Suv tagida qolgan qishloqdan reportaj
«40 minut ichida sel butun qishlog`imizni olib ketdi. Nevaram suvda oqib kelib, daraxtga osilib qoldi. Do`lni muzidan shamollab o`tiribdi endi. Qo`rquvdan hali o`ziga kelgani yo`q. Ko`chalarda mashinalar oqdi...Yana bir kelinchak ham daraxtga chiqib olgandi. Qo`shnimiz Boymat aka yaxshi o`qituvchi edi... Rahmatli, nevarasini qutqaraman, deb o`zi suvda oqib ketib, halok bo`ldi», deydi Jizzax viloyati, Forish tumani Egizbuloq qishlog`i fuqarosi.
20 aprel kuni Forish tumani, Egizbuloq qishlog`ida sel kelishi oqibatida 100 dan ortiq xonadon zarar ko`rgani aytilmoqda. Rasmiy ma`lumotlarga ko`ra 5 kishi halok bo`lgan.
Rost24 jamoasi sel oqibatlarini yoritish uchun 21 aprel kuni voqea joyiga etib bordi.
Egizbuloq qishlog`i o`rnida bugun faqat vayronalar va bir kungina oldin mavjud bo`lgan osuda hayot haqidagi xotiralardan boshqa hech narsa qolgani yo`q. Vayronalarga qarab qishloq ahli to`kis hayot kechirmaganini sezish mumkin. Ammo, bugun ularni o`sha oddiy hayotini ta`minlab turgan buyumlari ham yo`q. Aholi qolgan qutgan anjomlarni ko`chirish bilan ovora. Qishloqdagi loyli uylar buzilgan, paxsa devorlar ortidan g`aribgina turmushni eslatuvchi anjomlar loyga botib yotibdi. Odamlar ana shu sodda turmush sharoitiga erishish uchun ham anchagina mehnat qilgani aniq.
Uysiz qolgan Shavkat aka hovlisiga ekkan kartoshkadan 1 tonna hosil olishni rejalashtirganini aytadi.
“To`satdan sel kelib borimizni supurib ketdi. Oila a`zolarimni yaqinlarimnikiga eltib qo`ydim. O`zim uy ahvolidan xabar olgani keldim. Yaroqli narsamiz qolmagan», deydi Shavkat aka.
Qishloq qabristoni ham selda buzilgani aytilmoqda. Bitta bog`cha va maktab ham zarar ko`rgan. Qishloq aholisi boshqa yaqinlari uyiga ko`chirilgan. Odamlar vayronalar orasidan omon qolgan buyumlarini ajratib olishmoqda. Loyqa yo`llardan yurishning deyarli imkoni yo`q. Paxsa uylarda qolish xavfliligi aytilmoqda. Ammo, qishloq aholisi uylariga qaytib, achinish bilan qadrli buyumlarini saqlab qolishga urinmoqda.
Loyli vayronalararo arqon o`tkazilib, bo`kkan ko`rpachalar ilingan. Qaysidir xonadonda qozon qaynamoqda. Uy egasining aytishicha 21 aprel kuni tongda hokimiyat vakili aholiga un, yog`, tuxum tarqatgan. Odamlar buzilgan uylari o`rniga hokimiyat yangisini qurib berishiga ishonishmoqda. Hokimiyat tomonidan va`da qilingan uylar haqida gap ketganda odamlarning tashvishli yuzlariga tabassum yuguradi. Demak, ular buzilgan uylarini hokimiyat tomonidan ta`mirlanib berilishiga ishonishmoqda.
Forishning Egizbuloq qishlog`idagi talafotlarga jiddiy qaralmagandek, odamlar hayoti mana shu loy ostida qolgan uniqqan buyumlar kabi unutilgandek tuyuldi bizga. Negaki butun bir qishloq, oilalar er bilan bitta bo`lgan bo`lsada, bironta rasmiylar vaziyat bo`yicha hisobot berayotgani yo`q. Aholiga etgan zarar va uning sababi javobgarlari ham ochiqlanmadi. Go`yoki hammasi jimgina unutilishga mahkumdek.
Reportajni to`liq variantini quyidagi videoda ko`rishingiz mumkin.
УЗ
-middle.jpg)
