Юн Сок Ёль вақтинчалик лавозимидан четлатилди

Миллий ассамблея томонидан Жанубий Корея президенти Юн Сок Ёль вақтинчалик лавозимидан четлаштирилди. Бу ҳақда "Yonhap" нашри хабар берди.

Конституциявий суд уни лавозимига тиклаш ёки лавозимидан четлаштириш тўғрисида қарор қабул қилгунига қадар ўз вазифасидан четлаштирилди. Бош вазир Хан Дак Су эса президент вазифасини бажарувчи этиб белгиланди.

Юн Сок Ёлга нима учун импичмент эълон қилинди?

Барчаси президент Юн Сок Ёлнинг 3 декабрь куни мамлакатда ҳарбий ҳолат эълон қилганидан кейин бошланди. Дастлаб, 9 декабрь куни Адлия вазирлиги томонидан президентинг бу ҳаракати учун чет элга чиқишини тақиқлади. Шунингдек, Юн Сок Ёлнинг тасодифий ҳарбий ҳолат эълон қилиши конституцияга зид ва ўз ваколатини суиистеъмол қилиш деб топилди ва 14 декабрь куни Жанубий Корея парламентининг 204 нафар аъзоси (умумий депутатларнинг 2/3 қисми) овоз бериб, унга нисбатан импичмент эълон қилинди. 

Импичмент ўзи нима?

Импичмент - бу қонун чиқарувчи орган ёки бошқа қонуний ташкил этилган суд томонидан давлат мансабдор шахсига нисбатан қонунбузарлик учун эълон қилинган айблов жараёни.

Жанубий Корея президенти нега ҳарбий ҳолат эълон қилди?

Унинг сўзларига кўра, конституциявий тузумни "Шимолий Кореяга хайрихоҳ коммунистик кучлар"дан ҳимоя қилиш мақсадида бундай қарорга келган.

"Мен ҳеч қачон таслим бўлмайман. Менга қаратилган барча танқид, далда ва қўллаб-қувватлашни қабул қиламан ва охиригача миллат учун қўлимдан келганини қиламан", — дея таъкидлаган Юн Сок Ёль импичмент қарорига жавобан.

Халқ муносабати

14 декабрь куни Сеулдаги Миллий Ассамблея яқинида президент Юн Сук Ёль қарши импичмент эълон қилинганидан кейин намойишчилар ушбу қарорни  олқишлаб чиқишди.

Маълумот учун импичмент бўйича суд жараёни 180 кунгача давом этиши мумкин. Агар бу тасдиқланса, Юн Сок Ёль расман лавозимидан четлатилади ва 60 кун ичида навбатдан ташқари президентлик сайлови бўлиб ўтади.