган эди.
Шавкат Мирзиёев танқидидан сўнг Rost24.uz ахборот сайти "Тошкент савдо маркази" маъмуриятидан муносабат сўради.
"Тошкент савдо маркази" маъмуриятининг билдиришича, бозорлар атрофидаги ёймачиларни тартибга солиш бўйича ўтказилаётган чора-тадбирларга томошабин бўлмасдан ўз ҳиссасини қўшаётган экан. Жумладан, янги қурилган "Тошкент савдо маркази"нинг пастки қаватидан 6 ойга текин туриш имтиёзи билан 600 га яқин жой ажратишган экан.
Шавкат Мирзиёев Тошкент шаҳар ИИББнинг фаолиятини бежизга танқид остига олмади. Бу тизим бугунги кунда жиноятчиликка қарши курашишни бироз сусайтирган десак ҳам хато қилмаган бўламиз. Чунки Ички ишлар ходимлари жиноятчилик бир четда қолиб муаммони кўтариб чиққан журналист ва блогерларнинг овозини ўчириш билан овора бўлиб қолмоқда. Бу борада айниқса, ҳоким ва прокурорларнинг топшириғини сидқидилдан бажариб келмоқда десак ҳам муболаға бўлмасов...
УЗ
