Икки ҳукумат даврида ҳам ҳокимлик курсисини сақлаб қолаётган, Ўзбекистоннинг қонун – қоидалари камдан кам етиб борадиган Андижон вилояти ҳокимининг интернетдаги трендлари ҳақида қисқача.
Интернет фойдаланувчилари томонидан Андижон вилояти ҳокими Шуҳрат Абдураҳмоновнинг Қонунни четлаб ўтишлари ҳақида кўп муҳокама қилишади. Бугун бунга доир бир нечта мисоллар келтирамиз. Шунингдек, уни ижтимоий тармоқларда “Андижон амири”, Шуҳрат “арқадағ” деб ҳам аташади.
8 февраль куни ижтимоий тармоқларда Андижон вилояти Марҳамат туманидаги мактаблардан бирида ўқитувчилар ўқув муассасада таълим сифати, ўқувчиларнинг олийгоҳларга кириш кўрсаткичи пастлиги учун ота-оналар олдида тик туриб кечирим сўрашга мажбур қилингани ҳақида хабарлар ва ўқитувчиларнинг мактаб фаоллар зали саҳнасида бош эгиб тургани акс этган сурат тарқалди. Даставвал бунга вилоят ҳокими мажбур қилгани айтилганди.
Кейинчалик Абдураҳмонов устозларни бундай ҳолга туширилишига йўл қўйилмаслигини айтиб, узрли муносабат билдириб чиқди. Ўқитувчилар билан боғлиқ бундай ҳолатлар биринчиси эмас ва охиргиси ҳам бўлмаса керак.
Бундан бир неча кун олдин эса ижтимоий тармоқларда Андижон вилояти туманларининг таълим муассасаларида уюшмаган ёшлар учун ўтказилган “Гулхан атрофида“ тадбирларига ўқитувчилар мажбуран жалб этилаётгани ҳақида хабарлар тарқалганди. Суратда ўқитувчиларни кўришингиз мумкин.
Шуҳрат Абдураҳмонов битта курсида жуда узоқ ўтириб қолмадими?
Ш.Абдураҳмоновнинг ҳокимиятдаги фаолияти 2001 йилга бориб тақалади. Аввалига Пахтаобод тумани ҳокимининг биринчи ўринбосари бўлиб ишлаган Абдураҳмонов кейинчалик Пахтаобод тумани ҳокими лавозимига ўтади. 2011 йилдан вилоят ҳокимининг биринчи ўринбосари, 2013 йилдан шу кунга қадар Андижон вилояти ҳокимидир.
Икки ҳукумат даврида ҳам битта курсидан тушмай келаётган Абдураҳмоновнинг фаолияти давомида Ўзбекистонда қабул қилинаётган қарор ва қонунлар Андижонга етиб бормаётгандек туюлади.
Жумладан, маълумотларга кўра жорий йилнинг 15 январь куни вилоят перинатал марказида бўлган вилоят ҳокими Шуҳрат Абдураҳмонов қурилаётган янги марказнинг олдини очиш учун дарахтларни кесиш бўйича топшириқ берган.
Шу куннинг ўзида тунда марказ ҳовлисидаги 12 туп нинабаргли дарахтлар кесиб ташланади. Ижтимоий тармоқларда тарқалган бу ҳақидаги хабарларга жавобан вилоят ҳокимлиги матбуот хизмати ҳеч қандай дарахт кесилмагани, жойида тургани ҳақида расмий муносабат билдирган. Кейинчалик хабар таҳрирланган ва юқоридаги жумла олиб ташланган. Экология қўмитаси дарахтларни кесишга рухсатнома бермагани ва қонун бузилиши аниқланганини маълум қилган.
Вилоят ҳокимлиги эса “дарахтлар қирғини“га Абдураҳмонов буйруқ берганини рад этади.
Ҳокими мутлақга аталган шеърлар
Қадимдан шоир ва ёзувчилар юртбошилар –у мулозимлардан “нимадир“ли бўлиш ниятида уларнинг шаънига ғазал – у шеърлар ёзишган, илтифот кўрсатишган. Улар “сарой шоирлари” деб аталади. Лекин оддий фуқаролар, миллат ёшлари вилоят ҳокимини жимжимадор сўзлар билан “сийлаш”и, уни мадҳ этиб улуғлаши демократик эмас, авторитар давлат раҳбарларига хос белги эмасми? Буни тушиниш учун узоққа бориш шарт эмас.
Жорий йилнинг бошида янги йил байрами муносабати билан вилоятдаги шифохоналардан бирига ташриф буюрган Абдураҳмоновни ҳамширалар унга аталган шеър билан кутиб олган.
Бундан бир неча йил олдин эса пахта даласига чиққан андижонлик шоир Шарофиддин Болтабоев ҳоким билан учрашувда уни мадҳ этганди.
Шаҳди ўткир қиличдан,
Шуҳрат Қўшақбоевичдан,
“Равон“ олгим келябди,
Пахта тергим келябди!
Ушбу шеърдан кейин шоирга “Равон“ калити берилади.
Ижтимоий тармоқларда тарқалишига кўра, вилоят ҳокими улуғланган шеърлар мактаб ўқувчиларига ёдлатилмоқда. Унда шундай сартлар бор:
Билинг, сиз Андижонсиз!
Андижон эса – Сизсиз!
Фахр билан айтамиз
Сиз бизмиз, биз эса сиз!
Вилоят ҳокими ҳам мулозамат кўрсатишни канда қилмайди. Айрим интернет фаолларининг ҳисоб – китобларига кўра, Абдураҳмонов тадбирларниниг бирида президентга нисбатан муҳтарам сўзини 81 марта бошқасида 108 марта ишлатган.
Шунингдек, вилоят ҳокимининг қонунлардан хоҳлаганича фойдаланишига кўникиб ҳам бўлдик. Ўтган йили Rost24.uz сайтида вилоят ҳокимининг қариндоши эканлиги айтилган “ALSAEADA” ўқув маркази раҳбари Гавҳарой Ҳасанова “Йил аёли“ танловида 1 ўринга муносиб кўрилгани ҳақида мақола эълон қилинганди. Бу Абдураҳмоновнинг биринчи қўллови эмас. 2020 йилда Андижон вилоят ҳокимлиги шу аёлга тегишли бўлган “ALSAEADA" МЧЖдан бир донаси 760 минг сўмдан "Андижон меҳр маскани" номли китоб сотиб олган. Ҳокимият “ALSAEADA" МЧЖга 290 та китоб учун 220 миллион 400 минг сўм ўтказиб берган.
Бир неча йил олдинги вилоят соғлиқни сақлаш бошқармаси билан боғлиқ пул ювиш воқеаларини ҳам алоҳида тадқиқ этгулик. Қолаверса, Андижонлик кам таъминланган аёлларга президент олдида калитлари топширилган, кейин эса бу уйларни ололмаган аёллар воқеаси ҳам “Андижон спектакли” номи остида ижтимоий тармоқларни бош мавзусига айланганди. Ҳоким қизининг шоҳона туғилган куни видеоси эса кўпчиликни “хаваси”ни келтирган. Бу мисоллар шунчаки катта трагедиянинг рекламаси, хамир учидан патир, холос.
Қарийб ўн йилдан буён Андижон вилояти ҳокимининг илдизлари етарлича илдиз отиб, йўғонлашиб бўлган. Бундай узоқ муддатли фаолиятда коррупция, непотизм етарлича шакллана олади ва биз буни кўрмоқдамиз. Очиқлик, инсон қадри, холислик ҳақидаги жимжимадор, ялтироқ сўзларга қорин тўймайди.
УЗ
-middle.jpg)
