Fitch Ratings “Бизнесни ривожлантириш банки” АТБ кредит рейтингини оширди

Fitch Ratings рейтинг агентлиги “Бизнесни ривожлантириш банки” АТБнинг узоқ муддатли хорижий ва миллий валютадаги мажбуриятлари бўйича дефолт рейтингларини “Барқарор” прогнозини сақлаган ҳолда “BB-” дан “BB” даражага оширди.
Ушбу қарор 2025 йил 26 июнь куни Fitch Ratings томонидан Ўзбекистоннинг суверен рейтинги “BB” даражага оширилгани ортидан қабул қилинди. Шунингдек, агентлик томонидан Бизнесни ривожлантириш банкининг кичик ва ўрта бизнесни қўллаб-қувватлашда таянч банк сифатидаги роли алоҳида эътироф этилган.

Шу билан бирга, рейтинг агентлиги ҳисоботида банкнинг капиталлашув даражаси ортганлиги, активлари сифатидаги яхшиланиш даражаси ҳамда кейинги йилларда кредит портфелининг сектор кўрсаткичларига нисбатан юқорироқ суратда ўсиш салоҳияти қайд қилинган.

Банк ипотека кредитлари бўйича секторда мустаҳкам позицияга эга (сектор ипотека портфелининг 15% банк ҳиссасига тўғри келади). Шу билан бирга, кичик ва ўрта бизнес учун йўналтирилган кредитлар банк портфелининг 48%ини ташкил қилиши ҳам агентлик ҳисоботида қайд этилган.

Банк рейтингининг яхшиланиши келгусида халқаро ҳамкорлар билан олиб борилаётган трансформация жараёнларини изчил давом эттириш ҳамда халқаро капитал бозорига фаол интеграциялашувини таъминлайди, шунингдек, мамлакатнинг бизнес вакиллари учун қулай шартларда юқори сифатли молиявий хизматларни тақдим этиш имкониятларини кенгайтиради.

Реклама ҳуқуқи асосида