Туман ва шаҳар ҳокимликларига қўшимча ваколатлар берилади
1мартдан бошлаб, маҳаллий ҳокимликлар 10 минг м² дан кичик ва 6 ой давомида сотилмаган кўчмас мулк объектларини янги лойиҳаларни ишга тушириш ва иш ўринлари яратиш шарти билан тадбиркорларга 10 йил муддатга ижарага бериш ёки сотиш ҳуқуқига эга бўлади.
Ҳарбий хизматчилар учун ижтимоий ҳимоя кучайтирилади
Ҳарбий хизматчиларга турар жойни ижарага олиш учун ҳар ойлик пул компенсацияси 20% га оширилади. 1 июндан эса, 10 йилдан ортиқ ҳарбий хизмат ўтаганларга ипотека кредитларининг дастлабки бадали 35% га қисқаради.
Пенсияни автоматик тайинлаш тизими жорий этилади
Ёшга доир пенсиялар автоматик равишда тайинланади. Пенсиялар Пенсия жамғармасининг ахборот тизими асосида автоматик тарзда ҳисобланади. Ушбу тизим фуқароларга пенсияга чиқиш вақти келгани ҳақида хабар беради.
Скутер бошқариш учун ҳайдовчилик гувоҳномаси талаб этилади
Мопед ва скутерларни бошқариш учун ҳайдовчилик гувоҳномаси талаб этилади. Ушбу янги тартиб Вазирлар Маҳкамасининг 2024 йил 8 июлда қабул қилинган қарори асосида жорий этилади. Скутер ва мопедлар учун тегишли тоифадаги гувоҳномага эга бўлган шахслар транспорт воситасини бошқариши мумкин.
"Яшил тўлов" платформалари ишга тушади
Экология вазирлиги ҳузуридаги "Яшил хайрия" жамғармаси орқали дарахт ва буталарни экиш учун хайрия маблағлари тўпланади. Хайриялар "Яшил олам" ва "Яшил тўлов" платформаларига йўналтирилади. Жамғарма маблағлари дарахт экиш, суғориш тизимларини ўрнатиш ва ҳудудни ободонлаштириш каби экологик ишларга сарфланади.
Мобил малака ошириш хизматлари
Қорақалпоғистон ва вилоятларда мактабгача таълим ташкилотлари педагоглари учун мобил малака ошириш хизматлари жорий этилади. Ушбу хизматлар автобуслар орқали амалга оширилади ва педагоглар малака оширишни пулли асосда олишади.
Ногирон болалар учун кундузги парвариш хизмати йўлга қўйилади
1 мартдан ногирон болалар учун давлат-хусусий шериклик асосида кундузги парвариш хизмати йўлга қўйилади. Хизмат ота-оналар билан тузилган шартнома асосида тақдим этилади ва 3 ёшдан 18 ёшгача бўлган болалар учун мавжуд бўлади. 1 октябрга қадар барча ҳудудларда жорий этилиши кутилмоқда.
Экологик стикерлар берилади
Транспорт воситаларига экологик стикерлар берилади. Ушбу стикерлар транспорт воситаларининг экологик тоифасини (тоза, ўрта, зарарли) аниқлашга ёрдам беради. Шунингдек, экологик меъёрларга мос келмайдиган транспорт воситаларига экологик компенсация тўловлари жорий этилади.
Бошқа ўзгаришлар
Қишлоқ хўжалиги маҳсулотларини жисмоний шахслардан харид қилган корхоналар учун солиқ мақсадида электрон маълумотлар базаси юритилади.
Ягона платформада давлат органларининг расмий веб-сайтлари юритилади.
Трактор ва комбайнлар учун GPS қурилмаси ўрнатмасдан рўйхатдан ўтказиш тақиқланади.
Кам таъминланган оилалар учун ижтимоий ёрдамлар, жумладан, ногиронлиги бўлган болалар учун кундузги парвариш субсидиялари тақдим этилади.
Мулкчилик шаклидан қатъи назар барча ташкилотларда меҳнат ҳуқуқлари ва меҳнат муҳофазаси онлайн рейтинг асосида баҳоланади.
УЗ
