Умуман электр етиб бормаган қишлоққа мажбурий обуна етиб борди

Ҳеч қачон электр кўрмаган, газета етиб бормаган олис қишлоқ ўқитувчилари 12 та нашрга мажбурий обуна қилдирилмоқда.

Таҳририятимизга “Вочах" тоғ қишлоғи ўқитувчилари 12 та нашрга мажбурий обунага жалб қилинганларини айтишди.

Сурхондарё вилояти, Сариосиё тумани, “Вочах” тоғ қишлоғидаги 46-мактаб ўқитувчилари 12 турдаги нашрларга мажбурий обуна бўлишлари талаб этилмоқда. Бу қишлоққа шу вақтгача электр токи етиб бормаган. Шунга қарамасдан 46-мактабнинг 24 нафар ўқитувчилардан 320 минг сўм эвазига 12 та нашрга обуна бўлишлари талаб этилган. Ушбу мактаб ўқитувчисининг айтишича, обуна бўлганларига яраша газеталар “Вочах" тоғ қишлоғига етиб келмайди. “Бир йил ичида 1, 2 та газета етиб келади”, дейди мактаб ўқитувчиси. Газеталар етиб бормаган бу қишлоқда газ ва электр йўқ, аммо мажбурий обуна бор.

Қишлоқнинг цивилизациядан узилиб қолганига қайғурмаган мутасаддилар ундан тўловлар ундиришдан тортинаётганлари йўқ. Шам нурида дарс қилаётган қишлоқ ўқувчиларига шу вақтгача обуна бўлган нашрлари етиб келмаган. Аммо, ҳар йили уларнинг маошидан обуна учун пул ундирилиб келинади.