Ижтимоий тармоқларда Ўзбекистонга Хитойнинг Leapmotor автомобилларини импорт қилиш тақиқлангани ҳақидаги хабарлар тарқалди. Табиийки, ушбу хабарлар кўплаб муҳокамаларга сабаб бўлмоқда. Ўзи бу тақиққа қандай асос бор?
Халқаро стандартларга мос эмас
Вазиятни Техник жиҳатдан тартибга солиш соҳасида назорат инспекцияси изоҳлаб берди .
Қайд этилишича, яқинда лабораторияда Хитойнинг Leapmotor компаниясига тегишли C16 русумли автомобиль синовдан ўтказилган.
“Натижалар шуни кўрсатдики, ушбу автомобиль халқаро стандартларга, хусусан, Бирлашган Миллатлар Ташкилоти томонидан белгиланган хавфсизлик талабларига жавоб бермайди. (белгиланган меъёрдан 16 баравар кўп)”, дейилади муносабатда.
Билдирилишича, “Ўзбекистон илмий-синов ва сифат назорати маркази” давлат муассасасининг синов лабораторияси томонидан жорий йилнинг 10 март куни SB-0309-388/25-сонли синов баённомасига асосан “устуворлик ва ташқи электромагнит нурланишга бардошлилик (кенг полосали электромагнит шовқинлар)” талабларига номувофиқлик ҳолати аниқланган.
“Электромагнит мослашувчанлик (EMS) – электрон қурилмалар ва тизимлар ўртасида электромагнит майдонлар таъсирини минималлаштириш учун ўтказиладиган муҳим синов. Бундай синовлар транспорт воситалари учун ҳам зарур, чунки электромагнит майдонларнинг автомобиль электрон тизимларига таъсири хавфсизликка жиддий таъсир қилиши мумкин. Бундан ташқари, электромагнит нурланишнинг инсон саломатлигига таъсири ҳам муҳим масала ҳисобланади. Тадқиқотларга кўра, юқори даражадаги электромагнит майдонлар организмга салбий таъсир кўрсатиши, жумладан, асаб тизими, юрак-қон томир тизими ва ҳатто саратон касалликлари хавфини ошириши мумкин. Шу сабабли, автомобиль танлашда халқаро талаб ва стандартларга жавоб берадиган маҳсулотларни афзал кўришни ҳамда автомобиль танлашда хавфсизлик меъёрларига риоя қилган ҳолда расмий диллерларга мурожаат қилишингизни сўралади”, дейилади муносабатда.
Билдирилишича, Ўзбекистонда электромагнит мослашувчанлик (ЭМС) синовлари Ўзбекистон илмий-синов ва сифат назорати марказининг Пискент туманида жойлашган махсус лабораториясида ўтказилади. Ушбу лаборатория халқаро Ўз DSt ISO/IEC 17025:2019 стандартига мувофиқ аккредитация қилинган.
Leapmotor вакиллари нима дейди?
Ўзбекистондаги Leapmotor вакиллари «вазиятни ўрганаётганликларини ва ҳозирча бу борада изоҳ бера олмаслигини» билдирди. Шу билан бирга, автосалонда ушбу компания автомобиллари савдоси давом этмоқда.
Божхона қўмитаси айрим русумдаги автомобилларни олиб киришга чекловлар киритилмагани ҳақида хабар берди. Давлат ташкилотининг эслатишича, «Транспорт тўғрисида»ги қонуннинг 14-моддасига кўра, транспорт воситалари мувофиқлик ёки транспорт воситаси турини маъқуллаш сертификатига эга бўлиши ва рўйхатдан ўтказилиши керак. Хавфсизлик талабларига жавоб бермайдиган транспорт воситаларини Ўзбекистон ҳудудига олиб кириш, Ўзбекистонда ишлаб чиқариш, сотиш (реализация қилиш) ёки улардан фойдаланиш тақиқланади.
Ўзи бу қандай компания?
Leapmotor — электромобилларни ишлаб чиқаришга ихтисослашган Хитой компанияси бўлиб, у 2015 йилда ташкил этилган. Компания Хитойнинг Зҳежианг провинциясининг Ханчжоу шаҳрида жойлашган.
Leapmotor автомобилларнинг тўлиқ ишлаб чиқиш жараёни, жумладан дизайн, тадқиқотлар ва ақлли электромобилларни ишлаб чиқариш билан шуғулланади. Шунингдек, у автоном бошқарув тизимлари ва автомобилларнинг тармоқли ўзаро алоқа ечимларини ишлаб чиқади. 2024 йил сентябрь ойида компания Европада савдоларни бошлаган.
Leapmotor C16 — 5−7 ўринли тўлиқ ўлчамли йўлтанламас бўлиб, 2024 йил апрель ойида Пекин халқаро автосалонида тақдим этилган. Ўзбекистонда у 459,8 млн сўмдан бошлаб сотилган.
УЗ
-middle.jpg)