Тошкент халқаро инвестиция форуми нафақат глобал иқтисодий мулоқотлар майдони, балки истиқболли шартномалар пишиб етиладиган йирик амалий платформага айланди. Анжуманнинг марказий ва энг кутиладиган воқеаларидан бири сифатида, «CAEx» кўргазма мажмуасида Ўзбекистон Республикасининг инвестициявий, саноат ва экспорт салоҳиятини намойиш этишга қаратилган кенг кўламли халқаро кўргазма ўз иш фаолиятини бошлади.
Қариб 6 минг квадрат метрлик улкан майдонни қамраб олган кўргазмада мамлакатимиз иқтисодиётининг етакчи тармоқлари, давлат идоралари ва йирик ишлаб чиқариш бирлашмалари ўзларининг энг замонавий технологиялари ва тайёр лойиҳа пакетлари билан иштирок этмоқда.
Кўргазма павильонларидан жой олган нефт-газ-кимё, машинасозлик, металлургия, электротехника, қурилиш материаллари, фармацевтика ҳамда озиқ-овқат саноати корхоналари Ўзбекистонда ишлаб чиқариш моделлари тўлиқ трансформация бўлганини намойиш этмоқда.
Бугунги кунда асосий урғу хомашё экспортига эмас, балки юқори қўшилган қийматга эга маҳсулотларни маҳаллийлаштириш, янги техник иш ўринларини яратиш ва глобал бозорларга рақобатбардош товарлар билан чиқишга қаратилгани халқаро экспертлар томонидан алоҳида эътироф этилмоқда.
Бу йилги кўргазма шунчаки маҳсулотлар намойишидан иборат бўлмай, балки бизнес вакиллари, халқаро молиявий институтлар ҳамда давлат органлари ўртасида тўғридан-тўғри алоқаларни ўрнатувчи жонли «B2B» ва «G2B» мулоқот майдонига айланди.
Форум доирасида режалаштирилган панел муҳокамалари, тармоқ ва ҳудудий тақдимотлар ҳамда питч-сессиялар хорижлик ҳамкорларга Ўзбекистоннинг инвестиция муҳитини ичкаридан туриб, аниқ рақамлар ва амалий натижалар мисолида баҳолаш имконини бермоқда.
Дунёнинг 100 дан ортиқ мамлакатидан 9 мингдан зиёд юқори мартабали делегат, халқаро ташкилотлар раҳбарлари ва глобал инвесторлар жам бўлган ТХИФ-2026 доирасидаги ушбу кўргазма, шубҳасиз, Ўзбекистоннинг Марказий Осиёдаги бош иқтисодий ва технологик хаб мақомини узил-кесил мустаҳкамлайди.
Кўргазма давомида бўлиб ўтадиган қизғин музокаралар якунида мамлакатимиз саноатини янги босқичга олиб чиқувчи кўп миллиардлик йирик қўшма лойиҳалар ва стратегик шартномалар имзоланиши кутилмоқда.
УЗ
