Joriy yilning 18 oktyabr kuni O`zsanoatqurilishbank tomonidan O`zbek tili bayrami munosabati bilan «Qadring baland bo`lsin, ona tilim» shiori ostida ma`naviy tadbir tashkil etildi. Tadbirga O`zbekiston Yozuvchilar uyushmasi a`zosi, «Do`stlik» ordeni sohibi, shoir Shodmonqul Salom taklif etildi.
O`zbek tilining xalqimiz ijtimoiy hayotida va xalqaro miqyosdagi obro`-e`tiborini tubdan oshirish, unib-o`sib kelayotgan yoshlarimizni vatanparvarlik, milliy an`ana va qadriyatlarga sadoqat, ulug` ajdodlarimizning boy merosiga vorislik ruhida tarbiyalash, mamlakatimizda davlat tilini to`laqonli joriy etishni ta`minlashga qaratilgan qator ishlar amalga oshirilmoqda.
Xususan, O`zbekiston Respublikasining 2020 yil 10 apreldagi «O`zbek tili bayrami kunini belgilash to`g`risida»gi Qonuni bilan 21 oktyabr - O`zbek tili bayrami kuni etib belgilandi.
Bank xodimlari ishtirokidagi tadbirda so`z olganlar o`zbek tili xalqimizning shu kungacha qo`lga kiritgan yutuqlaridan eng zalvorlisi ekanligini ta`kidladi.
–Har bir xalq uchun o`z tili aziz va muqaddas, – deydi tadbir mehmoni Shodmonqul Salom. – Biz uchun ham o`zbek tili milliy mustaqilligimiz timsoli, jamiyat ko`zgusi va davlat ramzi sifatida istiqlol yillarida xalqimizni erkin va ozod, farovon hayot qurishdek buyuk marralarga safarbar etadigan beqiyos kuch sifatida maydonga chiqdi.
Shuningdek, tadbirda o`zbek tilining xalqaro minbarlarda siyosiy-huquqiy, ijtimoiy-iqtisodiy, ma`naviy-ma`rifiy jabhalarda faol qo`llanilayotgani, xorijiy mamlakatlarda tilimizga e`tibor va uni o`rganishga qiziqish kuchayib borayotgani mamnuniyat bilan qayd etildi.
Tadbir so`ngida davlatimiz rahbarining 2019 yil 21 oktyabrdagi «O`zbek tilining davlat tili sifatidagi nufuzi va mavqeyini tubdan oshirish chora-tadbirlari to`g`risida»gi farmoni ijrosi doirasida Davlat tilida ish yuritish asoslarini o`qitish va malaka oshirish markazi tomonidan lotin yozuviga asoslangan davlat tilida ish yuritish asoslari bo`yicha o`qitilgan xodimlarga sertifikat taqdim etildi.
Bank Axborot xizmati
Reklama
УЗ
-middle.jpg)
