Баъзи талон-тарожликлар очиқчасига амалга оширилади. Бироқ, уни тўхтатиб қолувчи куч топилмайди. Акмал Саидов раҳбарлик қилаётган лойиҳага 2,6 млрд сўм маблағ ажратиш сўралган эди. Инновация вазирлиги бунга эътироз билдириб, 1 млрд 932 млн сўм маблағ ажратишни таклиф қилди.
Куни кеча, Инновацион ривожланиш вазирлиги ҳайъати йиғилиши бўлиб ўтди. Унда Акмал Саидов ўзи раҳбарлигидаги лойиҳа - «Янги Ўзбекистон тараққиёт стратегияси» китобининг мобил иловаси ҳамда Янги Ўзбекистон луғатини ишлаб чиқиш учун Инновация вазирлигидан 2,6 млрд сўм маблағ ажратиш сўради.
Инновацион ривожланиш вазири Иброҳим Абдураҳмонов йиғилиш давомида, ушбу йирик суммани ажратилиши бўйича қуйидагича эътироз билдирган:
“…Лойиҳа нотўғри қилинганини кўриб турибман. Мобил илова 269 миллион сўм, қарийб 300 миллион сўм дейлик. Президентимиз асарни ёзиб қўйган бўлсалар, уни ёзиш керак бўлмаса, унга битта сўз қўшилмайди. … Бу пул қаерга ишлатилади, нега бунча маблағ?...», деди вазир.
Бироқ вазирликнинг йиғилишдан кейинги баёнотига кўра, лойиҳа рад этилмаган. Аксинча, кенгаш уни амалга ошириш учун 1 млрд. 932 млн. сўм маблағ таклиф этган.
Қўшимча қилиб, шуни айтиш мумкинки, Акмал Саидов тайёр китобнинг мобил иловаси учун сўраган маблағга бир мактабни замонавийлаштириб таъмирлаш мумкин. Дастурчи мутахассисларнинг фикрича Акмал Саидов сўраган маблағга 150 минг сўздан иборат ўнлаб электрон луғатлар яратиш мумкин. Шунга қарамай, Инновация вазири Акмал Саидовнинг ғояси учун қарийб 2 млрд. Сўм маблағ ажратишини маълум қилган.
Бу эса ижтимоий тармоқлар фойдаланувчиларининг муҳокамаларига сабаб бўлаяпти. Бир қатор мутахассислар бу иловани яратиш унча катта маблағ талаб этмаслигини ва бу пуллар бошқа керакли лойиҳаларга йўналтирилса кўпроқ самара беришини ёзишмоқда.
Жумладан, Тойлоқлик ўқувчи Аброрхон Аҳмадхонов «Агар биз телефонларда кўриб юрган иловаларга ўхшаш бўлса, шуни ўзим текинга ясаб бераман. Вазир боболарга айтинг, бир машина пулни давлатдан олишга эҳтиёж йўқ» дея фикр билдирган ўз каналида .