Mutasaddilar qanday chora ko`rishgan?
Talabalarning ta`tili yaqin, bu vaqtda bir hududdan boshqalariga borish uchun transport xizmatlariga talab oshadi. Xususiy taksilar narxi ham ko`tariladi.
Ijtimoiy tarmoqlarda bo`lgan muhokamalarda qayd etilishicha, Afrosiyob poezdiga http://e-ticket.railway.uz saytidan chipta sotib olishda biroz uzilishlar bo`lgan.
"Sotuvda hammasi bor nechta joy qolganini ham ko`rsatayapti, lekin pul to`lashga kelganda saytdan chiqarib yubormoqda", - deydi murojaatchi.
Bunga javoban fikr bildirganlarning qayd etishicha, bugungacha sotib olganlar bunday muammoga duch kelishmagan.
Biz ham buni o`rganish uchun onlayn chipta sotib olmoqchi bo`ldik va haqiqatdan ham sotib olishda to`lov tizimiga o`tilganda uzilish ro`y berdi. Joylar borligini ko`rib, to`lovgacha bo`lgan ma`lumotlarni bemalol to`ldirdik, «Potverdit zakaz» tugmachasi esa ishlamadi.
Keyin, boshqa usuldan foydalandik va avval shaxsiy kabinetga kirib, keyin bilet tanlanganda bilet olishda muammo bo`lmadi.
Bayram arafasida transport vazirligi qanday imkoniyatlar yaratish ustida ishlayapti? Qo`shimcha reyslar qo`yilayaptimi?
Shu savol bilan Transport vazirligi axborot xizmatiga murojaat qilganimizdan so`ng, Navro`z Ashurmatovning bergan javobiga qaraganda barcha transport turlarida qo`shimcha xizmatlar taqdim etilishi nazarda tutilgan.
Poezdda ketmoqchi bo`lganlar uchun:
“O`zbekiston temir yo`llari” AJ – 2021 yil 27 dekabrdan 2022 yil 9 yanvargacha “Toshkent-Buxoro-Toshkent” yo`nalishida 770/769-sonli “Afrosiyob” zamonaviy poezdlarining qatnovini yo`lga qo`yadi.
Hozirgacha faqat haftaning juma, shanba va yakshanba kunlari soat 09:02 da Toshkent markaziy temir yo`l vokzalidan harakatini amalga oshirib kelayotgan 770-sonli “Afrosiyob” zamonaviy poezdi, 27 dekabrdan 2022 yil 9 yanvargacha har kuni soat 09:02 da “Toshkent-Buxoro” yo`nalishida qatnovini amalga oshiradi.
Shuningdek, 769-sonli “Afrosiyob” zamonaviy poezdi ham 27 dekabrdan 2022 yil 9 yanvargacha har kuni soat 15:02 da “Buxoro-Toshkent” yo`nalishida qatnovini amalga oshiradi.
Ushbu poezdlar Samarqand, Navoiy temir yo`l vokzallarida ham to`xtab o`tadi.
Bundan tashqari bayram kunlari barcha yo`lovchi poezdlarga qo`shimcha vagonlar ham ulanadi.
Samolyotda ketmoqchi bo`lganlar uchun:
Uzbekistan Airways yangi yil arafasida – 2021 yilning 29 dekabridan 31 dekabriga qadar Toshkentdan Nukus, Urganch va Buxoro shaharlariga qo`shimcha qatnovlarni yo`lga qo`yadi.
Narxlar nisbatan arzon bo`lgan avtobuslarda ketmoqchi bo`lganlarga:
Yangi yil bayramida yo`lovchilar oqimidan kelib chiqqan holda Toshkent avtovokzalidan yo`nalishlar bo`yicha qo`shimcha avtobuslar ajratilmoqda.
Talabalar uchun alohida chiptaxona:
"Mirzo Ulug`bek nomidagi O`zbekiston Milliy Universiteti asosiy binosining birinchi qavatida chiptaxona tashkil qilindi", – deydi Ashurmatov.
Rost24 muxbirlari bu imkoniyatlar haqiqatdan ham yo`lovchilarga engillik yaratyaptimi yoki faqat e`lonlaru, ma`lumotlarda ular aks etganmi o`rganib, tez orada reportajlarni e`tiboringizga havola etadi.
УЗ
