Корея Республикасининг етакчи нашрларидан бири — The Chosun Daily газетасида Президент Шавкат Мирзиёевнинг «Ўзбекистон ва Корея Республикаси: ўзгаришлар даврида келажак сари интилаётган ҳамкорлик» сарлавҳали мақоласи эълон қилинди.
Давлат раҳбари мақолада Ўзбекистон ва Корея муносабатлари тарихий илдизларга эга эканини таъкидлаб, бугунги кунда икки давлат ўртасидаги алоқалар «алоҳида стратегик шериклик» даражасига кўтарилганини қайд этган.
Президентнинг таъкидлашича, Корея Ўзбекистоннинг Марказий Осиёдаги энг яқин ва ишончли иқтисодий ҳамкорларидан бири ҳисобланади. Бугунги кунда икки томонлама савдо ҳажми беш баробар ошган, Корея инвестицияларининг умумий ҳажми 8 миллиард доллардан ошган ва 700 дан зиёд қўшма лойиҳа амалга оширилмоқда.
Мақолада сунъий интеллект, яримўтказгичлар, робототехника, электромобиллар, биофармацевтика, «ақлли» қишлоқ хўжалиги ва «ақлли» шаҳарлар келгуси ҳамкорликнинг устувор йўналишлари сифатида кўрсатилган. Ўзбекистон Корея компанияларининг мамлакатда юқори технологияли ишлаб чиқариш марказларини ташкил этишини қўллаб-қувватлашга тайёр экани билдирилган.
Шавкат Мирзиёев Ўзбекистон ва Корея ҳамкорлигини XXI асрнинг «янги Ипак йўли»га қиёслаган. Унинг фикрича, Корея технологиялари ва капитали Марказий Осиёнинг ресурслари ва географик имкониятлари билан уйғунлашса, янги қиймат занжирлари, замонавий ишлаб чиқариш тармоқлари ва логистика йўлакларини шакллантириш мумкин.
Президент, шунингдек, таълим ва инсон капиталига алоҳида урғу бериб, Корея университетлари ва илмий муассасалари билан академик алмашинувлар, қўшма таълим дастурлари ҳамда илмий-тадқиқот марказларини кенгайтириш муҳимлигини қайд этган.
Мақолада Ўзбекистондаги корейс диаспорасининг икки халқ ўртасидаги муносабатларни мустаҳкамлашдаги ўрни ҳам алоҳида эътироф этилган. Президент Кореяни «қалбида алоҳида ўрин тутувчи мамлакат» деб атаган.
УЗ
