19 mart kuni “Kichik va o`rta biznesning iqtisodiyotdagi o`rnini oshirish chora-tadbirlari to`g`risida” prezident qarori imzolandi (https://lex.uz/docs/7444738).
Tadbirkorlik sub`ektlarining yiriklashuvini rag`batlantirish maqsadida, 2025 yil 1 maydan e`tiboran, o`zini o`zi band qilgan shaxslar yakka tartibdagi tadbirkor yoki yuridik shaxs sifatida davlat ro`yxatidan o`tkazilganda, davlat boji undirilmaydi.
Shu bilan birga, 2026 yil 1 yanvardan boshlab, o`zini o`zi band qilgan shaxslar shug`ullanishi mumkin bo`lgan faoliyat turlari ro`yxati amaldagi 104 ta banddan 72 tagacha qisqaradi.
Quyidagilar ro`yxatdan chiqariladi:
1. Uyda yoki davlat ta`lim muassasalarining foydalanilmayotgan bino va inshootlari xonalarida repetitorlik qilish — bolalar va kattalar bilan ta`lim fanlari bo`yicha yakka tartibda hamda guruh bo`lib mashg`ulotlar o`tkazish
2. Xonalarni tozalash, jismoniy shaxs hududini obodonlashtirish va ko`kalamzorlashtirish
3. Uyda jismoniy shaxslarning mebellarini ta`mirlash va yig`ish
4. Jismoniy shaxslarga murakkab bo`lmagan umumiy qurilish, qurilish-ta`mirlash ishlari (beton quyish, bo`yoqchilik, suvoqchilik ishlari, g`isht va kafel terish, perforasiya, duradgorlik, chilangarlik va boshqa umumiy qurilish ishlari);
5. Jismoniy shaxslarning shaxsiy avtomobillarini mayda ta`mirlash, ularga aksessuarlar va avtosignalizasiya o`rnatish, g`iloflar va pol qoplamalarini tikish
6. Makulatura, plastik idish, temir-tersak va qo`shimcha xom ashyo to`plash
7. Yog`och me`morchiligi (bolalar maydonchalari va park zonalari uchun yog`ochdan yasalgan qurilmalar, haykallar)
8. Metall ta`mirlash ishlari (uyda amalga oshiriladigan maishiy metall buyumlarini ta`mirlash (kalitlarning dublikatlarini tayyorlash, soyabonlarni ta`mirlash, boshqa maishiy metall buyumlarini oddiy ta`mirlash)
9. Uyda popkorn, frezerda muzqaymoq tayyorlash va sotish
10. Dehqon bozorlarida qishloq xo`jaligi mahsulotlari bilan chakana savdo qilish
11. Gazetalar, jurnallar va kitob mahsulotlari bilan chakana savdo qilish
12. Sartaroshlik xizmatlari, manikyur, pedikyur xizmatlari
13. Kosmetolog xizmatlari va shunga o`xshash boshqa xizmatlar
14. Uyda kir yuvish va dazmollash xizmatlari
15. Tikuv, mo`yna, charm va trikotaj buyumlarni, bosh kiyimlarni va to`qimachilik galantereyasi buyumlarini ta`mirlash, aholining yakka tartibdagi buyurtmasi bo`yicha tikuv va trikotaj buyumlarini, bosh kiyimlarini va to`qimachilik galantereyasi buyumlarini tikish
16. Gazlamalarga naqshlar solish (gazlamalar va kiyim ashyolarini qo`lda bo`yash, gazlamalarga, shu jumladan trafaretli bosma va qo`lda rasm chizish usuli bilan rasmlar solish)
17. Yakka tartibda deraza va eshik pardalarini tikish va ta`mirlash, kashtachilik
18. Galantereya buyumlarini tayyorlash va ta`mirlash
19. Bijuteriya va jevaklarni tayyorlash va ta`mirlash
20. Gulchambarlar (shu jumladan, motam gulchambarlari), sun`iy gullar, ikebana, gul marjonlarini tayyorlash
21. To`siqlar, haykallar, metalldan yasalgan gulchambarlarni tayyorlash va ta`mirlash
22. Akvarium baliqlari, dekorativ qushlar va boshqa hayvonlarni ko`paytirish va sotish
23. Video va fotosuratga olish xizmatlari
24. Qadoqlash uskunalaridan foydalanmagan holda uy sharoitida milliy shirinliklar, qandolat mahsulotlarini tayyorlash va sotish
25. Salatlar va tuzlamalarni tayyorlash va sotish, shuningdek, uy sharoitida donalab sotiladigan taomlarning ayrim turlarini tayyorlash va o`tirish joylarini tashkil etmasdan yoki mahalliy davlat hokimiyati organlarining qarori bilan ajratilgan maxsus joylarda sotish
26. Uyda quyib sotish uchun salqin ichimliklar, ayron, go`ja hamda qurt tayyorlash va sotish
27. To`garaklar tashkil etish va yuritish
28. Gullar va dekorativ daraxtlar etishtirish va sotish (shu jumladan, bonsay san`ati)
29. Reklama bukletlarini tarqatish, uyda operatorlar tomonidan buyurtmalar qabul qilish
30. Muqovalash ishlari
31. Gid (gid-tarjimon), ekskursiya etakchisi va yo`riqchi-yo`l boshlovchilar xizmatlari
32. Matnni yaratish va ishlov berish (kopirayter, rerayter, SEO-kopirayter, SEO-rerayter, musahhih, kontent-menejer, muharrir, e-mail orqali xatlarni jo`natish bo`yicha mutaxassis, spichrayter, transkriber va boshqalar)
33. Rieltorlik xizmatlarini ko`rsatish (ijaraga uy-joy topishda, shuningdek, uy-joy sotib olishda yordam berish)
34. Qishloq xo`jaligi mahsulotlarini mahallalarda yig`ish va faqat mahalliy eksport qiluvchi korxonalarga sotish.
2026 yil 1 yanvardan boshlab, ro`yxatga quyidagilar qo`shiladi:
elektron savdo maydonchalarida tovar va xizmatlarning chakana savdosi;
nomoddiy madaniy meros ob`ektlarini (dorboz, askiya va lapar) asrash va ulardan foydalanish (madaniyat markazlari tarkibida faoliyat yuritayotgan shaxslar bundan mustasno);
uy sharoitida xonaki tovuqlarni etishtirish va ko`paytirish.
УЗ
