Prezident Allamjonovning “potensial qotillar haqidagi” ayblovlarini yo`qqa chiqardi

Yo`llardagi avtohalokatlarning asosiy sababi haydovchilik guvohnomalari olishdagi poraxo`rlik emas

Xabaringiz bor, keyingi vaqtlarda Komil Allamjonov va unga hamfikr bo`lgan blogerlar tomonidan rosa kuyunchaklik bilan yozilgan postlarda yo`l transport hodisalarining asosiy sababi sifatida haydovchilik guvohnomalari olishdagi tizim kamchiliklari sanab kelinadi. 

Bugun Prezidentimiz o`tkazgan yig`ilishda sohadagi ayanchli holat statistik ma`lumotlar asosida tanqidiy tahlil qilindi.

Unda tahlillarga asoslangan sabablar davlat rahbari tomonidan keltirib o`tildi. 

Aytilishicha, avariyalarning:

- 45 foizi haydovchilarning qoidalarni mensimasligi;

- 10 foizi haydovchilarning tajribasizligi;

- 25 foizi yo`l holati va infratuzilmasi talabga javob bermasligi;

- 20 foizi piyodalarning qoidalarga amal qilmasligi oqibatida sodir bo`lmoqda.

Bu sabablar orasida ko`rganingizdek, imtihonlar keltirib o`tilmagan. Demak,  Milliy mass-media fondi raisi  blogerlar yordamida ommani manipulyasiya qildi. Hamda buning ortidan esa yirik daromadli biznesga asos solindi. 

“Yuqoridagi muammolarning barchasi ham ijtimoiy, ham iqtisodiy, ham xavfsizlik masalalariga bevosita bog`liq. Shu bois, 2022 yilda barcha hududlarda “Xavfsiz yo`l va xavfsiz piyoda” umummilliy dasturini amalga oshiramiz”, dedi Prezident.

Misol uchun, 2021 yilda aniqlangan 7,7 million huquqbuzarlikdan 46 foizi qo`pol qoidabuzarliklar hisoblanadi. Ayniqsa:

- mast holda boshqarish Samarqand (12 mingta), Toshkent viloyati (8,5 ming), Farg`ona (7,5 ming) va Toshkent shahrida (7 ming);

- qizil chiroqdan o`tish Toshkent viloyati (62 ming), Samarqand (51 ming) va Toshkent shahrida (47 ming) ancha yuqori.

Allamjonovning so`zlari asosan aholi manfaati emas, o`z manfaati uchun ekanligi yana bir bora o`z isbotini topdi.

Eslatib o`tamiz: Komil Allamjonov oktyabr oyida avtomaktablarni potensial qotillarni etkazib berishda ayblagan edi.  «Avtomaktablar soqqa qilish bilan ovora», deya qayg`urgan Komil Allamjonov bugun “Yagona imtihon markazi” ortida o`zi “soqqa” qilayotganini tan olgan.