Бугун, 17 июн куни Ўзбекистон Миллий матбуот марказида “Бизнесни ривожлантириш банки” АТБ томонидан “Рақамли мижозлар сонини ошириш: натижалар ва режалар” мавзусида матбуот анжумани бўлиб ўтди.
Анжуманда таъкидланишича, эндиликда BRB Mobile иловаси орқали 10 миллион сўмгача бўлган барча транзакциялар фоизсиз амалга оширилади. Бу янгилик мижозларга молиявий қулайлик яратиш билан бирга, рақамли хизматларга ўтишни жадаллаштиришга хизмат қилади.
Тадбирда банк вакиллари томонидан лойиҳалар, келажак режалар ва хавфсизлик чоралари ҳақида ҳам атрофлича маълумот берилди.
Хусусан, банкнинг стратегиясида 2026 йил охирига қадар мобил илова фойдаланувчилари сонини 1 миллион нафарга етказиш вазифаси белгиланган. Ҳозирги кунда иловада рўйхатдан ўтган мижозлар сони 546 минг нафардан ошган. Мазкур мақсадга 2025 йил охирига қадар эришган ҳолда, 2026 йил охирида фойдаланувчилар сонини 1,6 миллион нафардан ошириш кўзда тутилмоқда.
“Ҳозирда биз ўзини ўзи банд қилган аҳолига рақамли молиявий ечимлар таклиф қиляпмиз. Айни дамда бу лойиҳаларда 28 мингдан ортиқ фойдаланувчи фаол иштирок этмоқда. Келгусида бу йўналишни кенгайтириш, тўлов тизимлари билан интеграция қилиш ва хизмат кўрсатишда қулайликлар яратиш устида ишлаяпмиз”, — деди "BRB TECH" IT директори Абдулла Ўтаев.
Унинг сўзларига кўра, ўтган йилнинг дастлабки 5 ойида мобил иловадан рўйхатдан ўтган янги мижозлар сони 42 минг нафарни ташкил қилган бўлса, жорий йилнинг январ–май ойларида мазкур кўрсаткич 210 минг нафарга етказилди. Бу банкнинг рақамли мижозлари сони шиддат билан ўсиб бораётганини кўрсатади.
Шунингдек, жорий йилнинг дастлабки 5 ойи давомида 2,3 миллионга яқин тўлов транзакциялари амалга оширилган бўлиб, бу ўтган йилнинг мос давридаги 1,9 миллионта кўрсаткичдан анча юқори. Кредит ва банк карталари олиш учун тақдим қилинган аризалар сони эса 66 мингтадан ортиқ бўлиб, бу ўтган йилнинг шу даврига нисбатан 7,3 баробарга ошган.
IT директор Абдулла Ўтаевнинг таъкидлашича, фойдаланувчиларнинг асосий хавотирларидан бири — хавфсизлик масаласи. Шу боис, банк томонидан илғор “Session antifraud” тизими жорий этилган.
“Масалан, агар сиз бир қурилмада иловага кирган бўлсангиз, бошқа қурилмада ҳам фойдаланиш учун биринчи қурилмангиздан рухсат сўрашингиз керак бўлади. Фақат сиз эканлигингиз тасдиқлангандан кейингина иккинчи қурилмада ҳам фойдаланишга рухсат берилади. Биз шахсий маълумотлар ва молиявий ресурслар хавфсизлигини ана шундай таъминлаймиз”, — деди у.
Маълумотларга кўра, банк кредит ажратиш жараёнларида ҳам сунъий интеллект ва биометрик технологияларни жорий этган. Ҳар бир кредит сўрови Face ID, SMS орқали шахсни тасдиқлаш ва 24 соатлик мониторинг орқали назорат қилинади.
Банкнинг 52 та хизматидан 43 таси (яъни 83%) рақамлаштирилган. Юридик мижозлар учун мўлжалланган “BRB Internet banking” саҳифасида 33 мингдан ортиқ фойдаланувчи рўйхатдан ўтган бўлиб, бу ўтган йилга нисбатан 47 фоизга ўсган. Охирги 5 ойда юридик шахслар томонидан 32,7 трлн сўмлик 1,9 миллионтадан ортиқ транзакция амалга оширилган.
Тадбир сўнгида журналистлар ўзларини қизиқтирган барча саволларга жавоб олдилар. Банк вакиллари рақамли хизматларни янада такомиллаштириш, хавфсизликни кучайтириш ва инновацион ечимлар орқали мижозлар ишончини мустаҳкамлаш борасидаги ишлар изчил давом эттирилишини таъкидлашди.
УЗ
