Самарқандда мансабдорлар экспортни қўллаб-қувватлаш учун ажратилган 600 млн сўмни “туя қилди”

Мансабдор шахслар экспорт фаолиятини қўллаб-қувватлаш учун ажратилган маблағларни ўзлаштириб юборгани аниқланди.

Коррупцияга қарши курашиш агентлиги Самарқанд вилоятидаги тадбиркорлик субъектларининг экспорт фаолиятини қўллаб-қувватлаш учун “Савдони ривожлантириш компанияси” АЖ (собиқ Экспортни рағбатлантириш агентлиги) томонидан ажратилган молиявий ёрдам маблағларининг мақсадли ишлатилиши ҳолатини ўрганди.

Маълум бўлишича,  АЖ томонидан 5 та, жумладан, “А.Ф” хусусий корхонаси, “Қ.Ж”, “О.Г”, “А.Ш” фермер хўжаликлари ва “С.М.М” МЧЖига консалтинг хизмати учун 9 та сертификат олишга 709 млн сўм субсидия ажратилган.

Агентлик томонидан ўтказилган ўрганишда сертификат олишга консалтинг хизмати кўрсатувчи “W.М”, “Д.Қ.С” МЧЖлар, шунингдек, “О.М.С” ХК юқорида қайд этилган фермер хўжаликлари ва МЧЖга аслида кўрсатилмаган консалтинг хизматлари учун сохта ҳужжатлар тайёрлаб, “Савдони ривожлантириш компанияси”га тақдим этган ва жами 600 млн сўм бюджет маблағларини ўз ҳисоб рақамларига ўтказишга эришгани аниқланди.  

Қайд этилган ҳолатлар бўйича ушбу консалтинг хизмати кўрсатувчилар, “Савдони ривожлантириш компанияси” АЖнинг мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилди.