Танзила Норбоева сенаторларни қишлоқларга жўнатди. Фойдаси бўлармикин?

Сенатор ва ҳокимлар ҳудудларга саёҳат қилиб, нимани ўзгартира олади? Олий Мажлис Сенати Раиси Танзила Норбоева Сенатда доимий асосда ишловчи сенаторларни ҳудудларга хизмат сафарига юборди. Бу ҳақида ЎзА маълум қилди.

Хабарда ёзилишича, ҳар бир вилоятга борадиган сенаторлар рўйхати шакллантирилган. Улар бир ҳафта мобайнида борадиган вилоятида одамлар билан учрашиб, улар билан мулоқот қилади. Мулоқот натижаси ва ҳисоботи қандай кўринишда тақдим этилиши, мулоқотдан кўзланган натижа ва мақсадлар ҳақида аниқ маълумот йўқ. Бу амалдорларнинг қишлоққа қилган илк «саёҳати» эмас. Шу вақтгача бир нечта туман, шаҳар ва вилоят ҳокимлари ҳам чекка қишлоқларга мулоқот қилгани бориб, айримлари қишлоқдаги уйларда тунаб қолган. Мисол учун, Тошкент вилояти ҳокими Зоир Мирзаев, Сирдарё вилояти ҳокими (2021 йил январь ойи) Ғофуржон Мирзаев, қишлоқдаги уйларда тунаб қолган. Андижон вилояти ҳокими Шуҳрат Абдурахмонов совуқда гулхан ёқиб Асака тумани аҳолиси муаммоларини эшитган. Вилоят, туман ҳокимлари ҳудудларда бўлиб муаммоларни ўрганиб юрсада, халқ қабулхоналарига аҳолидан тушаётган мурожаатлар сони ортса ортаяптики, камайгани йўқ.

Танзила Норбоева сенаторларни ҳудудлар миқёсида қуйидагича тақсимлаган:

– Сенаторлар Борий Алиханов, Ботир Матмуратов – Қорақалпоғистон Республикасида;

– Равшанбек Алимов – Андижон вилоятида;

– Эркин Гадоев – Бухоро вилоятида;

– Рисқул Сиддиқов – Жиззах вилоятида;

– Қобил Турсунов – Навоий вилоятида;

– Маҳмуд Парпиев – Наманган вилоятида;

– Фарҳод Боқиев – Самарқанд вилоятида;

– Анвар Тўйчиев – Сирдарё вилоятида;

– Одилжон Иминов – Сурхондарё вилоятида;

– Малика Қодирхонова – Тошкент вилоятида;

– Манзура Салимова – Фарғона вилоятида;

– Баҳодир Тожиев – Хоразм вилоятида;

– Толибжон Мадумаров – Қашқадарё вилоятида.

Сенаторлар ҳудудларга бориб аҳоли билан мулоқот қилиб қайтгач, қандай амалий ишларни бажариб келганини, қайси ҳудуднинг муаммолари ечилганини сўраб кўрамиз