Танганинг иккинчи томони нега яширилмоқда?
Ижтимоий тармоқларда Star House қурилиш компаниясининг раҳбарияти калтаклангани иддао қилинган видеолар тарқалди. Бу кадрлар пухта ўйланган стратегия билан махсус тарқатилганини видео монтажлардан англаш қийин эмас.
Мазкур қурилиш компаниясини обрўсизлантириш ва манипуляция қилиш ишлари ҳамон тўхтагани йўқ.
Ижтимоий тармоқларда тарқатилаётган видеолар бўйича қизиқиб, Rost24.uz ахборот-таҳлилий портали ҳам мазкур масалага ойдинлик киритишни истади.
Суриштирувлар ва тўпланган фактларга кўра, аслида вазият видеоларда кўрингани каби эмаслиги ойдинлашди.
Компания масъулларининг маълум қилишича, 13 июнь куни соат 18:00 атрофида бир гуруҳ одамлар ташкилот бош офисига бостириб кириб, провакацион сўзлар билан жанжал кўтаришни бошлайди. Компания раҳбарияти ва ходимларининг масалани имкон қадар тинч йўл билан ҳал қилишга уринишлари эса зое кетган.
“Жанжал сценарийси пухта ўйланган экан, биз одамларни қанча тинчлантиришга уринмайлик, барибир улар бизни эшитишни истамади. Уларнинг бирдан-бир мақсади – провакация уюштириб, шовқин кўтариш бўлган экан. Улар мақсадларига эришди. Яъни, жанжалли видеоларни тасвирга олиб Star House қурилиш компаниясини обрўсизлантиришда фойдаланишмоқда”, – дейди компания бош директори Бахтиёр Махмудов биз билан суҳбатда.
Компания биносига бостириб кирган фуқаролар билан бирга журналист ва тасвирчилар ҳам бўлган. Оммага ҳали ошкор қилинмаган видеолардан кўриш мумкинки, номаълум медиадан келган ходимлар ўзларини таништиришни ҳам исташмаган. Компания ходимлари уларнинг қайси медиадан келганини аниқлашга қанчалик уринмасин, уринишлари бесамар кетган.
Кейинчалик маълум бўлишича, бир томонлама ёндашилган видеолар илк бор Effect.uz сайтининг ютуб каналида кўриниш беради.
Star House ходимлари томонидан олинган кадрлар эса ижтимоий тармоқлардаги сиз-у биз кўрган видеолардан бутунлай бошқача манзара касб этмоқда. Яъни, ушбу кадрларда тасвирга олаётган қайсидир нашр тасвирчиси ўзини таништириш ўрнига шантаж йўлини танлаганини кўриш мумкин.
Энг ачинарли жиҳати шуки, оммавий ахборот воситаси ниқоби остида фаолият юритаётган бу каби медиа ходимлари Ўзбекистон журналистикасининг обрўйига путур етказишга хизмат қилади, холос.
Шу ўринда Star House қурилиш компаниясининг бош офисига босқинчилик уюштиришда иштирок этган ҳамкасбларимиздан (агар улар журналист бўлса) ташкилотларни обрўсизлантириш билан "тирикчилик" қилмасликларини сўраб қолардик.
Тўртинчи ҳокимият мақоми берилган Ўзбекистон медиаси ниқоби билан ташкилотларга босқинчилик уюштириш бошқа оммавий ахборот воситаларининг ҳам обрўйига путур етказиши мумкин.
“Ахборот олиш кафолатлари ва эркинлиги тўғрисида”ги Ўзбекистон Республикаси қонунининг 3-моддасида “Ҳар бир фуқаронинг ахборот олиш ҳуқуқи кафолатланади.
Ҳар кимнинг ахборотни излаш, олиш, тадқиқ этиш, узатиш ва тарқатиш ҳуқуқи давлат томонидан ҳимоя қилинади”, дейилади. Аммо бу ахборот олиш учун ташкилотга босқинчилик қилиш ваколатини бермайди. Ташкилотлардан маълумот олишнинг қоидалари ҳам қонун билан белгилаб қўйилган.
Бугунги кунда Янги Ўзбекистон номи остида бошланган ислоҳотлар даврида катта-катта қурилишларга имкониятлар берилган. Бу эса ўз ўрнида қурилиш компаниялари салмоғининг ортишига туртки бўлиб, уларнинг сони бугунги кунда 50 мингдан ошади.
Шунча қурилиш компанияси бор экан, ижтимоий тармоқларда нега айнан Star House тизимли равишда обрўсизлантирилмоқда, нега бу компания атрофида муаммолар аримай қолди?, деган саволлар туғилади.
Компания раҳбариятининг маълум қилишича, "Star House organization" МЧЖ томонидан Тошкент шаҳар Сергели туманидаги 59-уй манзилида қурилган кўп қаватли бино бошқа бир қурилиш компаниясига ёқмаётган экан. Демакки, Star House қайсидир амалдор хоҳишига қарши бориб қўйган кўринади, хойнаҳой...
Алоҳида мавзу бўладиган мазкур масалани эса кейинчалик алоҳида ўрганамиз ва ўрганиш ишлари билан сиз азиз ўқувчиларни таништириб борамиз албатта.
УЗ
-middle.jpg)
