Ўзбекистонликлар Россия армияси учун “ем” бўлмоқда

Украина Мудофаа вазирлиги ва Бош разведка бошқармаси кўмагида ташкил этилган “Хочу жить” (“Яшашни хоҳлайман”) лойиҳаси Украинага қарши урушда қатнашиш учун Россия Қуролли кучлари сафида ёлланиб, ҳалок бўлган ёки бедарак йўқолган 481 нафар Ўзбекистон фуқаросининг исм-шарифини эълон қилди. Рўйхат лойиҳанинг ижтимоий тармоқлардаги саҳифаларида эълон қилинди.

Лойиҳага кўра, ҳалок бўлган ва бедарак йўқолганларнинг ҳақиқий сони бир неча баравар кўп бўлиши мумкин. Қўшимча қилинишича, Ўзбекистон ҳозирда Россия Қуролли кучларида хорижий ёлланма аскарлар сони бўйича дунёда етакчилик қилмоқда. 

“Биз Украинага қарши жанг қилган ёки жанг қилаётган камида 2715 нафар Ўзбекистон фуқаросининг исмларини биламиз ва уларнинг сони йилдан-йилга ортиб бормоқда. 2023 йилда 498 нафар ўзбекистонлик, 2024 йилда эса яна 941 нафар ўзбекистонлик шартнома имзолаган. 2025 йилнинг дастлабки олти ойида Россия Қуролли кучлари билан урушга қарийб 1300 нафар ўзбекистонлик фуқаро кетган. Илтимос, эътибор беринг, булар фақат бизда ишончли маълумотларга эга бўлганларгина холос”, дейилади лойиҳа хабарида. 

Билдирилишича, Ўзбекистон шунингдек, хорижий ҳарбий асирлар орасида мунтазам равишда биринчи ўринда туради.

Қайд этилишича, 2025 йилда Россияга 1,8 миллион ўзбекистонлик борган. Уларнинг аксарияти меҳнат муҳожирлари сифатида Россия ерларига қадам қўйган, аммо ҳаммаси ҳам иш топа олмаган.
 
“Мигрант ишчилар россиялик ёлловчилар учун асосий хомашё манбаи ҳисобланади. Бугунги кунда Россияда одам савдоси самарали равишда қонунийлаштирилган. Россия Мудофаа вазирлиги келажакдаги худкуш террорчиларни шартномалар имзолаш учун олиб келганларга мукофотлар тўлайди. Ёлловчилар, полиция ходимлари ва терговчилар урушга ёзган ҳар бир киши учун тўлов олади. Ҳеч ким бу одамларнинг сифатини ҳисобга олмайди – асосийси, уларнинг икки қўли ва икки оёғи бор. Шунинг учун Марказий Осиё мамлакатларидан келган мигрантлар мазали таомдир. Уларни ишонтириш, фуқаролик ишлари таклифлари билан алдаш, депортация билан таҳдид қилиш ёки жиноий айбловлар билан таҳдид қилиш мумкин. Энг муҳими, шартнома имзоланган”, дейилади хабарда.
 
Лойиҳанинг таъкидлашича, ўзбекистонликлар Россия истилочи армияси учун “ем” бўлиб қолишда давом этмоқда.