Тошкентдаги Ирригация ва қишлоқ хўжалигини механизациялаштириш муҳандислари университетида сув хўжалиги соҳасидаги тадбиркорлар билан илмий ва олий таълим муассасаларининг илмий ходимлари томонидан яратилган илмий ишланмалар ва ихтироларни ишлаб чиқаришга жорий этиш бўйича очиқ мулоқот ўтказилди.
Тадбир президентнинг жорий йилнинг 20-август куни тадбиркорлар билан ўтказилган очиқ мулоқоти давомида берилган топшириқлар ижросини таъминлаш мақсадида ташкил этилди.
Очиқ мулоқотда Олий таълим ва илмий-тадқиқот муассасалари, халқаро молия ташкилотлари ва сув тежовчи суғориш тизимлари ва бутловчи қисмларни ишлаб чиқарувчи ҳамда қурувчи корхоналар, шунингдек сув хўжалиги ташкилотларидан жами 240 нафар мутахассислар иштирок этди.
Тадбирда Халқаро сув ресурсларини бошқариш институти, Оролни қутқариш халқаро жамғармаси, Марказий Осиё давлатлараро сув хўжалигини мувофиқлаштириш комиссиясининг Илмий-ахборот маркази, БМТ тараққиёт дастури, Германия Халқаро ҳамкорлик жамияти, Корея халқаро ҳамкорлик агентлиги ваколатхонаси ва бошқа халқаро муассасалар вакиллари ҳам қатнашди.
Очиқ мулоқот доирасида олий таълим ва илмий ташкилотлар илмий ходимлари томонидан яратилган ишланмалар намойиши ўтказилди.
Кўргазмага жами 180 та ишланма ва маҳсулот олиб келинган. Масалан, дарёлар, каналларда сув сарфи маълумотларини узлуксиз ва реал вақт режимида ўлчаш, қайта ишлаш ва масофадан туриб узата оладиган “SMART FLOW MEASURMENT” қурилмаси, деҳқон фермер хўжаликлари, кластерлар ва балиқчилик хўжаликлари фойдаланадиган сув сарфини, миқдорини ўлчовчи ва ҳисобини юритиш учун мўлжалланган “SMART CHANNEL” қурилмаси ҳамда қишлоқ хўжалиги ерларига энергетикасиз, қуёш паннеллари орқали сув етказиб беришга қаратилган “KAVSAR” лойиҳаси ҳам намойиш қилинди.
УЗ
