Rost24.uz сайти томонидан 8 ойдан бери кўтарилиб келинаётган муаммо ўз ечимини топди.
Зангиота туман ҳокимининг мактаб ва боғча учун мўлжалланган Назарбек ҳудуди 204-контур майдонининг тадбиркорга кўп қаватли уй қуриши учун берилиши тўғрисидаги қарори ҳақиқий эмас деб топилди.
Нурафшон туманлараро маъмурий судининг қарори эса бекор қилинди.
Зангиота тумани, Назарбек ҚФЙ, “Форобий” маҳалласида Президентнинг "Беш ташаббус" лойиҳаси асосида тадбиркорга кутубхона ва мактаб қуриш учун ажратиб берилган ерга замонавий турар жойлар қурилмоқда. Зангиота туман ҳокимлигининг Президент фармони билан ишлатган найранги бу ишларни гўёки қонунан бажарилишига йўл очиб берган.
Республика прокуратураси жавобига кўра ноқонуний қарор чиқарган Зангиота тумани ҳокими 15 минг нафар аҳолини мактаб ва боғчасиз қолдирган. Назарбек ҳудудига кирувчи 4 та маҳалла – Форобий, Назарбек, Қиргузар ва Аҳилобод, қўшни Найман МФЙда жами 12000 нафардан зиёд аҳоли яшайди, шундан 2876 нафари мактаб ўқувчилари, 2374 нафари эса 7 ёшгача бўлган ёш болалар, 1101 нафар боғча ёшидаги болаларни ташкил этади. Улар ҳозиргача мактаб ва боғчасиз яшаб келмоқда.
Ҳудуддаги ягона бўш қолган ва собиқ иттифоқ давридаёқ мактаб учун ажратилган ер Зангиота туман ҳокимлиги томонидан амалдаги қонунчиликка зид равишда тадбиркор учун замонавий турар жойлар қуриш учун ажратиб берилган. Зангиота туман ҳокимлиги Президентнинг беш ташаббусга оид фармони юзасидан мактаб, боғча, кутубхона қуриш учун тадбиркорга ерни 0 қийматда берган. Бир ҳафта ўтиб эса, туман ҳокими ер учун чиқарган қарорини “замонавий турар жойлар” қуриш учун кўринишида ўзгартиради.
Энг қизиғи, туман ҳокимининг қарори Ўзбекистон Бош прокуратураси ва Зангиота туман прокуратураси томонидан амалдаги қонунчиликка зид экани кўрсатилиб, протест киритилган бўлса-да, тадбиркорлар қурилиш ишларини шу пайтгача давом эттириб келинди.
Мазкур масала кўтарилгач, қурилиш объектига 9 та вазирликдан вазир ўринбосарлари иштирокида комиссия тузилиб ўрганилди. Жумладан, Қурилиш вазири ўринбосари Н.Бабаев, Вазирлар Маҳкамаси аппаратининг бош мутахассиси С.Жуманиёзов, Тошкент вилояти ҳоким ўринбосари Ш.Ҳакимов, Адлия вазири ўринбосари М.Икрамов, Халқ таълими вазирининг биринчи ўринбосари У.Шарифходжаев, Мактабгача таълим вазири ўринбосари Н.Муслитдинов, Давлат активларини бошқариш агентлиги директори ўринбосари Т.Набиев, Давлат солиқ қўмитаси ҳузуридаги Кадастр агентлиги раиси ўринбосари А.Абдуллаев, Тошкент вилояти прокурори ўринбосари, адлия катта маслаҳатчиси Ш.Турдалиев каби мутасаддилар ишни кўриб чиқишга жалб этилди.
Шунингдек, қурилиш жараёнини вақтинча тўхтатиб туришга оғзаки кўрсатма берилди. Йиғилиш якунида баённома тузилиб, аҳолини мактаб ва боғча билан таъминлаш, қайта суд ишини аппеляция орқали кўриш жоизлиги бўйича кўрсатма берилди. Аммо, айни дамда, қурилиш авжида, 15 минг аҳолининг мактабсиз қолаётгани бўйича Зангиота туман ҳокимлиги бирон иш қилгани йўқ. “Сайловгача одамларни тинчлантириб туриш” вазифасини 9 та вазир ўринбосарлари уддалади. Аммо аҳолининг мактабсиз қолаётгани улар учун нисбатан муҳим бўлмаган иш бўлиб қолмоқда.
Мактаб, боғча, кутубхона қуришни ваъда бериб ернинг асосий қисмига замонавий турар жой қураётган тадбиркор устидан норози бўлган фуқаролар 8 ой давомида судма суд, идорама идора сарсон бўлишди.
30 ноябрь куни Тошкент вилоят судида мазкур масала қайта кўриб чиқилди ҳамда ҳоким қарори ҳақиқий эмас деб топилди.
УЗ
-middle.jpg)