2022 yil 1 maydan pensiya va nafaqalar 12 foizga oshdi, 1 iyundan esa oylik ish haqlari 12 foizga oshishi ma`lum qilindi. Narxlar-chi?
Fevral oyidan beri narxlar (hech bir ogohlantirishsiz?) qayta-qayta oshgan bo`lsa-da, oylik ish haqlari faqat bir marta, 12 foizga ko`taril(a)di.
Oxirgi uch oyda bug`doy uni narxi 15-23 foizga oshgan. Tabiiyki un mahsulotlari narxi ham muqobil ravishda oshdi, ammo foizlar yanada yuqori. Ma`lumki, Qozog`iston hukumati ichki bozorda taqchillik yuzaga kelishining oldini olish uchun bug`doy va unning ikki oylik eksportiga kvota kiritgan edi, hozirda un narxlarining keskin oshishiga yuqoridagi sabab omil deb ko`rsatilmoqda.
Mart oyida shakar narxi keskin ko`tarildi. Ayrim chakana savdo nuqtalarida shakarning narxi deyarli 2 baravar oshdi, bundan vahimaga tushgan aholi narxlarning sun`iy oshirilishiga ham hissa qo`shdi.
Yil boshidan buyon shakar, yog`, go`sht, sabzavotlar, tuxum kabi ehtiyoj mollarining narxlari bir necha marta yakka tarzda oshib borishi kuzatildi. Xususan, o`simlik yog`i narxlari muqobillashtirilishi bir necha bor aytilgan bo`lsa-da, o`tgan yildan buyon ko`tarilishda davom etmoqda.
May oyi oxirida «O`zbekneftgaz»ga qarashli AYoQShlarda AI-80 markali benzin narxi ko`tarilib, 6800 so`mdan sotila boshladi. Kompaniya buni birjada narxlar ko`tarilish bilan izohlagan.
Rasmiy ma`lumotga ko`ra, aprel oyida tovarlar va xizmatlar o`rtacha 1,5 foizga oshgan, oxirgi 1 yilda O`zbekistonda kungaboqar yog`i 26,9 foizga, paxta yog`i 28,9 foizga, shakar 36,6 foizga, suyakli mol go`shti 8,5 foizga qimmatlashgan. Mart oyida yillik inflyasiya darajasi 10,5 foizga oshgan, mos ravishda oziq-ovqat mahsulotlari sektoridagi inflyasiya darajasi 14,5 foizni tashkil qilgan.
Kecha, 30 may kuni qolipli non narxlarining oshishi ma`lum bo`ldi. Ammo, mas`ullar aytganidek holatning vaqtinchalik ekaniga xalq negadir ishonmayapti.
Bugun, 31 may kuni “O`zbekneftgaz” Aksiz soliq stavkalari miqdorlarining 2022 yil 1 iyundan o`zgarishi hisobiga “O`zbekneftgaz” AJ AYoQShlarida benzin narxi oshmaydi, deya bayonot berib chiqdi.
Ammo, AI-80 benzin narxlari o`tgan bir hafta davomida birdaniga 300 so`mga, 6800 so`mgacha oshirilgan edi. Aksiz narxlari esa ushbu navli benzinga jami 70 so`mga (35 so`m aksiz solig`i, 35 so`m iste`molchi solig`i) oshishi kerak edi, ya`ni AI-80 narxi ortgan aksiz solig`idan ortiq darajada oshib bo`lgan, aholi benzinni oshgan narxlarda xarid qilmoqda.
Mazkur bayonot benzin narxi endi qaytadan oshirilmasligini bildiradimi yoki “O`zbekneftgaz” AJ AYoQShlardagi narxlardan bexabarmi, bunisi noma`lum.
Aytish mumkinki, markasi 91 dan yuqori bo`lgan benzin navlari bo`yicha esa aksiz solig`i o`zgarishsiz qolgan.
УЗ
