Toshkentda yuristkonsult hamda Iqtisodiyot va moliya boshqarmasi bosh mutaxassisi pora bilan qo`lga olindi

DXX va IJQKD xodimlari tomonidan hududlarda korrupsion holatlar aniqlandi.

Jumladan, Toshkent shahar hokimligi
Yuridik boshqarma yuristkonsulti chet ellik fuqaroga tegishli ko`chmas mulk uchun ajratilgan 8,8 mlrd so`m kompensasiyani tezlashtirib berish evaziga 70 ming AQSh dollari olgan paytida ushlandi.

Keyinchalik, yuristkonsult kompensasiya jarayonini tezlashtirish uchun Toshkent shahar Iqtisodiyot va moliya boshqarmasi bosh mutaxassisiga 10 ming AQSh dollari bergani ma`lum bo`lib, bosh mutaxassis ham ushlangan.

Shuningdek, Surxondaryo viloyatida "Hududgaz Surxondaryo" filiali xodimi fuqaroni yo`l-transport hodisasi ortidan 11 mln so`mlik jarimaga tortmaslik evaziga 400 AQSh dollari va 500 ming so`m talab qilib, 3,9 mln so`m va 100 AQSh dollari olgan vaqtda ushlangan.

Jizzax viloyatida esa Kadastr inspektori o`zboshimchalik bilan qurilgan uy hujjatlarini rasmiylashtirish va jarimani kamaytirish uchun 400 AQSh dollari olgan vaqtida qo`lga tushgan.

Bundan tashqari, Qashqadaryo viloyati Kadastr muhandisi 2 gektar suvli va 35 sotix noqonuniy erni rasmiylashtirish evaziga 585 mln so`m talab qilib, 17 ming AQSh dollari olgan paytida hibsga olingan. Shuningdek Qarshi shahri
Majburiy ijro byurosi ijrochisi jabrlanuvchiga 554 mln so`m zararni qaytarish evaziga 4 mln so`m va 100 AQSh dollari olgan vaqtda ushlangan.

Shuningdek, Sirdaryo viloyati Energosavdo inspektori fermer xo`jaligini elektr tarmoqqa qayta ulash uchun 7 mln so`m pora olganida qo`lga olingan.

Barcha holatlar bo`yicha jinoyat ishlari qo`zg`atilib, tergov davom etmoqda.