Етти йилда 38 мингта хонадонли кўп қаватли уйлар ноқонуний қурилган — Қурилиш вазири

Ўзбекистонда 2018-2019 йиллардан бошлаб то ҳозирги кунгача қурилган 38 мингта хонадонли кўп қаватли уйлар ноқонуний қурилган. Бу ҳақда қурилиш ва уй-жой коммунал хўжалиги вазири Шерзод Ҳидоятов 17 декабрь куни тадбиркорлар иштирокида бўлиб ўтган очиқ мулоқотда маълум қилди.

Вазир ноқонуний қурилган деб топилган уйлар айнан нимани хато қилганига тўхталиб ўтди.

“Умуман ерга ҳам рухсат олмасдан туриб, ҳоким қарорисиз қуриб ташлагани бор. Иккинчиси, Архитектура шаҳарсозлик кенгашидан ўтказмаган. У бизни нормативларга тўғри келадими ё келмайдими, уни киритмасдан туриб қурган. Учинчиси, бу ҳоким қарори ҳам бор, кенгашдан ҳам ўтказган, лекин лойиҳани давлат лицензия берган экспертиза ташкилоти ёки давлат экспертизасидан ўтказмаган. Кейин экспертизадан ўтгани ҳам назорат инспекциясидан рўйхатдан ўтмаган”, деди вазир.

Унинг сўзларига кўра, экспертиза энг асосий вазифани, яъни инсонлар хавфсизлиги учун белгиланган тартиб бўйича лойиҳа тўғри ишлаб чиқилган ёки йўқлигини экспертизадан ўтказади Ундан кейин эса назорат инспекторлари экспертизадан ўтган лойиҳа асосида қанақа маркали цемент, арматура ва бошқа қурилиш моллари ишлатганини, қурилишни тўғри ташкил қилдими ёки йўқ, текшириши лозим. Борди-ю ўтмаган бўлса, экспертлари ҳам текшира олмайди.

“Уни назорат қилмаган бўлса, эртага давлат қанақа қилиб инсонларимизнинг хавфсизлигини назорат қила олади, хавфсизлиги учун жавоб бера олади? Шунинг учун давлатнинг ўзининг қонун-қоидалари бор. Шу қонун-қоидалар асосида қурилиши керак”, деди Шерзод Хидоятов.

Вазир 38 000 та бўйича ҳам Ишчи гуруҳ ташкил қилинганини қўшимча қилиб, уйлар тақдирига ойдинлик киритди.

“Ҳозир бу Ишчи гуруҳда аниқ айтилдики, мана шу қуриб қўйилган биноларни ҳозир жойига чиқиб ўрганиб, агар зилзилага бардошли бўлса, техник кўрикдан кейин қолган масалаларни кўриб чиқиб, кейин қонуний (қарор - таҳр.) қабул қилади. Бунда албатта инструментал текширув бўлиши шарт, бу техник текширув дейилади, ўша малакали конструкторлар билан биргаликда бориб, лойиҳа институтларимиз техник кўрик ўтказади”, деди у.

Шерзод Ҳидоятов ноқонуний қурилиш қилган тадбиркорларга чора ҳам кўрилишини айтиб ўтди.

“Ноқонуний қурганлиги учун барибир ҳуқуқни назорат қилиш органлари орқали ўша жаримаси, бошқа жавобгарликларини кўриб чиқадиган тизим қилинди. Бу бўйича ҳозир назорат инспекциямиз иш олиб боряпти”, деди қурилиш ва уй-жой коммунал хўжалиги вазири.