Xalq deputatlari Toshkent shahar Kengashi ishdan bo`shatilgan poytaxt hokimi Jahongir Ortiqxo`jaevga shahar rivojiga qo`shgan hissasi va yordami uchun minnatdorlik bildirdi. Bu haqida bir qancha nashrlar yozganidan so`ng esa bu xabar o`chirib tashlandi.
Telegramm kanaldagi o`chirilgan xabar quyidagicha mazmunda edi:
«Hurmatli Jahongir Obidovich Ortiqxo`jaev, 2019−2023 yillarda xalq deputatlari Toshkent shahar Kengashi raisi sifatidagi faoliyatingiz davomida xalq deputatlari Toshkent shahar Kengashi deputatlarini qo`llab-quvvatlaganingiz uchun tashakkur aytamiz.
Bu davrda siz tomoningizdan bildirilgan takliflar asosida deputatlar tomonidan olib borilgan ishlar natijasida aholining ayniqsa ehtiyojmand oilalarning holidan xabar olinganligi xalqimizning deputatlarga bo`lgan ishonchini oshirganligi alohida e`tiborga loyiqdir.
Sizga, xalq deputatlari Toshkent shahar Kengashi deputatlari tomonidan Toshkent shahrimiz ravnaqi yo`lida qo`shgan hissangiz va mashaqqatli mehnatingiz uchun minnatdorchilik bildiramiz», — deyilgan edi Kengash telegramm kanalidagi murojaatda. O`chirilgan xabar suratini sal avvalroq gazeta.uz e`lon qildi.
Postga Jahongir Ortiqxo`jaevning fuqarolar qabulidan lavhalar aks ettirilgan videorolik ilova qilingan.
Hissiyotlarga boy lavhalardan Kengash deputatlari doim qo`llab quvvatlab kelishgan shahar hokimi ishdan ketgandan so`ng ham o`z fikrida sobit qoldi degan xulosa olish mumkin edi.
Ammo oradan ko`p ham o`tmay bu munosabat anglashilmovchilik ekanligi va u fikrlarga kengash qo`shilmasligini anglatuvchi ketma-ket izohlar berila boshlandi.
 |  |
«Xalq deputatlari Toshkent shahar Kengashi shuni ma`lum qiladiki, Kengash tomonidan joriy yilning 16-17 yanvar kunlari Kengash majlis o`tkazish uchun yig`ilgani yo`q.
Shu bilan birga Kengash nomidan bayonot berishga alohida shaxslarning huquqi mavjud emasligini bildiramiz.
Xalq deputatlari Toshkent shahar Kengashi kotibiyati», deyiladi birinchi xabarda.
Kengash raisi o`rinbosari Toshpo`lat Matibaev nomidan e`lon qilingan ikkinchi postda esa butunlay birinchi munosabat inkor qilingan.
«Assalomu alaykum
Hurmatli Toshkent shahar fuqarolari Ijtimoiy tarmoqlarda tarqalgan xalq deputatlari Toshkent shahar Kengashining murojaatnomasi bo`yicha shuni ma`lum qilamizki 16-17 yanvar kunlari Xalq deputatlari Toshkent shahar Kengashining hech qanday yig`ilishi bo`lib o`tmadi hamda Kengash deputatlari nomidan Toshkent shaxar sobiq xokimi J. Artikxodjaev tug`risida bayonot berilmagani
bildiramiz hamda ushbu murojaatnomani biz qo`llab quvvatlamaymiz. Xalq deputatlari Toshkent shahar Kengashi raisi o`rinbosari.
Tashpo`lat Matibaev!»
Rahbarlik vaqtida barcha qarorlarni deyarli e`tirozsiz qabul qilgan deputatlar o`z fikrlarini shuncha tez o`zgartirishadimi?
Toshkent shahri hokimini amalda bo`lganida eng ko`p tanqid qilgan nashrlardan biri sifatida bu holat bizga erish tuyuldi. Deputatlar hokimlar ketgandan keyin emas, balki amalda ekanligida, noto`g`ri qarorlar qabul qilayotgan vaqtda xayrixohlik qilishmasa ko`proq foydalari tegardi.
УЗ
