Конимех тумани «Бирлик» маҳалласида 1 октябрь — Ўқитувчи ва мураббийлар куни муносабати билан «Бизнесни ривожлантириш банки» АТБ ҳамда Конимех тумани ҳокимлиги кўмагида «Lavenir» ўқув маркази ўз фаолиятини бошлади.
Янги ташкил этилган марказнинг очилиш маросимида банк Бошқаруви раисининг ўринбосари О. Воҳидов, туман ҳокими Р. Рўзиев, нуронийлар ҳамда кенг жамоатчилик вакиллари иштирок этди.
Айни пайтда туманда тадбиркорликни ривожлантириш, хотин-қизларни касб-ҳунарга ўргатиш ва уларнинг ташаббусларини қўллаб-қувватлаш бўйича имкониятлар кенгайтирилмоқда. Бу саъй-ҳаракатлар натижасида янги тадбиркорлик субъектлари сони ортиб, аҳоли бандлигини таъминлашга қаратилган лойиҳалар кўлами кенгаймоқда.
«Lavenir» ўқув марказида 4 та йўналиш бўйича таълим ва хизматлар йўлга қўйилган:
қандолатчилик;
заргарлик;
тикувчилик;
ярим тайёр маҳсулотлар тайёрлаш.
Айни пайтда марказда 12 нафар ишчи фаолият юритмоқда, 20 нафар ўқувчи эса касб-ҳунар сирларини ўрганмоқда. Шунингдек, ижтимоий реестрда турган 10 нафар хотин-қизнинг бандлиги таъминланди.
Марказ фаолияти орқали хотин-қизларнинг касбий кўникмаларини шакллантириш, уларни даромадли меҳнат билан банд қилиш ҳамда тадбиркорлик фаолиятига кенг жалб этиш мақсад қилинган.
Келгусида «Lavenir» ўқув маркази фаолиятини янада кенгайтириш, янги филиаллар ташкил этиш, шунингдек, олис чўл ҳудудларида истиқомат қилувчи хотин-қизларни касб-ҳунарга ўргатиш ва тадбиркорликка йўналтириш режалаштирилган.
УЗ
