Ijtimoiy tarmoqlarda O`zbekistonga Xitoyning Leapmotor avtomobillarini import qilish taqiqlangani haqidagi xabarlar tarqaldi. Tabiiyki, ushbu xabarlar ko`plab muhokamalarga sabab bo`lmoqda. O`zi bu taqiqqa qanday asos bor?
Xalqaro standartlarga mos emas
Vaziyatni Texnik jihatdan tartibga solish sohasida nazorat inspeksiyasi izohlab berdi .
Qayd etilishicha, yaqinda laboratoriyada Xitoyning Leapmotor kompaniyasiga tegishli C16 rusumli avtomobil sinovdan o`tkazilgan.
“Natijalar shuni ko`rsatdiki, ushbu avtomobil xalqaro standartlarga, xususan, Birlashgan Millatlar Tashkiloti tomonidan belgilangan xavfsizlik talablariga javob bermaydi. (belgilangan me`yordan 16 baravar ko`p)”, deyiladi munosabatda.
Bildirilishicha, “O`zbekiston ilmiy-sinov va sifat nazorati markazi” davlat muassasasining sinov laboratoriyasi tomonidan joriy yilning 10 mart kuni SB-0309-388/25-sonli sinov bayonnomasiga asosan “ustuvorlik va tashqi elektromagnit nurlanishga bardoshlilik (keng polosali elektromagnit shovqinlar)” talablariga nomuvofiqlik holati aniqlangan.
“Elektromagnit moslashuvchanlik (EMS) – elektron qurilmalar va tizimlar o`rtasida elektromagnit maydonlar ta`sirini minimallashtirish uchun o`tkaziladigan muhim sinov. Bunday sinovlar transport vositalari uchun ham zarur, chunki elektromagnit maydonlarning avtomobil elektron tizimlariga ta`siri xavfsizlikka jiddiy ta`sir qilishi mumkin. Bundan tashqari, elektromagnit nurlanishning inson salomatligiga ta`siri ham muhim masala hisoblanadi. Tadqiqotlarga ko`ra, yuqori darajadagi elektromagnit maydonlar organizmga salbiy ta`sir ko`rsatishi, jumladan, asab tizimi, yurak-qon tomir tizimi va hatto saraton kasalliklari xavfini oshirishi mumkin. Shu sababli, avtomobil tanlashda xalqaro talab va standartlarga javob beradigan mahsulotlarni afzal ko`rishni hamda avtomobil tanlashda xavfsizlik me`yorlariga rioya qilgan holda rasmiy dillerlarga murojaat qilishingizni so`raladi”, deyiladi munosabatda.
Bildirilishicha, O`zbekistonda elektromagnit moslashuvchanlik (EMS) sinovlari O`zbekiston ilmiy-sinov va sifat nazorati markazining Piskent tumanida joylashgan maxsus laboratoriyasida o`tkaziladi. Ushbu laboratoriya xalqaro O`z DSt ISO/IEC 17025:2019 standartiga muvofiq akkreditasiya qilingan.
Leapmotor vakillari nima deydi?
O`zbekistondagi Leapmotor vakillari «vaziyatni o`rganayotganliklarini va hozircha bu borada izoh bera olmasligini» bildirdi. Shu bilan birga, avtosalonda ushbu kompaniya avtomobillari savdosi davom etmoqda.
Bojxona qo`mitasi ayrim rusumdagi avtomobillarni olib kirishga cheklovlar kiritilmagani haqida xabar berdi. Davlat tashkilotining eslatishicha, «Transport to`g`risida»gi qonunning 14-moddasiga ko`ra, transport vositalari muvofiqlik yoki transport vositasi turini ma`qullash sertifikatiga ega bo`lishi va ro`yxatdan o`tkazilishi kerak. Xavfsizlik talablariga javob bermaydigan transport vositalarini O`zbekiston hududiga olib kirish, O`zbekistonda ishlab chiqarish, sotish (realizasiya qilish) yoki ulardan foydalanish taqiqlanadi.
O`zi bu qanday kompaniya?
Leapmotor — elektromobillarni ishlab chiqarishga ixtisoslashgan Xitoy kompaniyasi bo`lib, u 2015 yilda tashkil etilgan. Kompaniya Xitoyning Zhejiang provinsiyasining Xanchjou shahrida joylashgan.
Leapmotor avtomobillarning to`liq ishlab chiqish jarayoni, jumladan dizayn, tadqiqotlar va aqlli elektromobillarni ishlab chiqarish bilan shug`ullanadi. Shuningdek, u avtonom boshqaruv tizimlari va avtomobillarning tarmoqli o`zaro aloqa echimlarini ishlab chiqadi. 2024 yil sentyabr oyida kompaniya Evropada savdolarni boshlagan.
Leapmotor C16 — 5−7 o`rinli to`liq o`lchamli yo`ltanlamas bo`lib, 2024 yil aprel oyida Pekin xalqaro avtosalonida taqdim etilgan. O`zbekistonda u 459,8 mln so`mdan boshlab sotilgan.
УЗ
-middle.jpg)