Nega o`zini o`zi band qilgan shaxslar uchun faoliyat turlari qisqartirilyapti?

O`zini o`zi band qilgan shaxslar shug`ullanishi mumkin bo`lgan faoliyat turlari 104 tadan 72 taga qisqarishiga sabab raqobat muhitini yaratish va biznesni rivojlantirishga ko`maklashish. Bu haqda Soliq qo`mitasi raisining birinchi o`rinbosari Mubin Mirzaev  AOKAda o`tkazilgan matbuot anjumanida aytib o`tdi.

Uning qayd etishicha, o`zini o`zi band qilgan shaxslar shug`ullanishi mumkin bo`lgan faoliyat turlarini kengaytirishdan maqsad tadbirkorlik sub`ektlarini to`liq legallashtirish bo`lgan.

«Biz esa bu natijaga erishdik. Bugungi kunda 4 milliondan ortiq fuqarolarimiz o`zini o`zi band qilib, mobil ilovalar orqali soliq organlaridan ro`yxatdan o`tib, faoliyat ko`rsatmoqda. Bu albatta, quvonarli raqam va holat», — deydi Mirzaev.

Qo`mita rasmiysi oradan bir necha yil o`tib, nega mazkur ro`yxat qisqartirilayotganiga izoh berarkan, buning sababi tadbirkorlarga teng shart-sharoit yaratib berish ekanligini aytdi.

«Bizning asosiy maqsadimiz soliq tushumlari emas, buni bilib olishlaringiz kerak. To`g`ri, bu kerak. Lekin eng muhim ustuvor vazifa bir xil toifadagi tadbirkor uchun bir xil shart-sharoit yaratib berish, ya`ni tadbirkorlar rivojlanishi kerak. Rivojlanishiga to`sqinlik qilindimi, uni to`g`rilashimiz kerak. Chunki ertaga ish o`rinlari va tadbirkorlar noto`g`ri yoki noqonuniy yo`lga kirmasligi lozim. Misol uchun, bir savdo do`koni bor. Uning egasi YaTT sifatida ro`yxatdan o`tgan. Uning yonidagi xuddi shunday do`kon egasi o`zini o`zi band qilgan shaxs sifatida faoliyat yurityapti. Bu soliq to`lamaydi, nargisi esa soliq to`laydi. Ikkisiga ikki xil shart-sharoit bo`lganidan keyin bu raqobat muhitini buzadi va ishlash imkoniyatini bermaydi», — deydi Mubin Mirzaev.

Uning qayd etishicha, soliq rejimi ikki xil bo`lganidan keyin u soha rivojlanmaydi.

«Ularga faqat teng sharoit yaratib berish orqali raqobat muhitini yaratish va biznesni rivojlantirish maqsadida ro`yxatni qayta shakllantirishga harakat qildik», — deya qo`shimcha qildi u.

Mubin Mirzaev ta`kidlashicha, mazkur ro`yxat hozirda Soliq qo`mitasida xufiyona iqtisodiyot bo`yicha muhokama qilinmoqda.

«Biz tadbirkorlik faoliyati bilan shug`ullanishni alohida, o`zini o`zi band qilganlar ro`yxatini alohida qayta ko`rib chiqib, ularga teng shart-sharoit yaratib berishga harakat qildik. Agar jamoatchilikda shu masalada qandaydir savol va e`tiroz yoki takliflar bo`lsa, biz uni Moliya vazirligi bilan yana bir marta muhokama qilib, ko`rib chiqishga tayyormiz», — deydi u.