Ўзини ўзи банд қилган шахслар шуғулланиши мумкин бўлган фаолият турлари 104 тадан 72 тага қисқаришига сабаб рақобат муҳитини яратиш ва бизнесни ривожлантиришга кўмаклашиш. Бу ҳақда Солиқ қўмитаси раисининг биринчи ўринбосари Мубин Мирзаев АОКАда ўтказилган матбуот анжуманида айтиб ўтди.
Унинг қайд этишича, ўзини ўзи банд қилган шахслар шуғулланиши мумкин бўлган фаолият турларини кенгайтиришдан мақсад тадбиркорлик субъектларини тўлиқ легаллаштириш бўлган.
«Биз эса бу натижага эришдик. Бугунги кунда 4 миллиондан ортиқ фуқароларимиз ўзини ўзи банд қилиб, мобиль иловалар орқали солиқ органларидан рўйхатдан ўтиб, фаолият кўрсатмоқда. Бу албатта, қувонарли рақам ва ҳолат», — дейди Мирзаев.
Қўмита расмийси орадан бир неча йил ўтиб, нега мазкур рўйхат қисқартирилаётганига изоҳ бераркан, бунинг сабаби тадбиркорларга тенг шарт-шароит яратиб бериш эканлигини айтди.
«Бизнинг асосий мақсадимиз солиқ тушумлари эмас, буни билиб олишларингиз керак. Тўғри, бу керак. Лекин энг муҳим устувор вазифа бир хил тоифадаги тадбиркор учун бир хил шарт-шароит яратиб бериш, яъни тадбиркорлар ривожланиши керак. Ривожланишига тўсқинлик қилиндими, уни тўғрилашимиз керак. Чунки эртага иш ўринлари ва тадбиркорлар нотўғри ёки ноқонуний йўлга кирмаслиги лозим. Мисол учун, бир савдо дўкони бор. Унинг эгаси ЯТТ сифатида рўйхатдан ўтган. Унинг ёнидаги худди шундай дўкон эгаси ўзини ўзи банд қилган шахс сифатида фаолият юритяпти. Бу солиқ тўламайди, наргиси эса солиқ тўлайди. Иккисига икки хил шарт-шароит бўлганидан кейин бу рақобат муҳитини бузади ва ишлаш имкониятини бермайди», — дейди Мубин Мирзаев.
Унинг қайд этишича, солиқ режими икки хил бўлганидан кейин у соҳа ривожланмайди.
«Уларга фақат тенг шароит яратиб бериш орқали рақобат муҳитини яратиш ва бизнесни ривожлантириш мақсадида рўйхатни қайта шакллантиришга ҳаракат қилдик», — дея қўшимча қилди у.
Мубин Мирзаев таъкидлашича, мазкур рўйхат ҳозирда Солиқ қўмитасида хуфиёна иқтисодиёт бўйича муҳокама қилинмоқда.
«Биз тадбиркорлик фаолияти билан шуғулланишни алоҳида, ўзини ўзи банд қилганлар рўйхатини алоҳида қайта кўриб чиқиб, уларга тенг шарт-шароит яратиб беришга ҳаракат қилдик. Агар жамоатчиликда шу масалада қандайдир савол ва эътироз ёки таклифлар бўлса, биз уни Молия вазирлиги билан яна бир марта муҳокама қилиб, кўриб чиқишга тайёрмиз», — дейди у.
УЗ
-middle.jpg)