Ўзбекистонда яна бир халқаро мукофот таъсис этилди

Президентнинг «Бадиий таржима соҳасида Муҳаммад Ризо Огаҳий номидаги халқаро мукофотни таъсис этиш тўғрисидаги» қарори эълон қилинди. 

Қарорга кўра, халқаро мукофот учун танловлар 2025 йилдан бошлаб, ҳар икки йилда бир марта ўтказилиб, қуйидаги йўналишларда ғолиблари аниқланади:

- ўзбек адабиётининг насрий асарларидан хорижий тилларга қилинган энг яхши таржима;

- ўзбек адабиётининг шеърий асарларидан хорижий тилларга қилинган энг яхши таржима;

- ўзбек болалар адабиёти намуналаридан хорижий тилларга қилинган энг яхши таржима;

- хорижий тилларда яратилган насрий асарлардан ўзбек тилига қилинган энг яхши таржима;

- хорижий тилларда яратилган шеърий асарлардан ўзбек тилига қилинган энг яхши таржима;

- хорижий тилларда яратилган болалар адабиёти намуналаридан ўзбек тилига қилинган энг яхши таржима.

Халқаро мукофот ғолибларининг ҳар бири махсус диплом, кўкрак нишони ва базавий ҳисоблаш миқдорининг 300 баравари миқдорида бир марталик пул мукофоти билан тақдирланади.