Ўзбекистон футбол ассоциацияси 2026 йилда Ўзбекистон учун тарихдаги илк жаҳон чемпионатида жамоани бошқарадиган бош мураббийни қидириб, бир неча таклифларни кўриб чиққани бўйича хабарлар тарқалди. Аммо улардан рад жавоби олгандан сўнг португалиялик мураббий Паулу Бенту вариантида тўхталган. Бироқ Record нашрининг хабар беришича, Паулу Бенту Ўзбекистоннинг бу таклифини рад этган.
Хабарга кўра, 56 ёшли мураббий ушбу лойиҳа учун Ўзбекистонда унга зарур шарт-шароитлар мавжуд эмас деб ҳисоблаган.
Паулу Бенту қандай тажрибага эга?
Паулу Бенту Бразилиянинг "Крузейро", Грециянинг "Олимпиакос" ва Хитойнинг "Чунсин Лифан" клубларида ишлаган. Март ойида Бирлашган Араб Амирликлари терма жамоаси бош мураббийи лавозимидан кутилмаганда бўшатилган.
Янги мураббий келишига Темур Кападзенинг муносабати қандай?
Темур Кападзе бўлиб ўтган CAFA Nations CUP мусобақа олдидан матбуот анжуманида мутахассис Паулу Бенту ҳақида ҳам тўхталиб, барчаси раҳбариятнинг хоҳишларига боғлиқ эканини таъкидлаган.
“Биз машғулотдамиз. Кўрдик, мураббий келганини. Қандай келишув бўлгани ҳақида хабаримиз йўқ. Бу терма жамоа биз учун энг яхшиси бўлишини тилаймиз. Хайрли бўлсин. Мен ҳақимда илиқ фикрлар билдирганларга миннатдорлик билдираман.
Раҳбарият ҳам тажрибали ва ЖЧни кўрган мутахассисни олиб келиш ниятида. Ўйлайманки, бу балки яхшиликка. Биз ҳам доим ватанимиз термаси учун ёрдам берамиз",—дейди мураббий.
Шунингдек, кейинги суҳбатда Ўзбекистон—Ўмон ўйинидан кейин Темур Кападзе интернетдаги мураббийлар ҳақидаги келди-кетдилар ҳам уларни чалғитаётганини билдирган эди.
Ижтимоий тармоқларда Кападзе қила олмаган ишни Бенту ҳам қила олмаса, сарфланган шунча маблағлар нима бўлади, каби саволлар туғилди. Аммо бу саволларга ҳали жавоб йўқ. Чунки, тегишли мутасаддилар янги мураббий ҳақида ҳали тўлиқ расмий маълумот тақдим этмаган. Таклифнинг рад этилган-этилмагани бўйича ҳам ҳали муносабат билдирилмади.
Маълумот учун, Тимур Кападзе мураббийлигидаги футбол бўйича Ўзбекистон миллий терма жамоаси жаҳон чемпионати йўлланмасини қўлга киритган. Бу 34 йил кутилган натижа деб баҳоланди.
Шунингдек, Ўзбекистон олимпия терма жамоаси Париж-2024 ёзги Олимпия ўйинларига ҳам Тимур Кападзе мураббийлигида илк бор иштирок этган эди.
УЗ
