Samarqanddagi nosoz tunnel bo`yicha Samarqand shahar hokimligi matbuot xizmati munosabat bildirdi. Uning aytishicha, tunnel hali to`liq foydalanishga topshirilmagan.
Ijtimoiy tarmoqlarda Samarqand shahrida foydalanishga topshirilganiga bir necha kungina bo`lgan tunnel devorlaridan suv otilib chiqayotgani aks etgan video tarqaldi.
"O`zbekiston24" telekanali orqali 31 dekabr kuni tasvirga uzatilgan “INSON QADRI UChUN” deb boshlanuvchi lavhada ''Reja bo`yicha 3 yilda qurilishi lozim bo`lgan tunnel 1,5 yil ichida, 1 yil ichida qurilishi lozim bo`lgan galeriya tipidagi yo`l o`tkazgichi esa olti oy ichida foydalanishga topshirilishiga erishildi.'' deya ta`kidlangan edi.
Ammo Rost24.uz sayti bog`langan Samarqand shahar matbuot kotibining aytishicha, “Ko`prikning vaqtincha ochilishiga sabab Samarqand shahrida tirbandlikning kuchliligi va faqat avtomobillarning qatnov qismi ochilgan, xalos. Yanvar oyi yakunigacha ko`prikning qurilish ishlari to`liq yakunlanadi va keyin foydalanishga topshiriladi. Shuningdek, suv o`tishining ko`prikka hech qanday zarari yo`q. Sababi ko`prikdagi ariq yo`llari to`liq ishga tushmagan. Qurilish mutaxassislari ham aytdi buni. Ko`prikning tepasidan bir tomchi ham suv tomgani yo`q. Faqat kafellarning orasidan sizib chiqyapti.”
Shu o`rinda savol tug`iladi u holda hali to`liq qurib bitkazilmagan ko`prik va tunnelning qalbaki “ochilish marosimi” kimga kerak bo`lib qoldi?
Ma`lum bo`lishicha, qurilish «O`zbekiston temir yo`llari» AJ «Ko`prikqurilish» tresti UK tomonidan amalga oshirilgan. Ko`prik loyiha umumiy qiymati 143 mlrd so`m( taxm. 14 mln dollar) bo`lib, qurilish ob`ektining parametrlari quyidagicha:
-yo`l o`tkazgich uzunligi 1 km,
-balandligi 5,8 metr,
-kengligi 26,4 metr,
-yopiq qismining uzunligi 120 metr.
Ochilish marosimi haqidagi lavhada O`zbekiston Respublikasi Oliy Majlis Senati a`zosi Farmon Toshev ham ko`prik haqidagi fikrlarini aytar ekan “Har bitta qilinayotgan narsa (qurilish) bu INSONNING QADRI UChUN”, deya ta`kidlagan edi.
Bundan tashqari loyiha koordinatori Bobur Elmurodovning aytishicha, "…ko`prikdagi quvurlarning suv o`tkazish diametri 50 kub\s ni tashkil qiladi va bu ham “INSON QADRI UChUN!”
УЗ
