Туристларга қулайлик яратиш мақсадида республика аҳамиятидаги йўлларни қуриш ва таъмирлашга жами 5,3 миллиард доллар йўналтирилади. Бу ҳақда Президент Бутунжаҳон туризм ташкилоти Бош Ассамблеяси 25-сессиясида таъкидлади.
«Умуман олганда, туризм соҳасини ривожлантириш, унинг инфратузилмасини барпо этишга жами 10 миллиард доллар ажратилади. Бу орқали, туризм ва унга ёндош соҳаларда камида 1 миллион янги иш жойлари яратишни мақсад қилганмиз», — деди давлат раҳбари.
Қайд этилишича, ҳар бир катта шаҳар ва сайёҳлар кўп борадиган жойларда “меҳмонхона – транспорт – тур-оператор – савдо ва сервис” корхоналари биргаликда фаолият юритадиган 30 та йирик туризм кластерлари ташкил этилади.
“Тошкент – Самарқанд”, “Навоий – Бухоро” йўналишларида яна 6 та тезюрар поездлар олиб келинади, 600 километр қўшимча темир йўллар қурилади.
2025 йилдан Тошкент-Хива йўналишида “Жалолиддин Мангуберди” тезюрар поезди қатнови йўлга қўйилади, 2026 йилдан эса, Нукус шаҳригача узайтирилади.
Маълумот ўрнида, Ўзбекистоннинг ЯИМ ҳажми 2022 йилги ҳисоб-китобларга кўра, 92 миллиард долларни ташкил этади.
УЗ
