Muzrobot tumani sobiq hokimi Erkin Alimov milliardlarni o`zlashtirgani ayon bo`ldi va unga nisbatan DXX jinoyat ishi qo`zg`atdi
Qarindoshlariga er sotishlar, milliardlab o`zlashtirilgan pullar...
Sobiq hokim kirdikorlari ishdan bo`shatilgach ma`lum qilindi.
Xabar qilinishicha, joriy yilning sentyabr oyida lavozimidan ozod qilingan Muzrabot tumanining sobiq hokimi Erkin Alimovga nisbatan DXX Surxondaryo viloyati bo`yicha boshqarmasi tomonidan Jinoyat kodeksining 167, 205 va 209-moddalari bilan jinoyat ishi qo`zg`atilgan.
Dastlabki tergov harakatlari davomida ma`lum bo`lishicha, u mazkur tumandagi umumiy qiymati 1,7 mlrd. so`m bo`lgan 4,2 gektar er maydonini auksion savdolarisiz o`zining yaqin qarindoshlariga rasmiylashtirib bergan.
Shuningdek, tumandagi banklar uning yaqin qarindoshlari nomlariga turli maqsadlarda 166 mlrd. so`m miqdorida imtiyozli kredit mablag`lari ajratgan bo`lib, ularning katta qismi muammoli kreditga aylangan. Hozirda bank muassasalari tomonidan o`z vaqtida to`lovlari amalga oshirilmagan 121 mlrd. 406 mln. so`mlik kredit mablag`larini undirish yuzasidan tegishli ishlar olib borilmoqda.
Bundan tashqari, «Surxondaryodonmahsulotlari» AJda olib borilayotgan taftish davomida aniqlanishicha, Alimov ishtirokida qiymati 35 mlrd. so`mlik 9,6 ming tonna don talon-toroj qilingan. Ta`kidlash lozimki, Erkin Alimov 2010 — 2017 yillarda ushbu Jamiyat rahbari lavozimida faoliyat olib borgan. Hozirda jinoyat ishi bo`yicha Jamiyatning 20dan ortiq mas`ul-mansabdor shaxslari tergov harakatlariga jalb qilingan va ular Alimovning noqonuniy xatti-harakatlari yuzasidan ko`rsatmalar bermoqda. Hozirda tergov harakatlari davom ettirilmoqda.
Ma`lumot uchun, Erkin Alimov Muzrabot tumaniga 2018 yil iyulidan to 2022 yil sentyabriga qadar rahbarlik qilgan.
Eslatib o`tamiz, bu Surxondaryo viloyatidagi korrupsiya bilan birinchi holat emas, 2022 yil iyun oyida Davlat xavfsizlik xizmati Surxondaryo viloyati bo`yicha boshqarmasi tomonidan byudjet va kredit mablag`larini o`zlashtirgan 1 nafar sobiq bank xodimi va 7 nafar turli tashkilot xodimlari ehtiyot chorasi sifatida majlis jarayonidan qamoqqa olingandi.
Avvalroq, aniqrog`i oktyabr oyining so`nggi kunlarida Huquq-tartibot organlari Termiz shahrining sobiq hokimi Isroil Xudoyberdiev, uning ikki nafar o`rinbosari va yana 4 nafar mansabdorni hibsga olgani xabar qilindi. Ular «Yashil dunyo» savdo majmuasi qurilishi davomida 14,8 mlrd so`mni o`zlashtirganlikda gumonlanmoqda.
УЗ
