Toshkentdagi Irrigasiya va qishloq xo`jaligini mexanizasiyalashtirish muhandislari universitetida suv xo`jaligi sohasidagi tadbirkorlar bilan ilmiy va oliy ta`lim muassasalarining ilmiy xodimlari tomonidan yaratilgan ilmiy ishlanmalar va ixtirolarni ishlab chiqarishga joriy etish bo`yicha ochiq muloqot o`tkazildi.
Tadbir prezidentning joriy yilning 20-avgust kuni tadbirkorlar bilan o`tkazilgan ochiq muloqoti davomida berilgan topshiriqlar ijrosini ta`minlash maqsadida tashkil etildi.
Ochiq muloqotda Oliy ta`lim va ilmiy-tadqiqot muassasalari, xalqaro moliya tashkilotlari va suv tejovchi sug`orish tizimlari va butlovchi qismlarni ishlab chiqaruvchi hamda quruvchi korxonalar, shuningdek suv xo`jaligi tashkilotlaridan jami 240 nafar mutaxassislar ishtirok etdi.
Tadbirda Xalqaro suv resurslarini boshqarish instituti, Orolni qutqarish xalqaro jamg`armasi, Markaziy Osiyo davlatlararo suv xo`jaligini muvofiqlashtirish komissiyasining Ilmiy-axborot markazi, BMT taraqqiyot dasturi, Germaniya Xalqaro hamkorlik jamiyati, Koreya xalqaro hamkorlik agentligi vakolatxonasi va boshqa xalqaro muassasalar vakillari ham qatnashdi.
Ochiq muloqot doirasida oliy ta`lim va ilmiy tashkilotlar ilmiy xodimlari tomonidan yaratilgan ishlanmalar namoyishi o`tkazildi.
Ko`rgazmaga jami 180 ta ishlanma va mahsulot olib kelingan. Masalan, daryolar, kanallarda suv sarfi ma`lumotlarini uzluksiz va real vaqt rejimida o`lchash, qayta ishlash va masofadan turib uzata oladigan “SMART FLOW MEASURMENT” qurilmasi, dehqon fermer xo`jaliklari, klasterlar va baliqchilik xo`jaliklari foydalanadigan suv sarfini, miqdorini o`lchovchi va hisobini yuritish uchun mo`ljallangan “SMART CHANNEL” qurilmasi hamda qishloq xo`jaligi erlariga energetikasiz, quyosh pannellari orqali suv etkazib berishga qaratilgan “KAVSAR” loyihasi ham namoyish qilindi.
УЗ
