«Адолат»дан Президентликка номзоди қўйилган Баҳром Абдуҳалимов аслида ким?

Қуйидаги видеороликдан Баҳром Абдуҳалимов ҳақида тўлиқ маълумотга эга бўласиз.

Баҳром Абдураҳимович Абдуҳалимов 1959 йил 27 февралда Тошкент шаҳрида ишчи оиласида туғилган.

Маълумоти – олий. 1981 йилда Тошкент давлат университетининг Шарқ факультетини тамомлаган. Ихтисослиги – филолог-шарқшунос, араб ва инглиз тиллари ўқитувчиси. Тарих фанлари доктори, профессор.

Меҳнат фаолиятини 1981 йилда Ливия Араб Республикасида араб тили таржимонлигидан бошлаган. 1983–1987 йилларда Ўзбекистон Фанлар академияси Шарқшунослик институтида кичик илмий ходим, 1987–1990 йилларда ҳарбий хизматни Яман Араб Республикасида ҳарбий таржимон вазифасида ўтаган.

Б.А. Абдуҳалимов 1990–2002 йилларда Ўзбекистон Фанлар академияси Шарқшунослик институтида илмий ходим, 2002–2003 йилларда директор ўринбосари, 2003–2004 йилларда Тошкент шаҳридаги Халқаро Вестминстер университетининг проректори, 2004–2006 йилларда Фанлар академияси Шарқшунослик институти директори, 2006–2008 йилларда Ўзбекистон Республикаси Президентининг миллатлараро муносабатлар масалалари ва дин ишлари бўйича Давлат маслаҳат­чиси лавозимларида ишлаган.

2008 йилдан Фанлар академияси Шарқшу­нослик институтида директор, 2011 йилдан Фанлар академияси Ижтимоий-гуманитар фанлар йўна­лиши бўйича витсе-президенти, 2020 йилдан Ўзбе­кистон «Адолат» СДП Сиёсий Кенгаши раиси лавозимларида фаолият юритиб келмоқда.

Б.А.Абдуҳалимов Марказий Осиё тарихи, фан тарихи, ислом, шарқ қўлёзма асарлари, араб давлатлари, араб тили соҳалари бўйича йирик мутахассис.

Оксфорд ислом тадқиқотлари марказининг «Имом ал-Бухорий» (1996), Британия Кенга­шининг «Чевенинг» (1997), Жанубий Кореянинг «КОIСА» (2001) стипендияларига сазовор бўлиб, ушбу мамлакатларда малака ошириш курсларини ўтаган. 100 га яқин илмий мақола, рисола ва монографиялари ўзбек, рус, инглиз ва араб тилларида эълон қилинган.

Б.А.Абдуҳалимов 2020 йилда «Меҳнат шуҳрати» ордени билан тақдирланган.